3. बाढ

घना दाहळा बाद मा संसारमा घना सोवटा माणसे रोय्ता होता. चे घना भुंडा एने पागेल होय गोयला होता. यो जुदो काठो होतो कि परमेश्वर संसार काजे पाणिन लारे नाश कोरनेन निर्णय लेदू.

बाकून परमेश्वर नूह सी खुश होतु, होयू पापी मानसोमा रोयनेवावु धोरमी माणूस होतु. परमेश्वर नूह काजे कोयू कि होयू एक मोटी विपत्ती लावणेवावु छे, एरेनकोरता परमेश्वर नूह काजे एक मोटलो धोंढ्यो बोनावने कोयू.

परमेश्वर नूहा काजे 140मीटर नाम्बी, 23 मीटर चौडी एने 13.5 मीटर उची एक मोटीत जाहाज बोनावने कोयू. नूह काजे यी जहाज लाकळान बोनावनो होतो एने ची जाहाज तीन तालोन एने घाना सोवटा खुल्या एने एक छत एने खिळकी बोनावनो होतो, एने यी जाहाज नूह काजे एने हेर परिवार काजे एने अखं भातीन जनावरोक पाणिन बाढसी सामावीन राखसे.

नुहा परमेश्वरोन वात मान्यु एने जोसू परमेश्वर कोयलु तोसा होयू एने हेरा पुऱ्या जाहाज बोनाव्या. जाहाज बोनाने घाना सोवटा दाहळा लाग गोय्ला काहाकी जाहाज मोटी होती. नुहा मांसोकाजे आवने वावी बाढन बारामा कोयू बाकीन चे भुरसू नि कोऱ्या.

ओवतेन परमेश्वर नूह काजे कोयू कि तुमरेण कोरता एने जनवारोन कोरता खानो टुवू कोर लेयु. जेतार आखो तीयार होय गयो ती परमेश्वर नूह काजे कोयू कि यु टेम जाहाजमा जानेन से ती नूह, हेर लाडी एने हेरा पुऱ्या, आखा मेवीन आठ जोन होता जीणूक जाहाज मा जाणो होतो.

परमेश्वर हर जानवर एने चिल्लान नर एने मादा काजे नुहान चा मुकल्यू कि चे जाहाजमा जाय सके एने पाणिन बाढ सी वाच सके परमेश्वर ओसला हर भातीन जनावारोन सात नर एने सात मादा काजे मुकल्यू जीणूक बली चोळावानेन वापरमा आवे. जेतार आखा जाहाज मा जात रोया ती परमेश्वर जाहाजोन झोपलू बोंद कर देदू.

तेतार आणि पोडनो चालू होय गयो, एने पाणी पोळतू गोयू, ४० दाहळा एने रात तक पाणी पोळतू गोयू.आखी कोवोन हर एक चीजे एने मोटला मोट्ला बोयळा बी पाणिमाडूब गया.

जाहाज मा होता तीनुक छुडीन सुकला जागामा रोयने वावा हेर चीजे मोर गया. ची जाहाज पानिपोर तरंगती रोयी एने माहायला डूबनेसी वाच गया.

पाणी रुकनेने बादमा, पाच मोयना तोक जाहाज पाणी पोर तरंगती होती, एने तिने टेमे पाणी काम होयतो होतो. एने एक दाहळे जाहाज एक बोयळान टेकळापोर जात रोय बाकून संसार पाणीमात दुबलो होतो. तीन मोयना बादमा बोयळान छेंडी देखाय पोडी.

ओवते चावीस दाहळा बादमा नुहा एक हाळगावाक काजे छुड्यू, यो जाननेन कोरीन कि पाणी उसट्यो कि नि, चो हाळगावो या वा जातो रोयो बाकून असू जागू नि जुड्यू.

अवतेन नुहा एक पेरवा काजे सुड्यू, बाकून तीनिक बी जागू नि जोड्यू, एरेन कोरता चो नुहानचा पोछी आव लागी. एक हाप्तान बादमा तिनी पेरवी काजे पोछू मुकल्यु, एने ची तेरा चाचेवळामा एक जेतुनोन डाव लीन पोछी आव लागी. पाणी आटतो होतो एने झाडे उगणे बाज गोया.

नुह एक हाप्तु ओवी वाट जुव्यू एने तिसरी कावा तिनी पेरवी काजे बारथे मुकल्यू इनी टेमे तिनी काजे रोयनेन जागू जूळ गोयलू कोरीन ची पोछी नि आवी, पाणी सुकतो होतो.

दुय मोयना बादमा परमेश्वर नूह काजे कोयू, “हिमी तू एने तारो घरानो एने आखा जानवोर जाहाजमा गोथा निकवी जावू. घना सोवटा पुऱ्या एने पुऱ्यान पुऱ्या पोयदा कोरु एने जोगोमा सोमाय जावू.” एने नुहान परिवार बारथे निकवी गया.

नुहान जाहाजन बारथे आवनेन बादमा, नुहा एक वेदी बोनाव्यू एने बली चोडावनेन लायक हर भातीन जानवरो माईन थूलाक काजे लीन बली चोडाव्यू. परमेश्वर तिनी बली सी खुश होयू एने नूह काजे एने हेरा परिवार काजे आशिष आप्यू.

परमेश्वर कोयू, “मे वायदू कोरो कि मानसोन लारे होयला भुंडला कामोन कोरता मे ओवी असू कोदी धोरती काजे श्राप नि आपो एने पाणिन लारे संसार काजे नाश नि कोरो, चाहे माणूस नानलूतने पापी छे.”

ओवतेन परमेश्वर वायदान चीन्नान रूपमा पेहेल इंद्र धनुष्य ( सात रंग ) बोनाव्यू. जेतार केतार बी वादवामा सात रोंगे देखाय ती परमेश्वरोन फोम कोरसे कि चू काय वायदू कोरलु छे, एने तिना रीतीसी माणसे बी फोम कोरसे.