5. वायदान पुऱ्यू

अब्रामोन एने सारा कनान देसमा पुगनेन दस साल बादमा बी तिंदरा पुऱ्या नि होता, एरेन कोरता अब्रामोन लाडी सारा कोई कि “परमेश्वर हिमितोक मेसेक पुऱ्यू नि आप्यू एने हिमी मे पुऱ्याकाजे जन्मो आपने कोरता लायक नि होय काहाकि मे हिमी डायी होय गोय, एने मारी दासी हाजिरा या छे हेरे साते वियाव कोरले काहाकी होयी मारेन कोरीन पुऱ्यो आप सके”.

आखिर अब्राहाम हाजिरा साते वियाव कोर लेदू, हाजिरा काजे एक पुऱ्यू पोयदा होयू एने अब्राम तेरो नाव इस्माईल मेक्यू. बाकीन सारा हाजिरासी रीस कोरणे बाज गोय. जेतार इस्माईल तेरा सालोन होतू, परमेश्वर अब्राम साते वात कोऱ्यू.

परमेश्वर कोयू, “मे ताकतवावु परमेश्वर से, मे तार साते एक वायदू बांदिस”. तेतार अब्राम धोरतीपोर पोडीन देवो ओगोव झुक्यू. परमेश्वर अब्राम काजे यो बी कोयु, “तू घोणा सोवटा जातीन बास होयीस, मे तुसेक एने तारा पुऱ्या पारिक काजे तिंदरी खुदोन जागू होये कोरीन कनान देस आपीस एने मे कायोमोन कोरता तुमरु परमेश्वर होय जाश. एने तुसेक हर घरोन मानसोकाजे सुंता कोरनो से”.

परमेश्वर कोयू, “तारी लाडी सारा एक पुऱ्या काजे जन्मो आपसे एने चू वाय्दान पुऱ्यू गीनायसे, तेरो नाव इसहाक राखजू. मे तेरे साते मारी वायदा काजे बोनावीन राखिस एने चू एक मोटली जाती बन जासे. मे इस्माईल काजे बी मोटली जाती बोनावीस बाकीन मारु वायदू इसहाक साते रोयसे.” तेतार परमेश्वर अब्रामोन नाव बद्लावीन अब्राहम मेक्यू जेरो मतलब से “घोणा सोवटान बास”.परमेश्वर सारै गोथो सारा मेक्यू जेरो मतलब “मुलमाता” होये”.

तिने दाहळे अब्राहम हेरा घोरोमाईन आखा मानसोन सुंता कोऱ्यू. लागभग एक साल बादमा, जेतार अब्राहम 100 सालोन होतु एने सारा 90 सालोन होती. तेतार सारा एक पुऱ्याक जन्मो आपी एने जोसू परमेश्वर कोयलु तोसु तेरो नाव इसहाक मेक्या.

जेतार इसहाक जुवान होयू ती परमेश्वर कोयीन अब्राहमोन भूरसान पारख कोऱ्यू, “तारा एकलौतू पुऱ्याकाजे ले, एने तीनाक मारेन कोरीन बली चोडाव.” ओवी अब्राहम परमेश्वरोन वात काजे मान्यु एने तेरा पुऱ्या काजे बली चोडावने तीयार होय गोयू.

जेतार अब्राहम एने इसहाक बली चोडावनेन जागे जाणे बाज गोया तेतार इसहाक पुछु, “हे बास, आपने जूव बली चोळानेन कोरता लाकळाते छे बाकून बली चोडावनेन कोरता गाडरो का से?” अब्राहम जवाब आप्यू, “हे मेरे पुऱ्यू, परमेश्वर बलीन कोरता गाडरान पुरती कोरसे.”

जेतार चे बली चोडावनेन जागापोर पुग गोया, तेतार अब्राहम इसहाक काजे बांदीन वेदिपोर लुटाळ देदू. चू तेरा पुऱ्याक मारनेत वावु होतु कि परमेश्वर कोयू, “रुक जा, पुऱ्याकाजे नुकसान मा पुगाळे, हिमी जान गोयू कि तू मारू बिक मानतलु काहाकी तू तारा एकलौता पुऱ्याकाजे मारसी वाचाडीन नि राख्यू.”

हिंदरे धोळेत साते अब्राहम एक गाडराक झाडोमा ओटेकलो देखायो. इसहाकोन बोदले बलीन कोरता परमेश्वर एक गाडरा काजे आप देदू, एने अब्राहम ख़ुशी ख़ुशी बली चोडाव देदा.

तेतार परमेश्वर अब्राहम काजे कोयू, “काहाकी तू मारेन कोरीन आखो आपनेन कोरीन तीयार होय गोयू, या तोक कि तू तारा एकलौता पुऱ्याक बी आप देदू एरेन कोरता मे तुसेक आशिष आपनेन वायदू कोरो. तारी पिढी काजे वाढवामायला चांदण्यान गोठा बी सोवटा होयसे, काहाकी तू मारी आग्या काजे मानलू से एरेन कोरता मे तारा परिवारोन लारे संसारोन आखा कुल काजे आशिष आपीस.”