4. अब्राहम साते देवोन वायदू

बाढोन घोणा सोवटा सालोन बादमा, सांसारमा माणसे रोयता होता, एने चे ओवी परमेश्वरोन विरुद्धमा पाप कोऱ्या. चे आखा एकुत भाषा बुलता होता एने चे आखा एकठा रोयने बाज गोया, संसार काजे भोरनेन जोसी देवोन आग्याहोती तोसी चे नि मानता जाईन चे अलग गाव बोसाडने बाज गोया.

चे घोणा घमंडी होता, तीनु काजे कोसो जीवन जीवनो से एरेन कोरता देवोन आग्यान पालन कोरने नि चाहता होता. ओवते चे एक बाबेलोन टावर बोनावने चालू कोऱ्या जो सोरगेतोक पुगे. परमेश्वर देख्यू कि अगर ये ओसात भुंडलो कोरता रोयसे ती चे जादा पाप कोर लेसे.

एरेन कोरता परमेश्वर तिंदरी भाषा काजे बोदलाव देदू एने तीनु काजे आखी संसारमा पसराव देदू. एने जिना टावोर काजे चे बोनावता होता चो बाबेल कोवायतो होतो जेरो मतलब होयतलो “गळबळ”.

घोणा साल बादमा, परमेश्वर अब्राम नावोन मानसोसी वात कोऱ्यू. परमेश्वर तीनाक कोयू, “तारा देस काजे एने तारा परिवार काजे छुडीन मे देखाडो तिना देसमा जा, मे तुसेक आशिष आपीस एने तारेसी एक मोटीत जाती बोनावीस,मे तारो नावो उचो कोरिस, एने जो तुसेक आशिष आपसे तीनुक मे आशिष आपीस, एने जो तुसेक श्राप आपसे तीनुक मे श्राप आपीस एने तारे वोजेहसी संसारोन आखा माणसे आशिष लेसे”.

आखिर अब्राम परमेश्वरोन वात काजे मान्यु एने तेरे जूव होतो तोतारो आखो लीन तेरी लाडी सारा साते चू कनान देसमा जात रोयू जो परमेश्वर हिनाक देखाळलु.

जेतार अब्राम कनान पुग्यू ती परमेश्वर तीनाक कोयू, “तारेनचा गोथू चारू छीम्कीर देख, मे तुसेक यो आखो आपीस एने तारी पिढी हमेशा कोरता इनापोर होकदार रोयसे”. एने अब्राम तिना देसमा रोयने बाज गोयू.

मलिकिसिदक एक माणूस होतु जो देवोन एक मोटलु पुजारू होतु. एक दाहळू जेतार अब्राम लोळाय कोरणेन बादमा पोछू आवतू होतु तेतार मलिकिसिदक एने अब्राम भेटाया. मलिकिसिदक अब्राम काजे आशिष आप्यू एने कोयू, “आखान मोटलु परमेश्वर जू सोरोग एने धोरतीन मालिक छे चू तुसेक आशिष आपे”. तेरे बादमा अब्रामोन जीकलो आखो चीजे चू मलिकिसिदककाजे आप देदू.

घोणा सोवटा साल जात रोया, बाकून अब्राम एने सारान पुऱ्या नि होता. तेरे बादमा परमेश्वर अब्राम साते वात कोऱ्यू एने ओवी वायदू कोऱ्यू कि हेरो एक पुऱ्यू होयसे एने वाढवामाईन चांदण्यान तोतरा तारा पुऱ्या काजे वाळावीस. अब्राम परमेश्वरन वायदापोर भुरसू कोऱ्यू. परमेश्वर घोषणा कोऱ्यू कि अब्राम धोरमी से, काहाकी होयू परमेश्वरोन वायदापोर भुरसू कोऱ्यू.

तेतार परमेश्वर अब्राम साते एक ओवी वायदा कोऱ्यू. साधारण रूप मा देखे ती वायदू यु दुय दोलोन इचामा काम कोरनेन सोमजोता होये. परमेश्वर अब्राम सी वायदू कोरतू होतु तेतार अब्राम सुवतू होतु. बाकून तेतार बी चू परमेश्वरोन सोमोवतू होतु. परमेश्वर कोयू, “मे तारा डीलोसी एक पुऱ्यू आपीस. मे तारी पिढीकाजे यो कनान देस आपीस”. बकुन हिमीबी अब्रामोन पुऱ्या नि होय.