6. परमेश्वर इसहाकोन कोरता प्रबंध (जुगाळ) कोरे

जेतार अब्राहम घोणु डायु होय गोयलू तेतार हेर पुऱ्यू इसहाक, एक मानसोन उमोरोन होत्रूक होय गोयलु होतु. एरेन कोरता अब्राहम हेरा एक सेवोक काजे हेरा पुऱ्यान कोरता एक लाडी लावनेन कोरता मुकल्यू जा सारीक हेरा रीस्तेदार रोयता होता.

जा अब्राहमोन रीस्तेदार रोयता होता तिना देसमा जाणेन एक नाम्बी यात्रान बादमा परमेश्वर अब्राहमोन सेवकोण एने रेबिका नावोन पुराय साते भेट कोराव्यू, ची अब्राहमोन भाशोन पुऱ्यान पुराय होती.

रेबिका हेरा परिवार काजे छुडीन सेवोक साते जाणे तीयार होय गोयी. जोसा चे पोछा पुग्या इसहाक तेरेसाते वियाव कोर लेदू.

लोक्के दाहळा बाद, अब्राहम मोर गोयू, तेतार परमेश्वर अब्राहमोन पुऱ्यू इसहाक काजे आशिष आप्यू जू अब्राहम काजे परमेश्वर वायदू आपलु होतु. तिना वायदामा परमेश्वरोन एक वायदू होतु कि अब्राहम गीनाये नि आत्रा तेरा पुऱ्या रोयसे, बाकून एशाकोन लादिन जी रेबिका होती तेरा पुऱ्या नि होया.

इसहाक रेबिकान कोरता प्रार्थना कोऱ्यू एने परमेश्वर हीनु काजे जूळवा पुऱ्यान गर्भ धारण होयो. जिने टेमे चे पुऱ्या रेबिकान पेटोमा होता तेतार चे दुयू जोना पेटोमा लोळायता होता एरेन कोरता जो काय हिओय्तो होतो चो परमेश्वर काजे कोयती होती.

परमेश्वर रेबिका काजे कोयू, “तू दुय पुऱ्याक जन्मो आपीस एने तिंदरा दुय अलग- अलग जाती बोनसे, एने चे एक दिसरा साते लोळायसे. बाकून मोटला पुऱ्यासी होयने वावा जाती काजे नानला पुऱ्यासी होयनेवावा जातीन आग्या काजे मानोनो पोळसे.”

जेतार रेबिका काजे पुऱ्या होया, ती मोटलु पुऱ्यू रातलु एने नोरोमो होतु, एने तेरो नाव एसाव राख्या. तेतार नानलु पुऱ्यू एसावोन घोटनि काजे धोरीन जन्मो लेदू, एने तेरो नाव याकुब मेक्या.