2. पाप संसार मा आवे

आदम एने तेरी लाडी, परमेश्वरोन लारे बोनावला घाटवा बोगीचा मा घोना खुश रोयता होता. तिंदरे माईन कुदू छींदरा नी पेहेरता होता, तेबी चे लाजवायता नी होता, काहा की संसार मा पाप नी होतो. चे हमेशा बोगीचामा फिरता होता एने परमेश्वरसी वात कोऱ्या कोरता होता.

बाकीन तीना बोगीचामा एक घऴसु होतु. चु घनू चालाक होतू. चू तीनी बायर काजे पूछु, “काय छाचलीन परमेश्वर तुमू काजे इना बोगीचान फोव खानेन कोरीन मना कोरलु छे.”

ची बायर पोछि जवाब आपी, “परमेश्वर आमु काजे कोयलु छे की यो वारलान ने मुंडलान ग्यान आपने वावा झाडोन फोवोक छुडीन कानला भी झाडोन फोव तुमू खाएं सोकतला, परमेश्वर आमुक कोयलु की अगर तुमू इना फोव काजे खादा निती छीम्या बि ती तुमू मोर जसु.”

चु घोळसु तिनी बायर काजे ज़वाब आप्यु, "यो छाचलीन नि होय, तुमू नि मोरे, परमेश्वरोक मालुम छे की जोर तुमू इना फोव काजे खासु ती परमेश्वरोन तोसा बोन जासु एने तेरे सारका वारलो एने भुंडलो समजने बाज जाय.

ची बायर देखि कि फोन मोन काजे वारु लागे होसो छे एने सोवादो बि देखाये. ची बि समझदार बोनने हीनडती होती एरेन कोरीन ची फोव तुडिन खाय लेदी. ओवतेन ची तेरा घर वावा काजे जू हेरे साते होतु फोव आपी एने चू बि खाय लेदु.

अचानक तिंदरा डूवा उगडी गोया. एने तीनुक मालुम होयो की चे नांगेरला छे. ओवते चे पांटा सीविन, तिंदरा डोगला बोनाविन चे तिंदरा डीलो काजे ढाकनेन कोशिश कोरिया.

तेतार आदम एने हव्वा बगीचामा परमेश्वरोन आवाज काजे सोमव्या, एने चे दुयू डूकाय गोया, तेतार परमेश्वर तीनुक आयड्यू, "तू का छे?" आदम जवाब आप्यु, "में या छे, तारु आवाज सोमविन बिही गोयु काहा की में नांगेरलू होतू, एरेन कोरता में डूकाय गोयलू."

ओवतेन परमेश्वर तिनुक पुछू, "तुसेक कुन कोयो की तू नागरलू छे? काय तू चो फोव खाय लेदलु जॉन मना कोरलू". आदम जवाब आप्यू, "तु जीनी बायोर काजे मेसेके आपलु चीत मेसेक फोव आपी". तेतार परमेश्वर बयोर काजे पुछूं, "तु यो के कोरी?" ची बायोर कोयि, "घोडसू मेसेक धोकू आपलु छे."

परमेश्वर घोडसाक कोयु, “तू शापीत से, तू तार पेटन लारे चालीस एने धुवु चाटीस, तु एने यी बायोर एक दिसरान रिस कोरसे, एने तारा पूर्या एने हेरा पुऱ्या बि एकदीरापोर रिस कोरसे एने इनी बायोरोन पीढी तारा मुनकाक कुचरसे, एने तू तेरी एड़ी काजे चावसे.

तेतार परमेश्वर बायोर काजे कोयू, "में तारा जन्म अपनेन पीळाक बोडाविस, तू तारा घरवावान लालसा कोरिस, एने चू तार पोर राज कोरसे.

परमेश्वर आदम काजे कोयू, "तू तारी लाडीन सोमोवलू छे एने मारी आग्या नी मान्यु, ऐरन करता धोरती शापित होयली से एने बीज उगाड़नेन कोरता जादा मेहनत कोरनेने गरज पोडसे. हिमी तू मोर जाश एने तारो डील धुवामा भेस्काय जासे." आदम हेरी लाड़ीन नाव हव्वा मेक्यु, जेरो मतलब छे "जीवन आपने वावी", काहाकी ची आखा जातिन आश होयसे. परमेश्वर आदम एने हव्वा काजे जानवरोन खालळो पेराव्यु.

अवतेन परमेश्वर कियू, "हिमी वारलो एने भुंडलो जाननेसी मानूस आपने सारकु हाय गयलू से, एरेन कोरता तीनुक तीना जिवनोन झाड़ोन फोव खाने नी देनो जुवे की चे हमेशा जीवतला रोहे." एरेन कोरता परमेश्वर आदम एने हव्वा काजे बगीचाम गोथा निकाव देदू. एने परमेश्वर कुदू बि तिना फोव काजे नी खानो जुवे कोरीन बोगिचान झोपला पोर ताकत वावा स्वर्ग दूत काजे बोठाळ देदू.