7. परमेश्वर याकुब काजे आपतलु

जेतार चे मोटा होया याकुब काजे घर रोयनो वारू लाग्यो, बाकून बाकून एसाव काजे जानवोरोन शिकार कोरनो वारू लाग्यो. रेबिका याकुब सी मोंग कोरी एने इसहाक एसाव सी मोंग कोऱ्यू.

एक दाहळे, जेतार एसाव शिकार कोरीन पोछू आव्यू ती चू घोणु भुकलु होतु. एसाव याकुब काजे कोयू, “जो तू रांदलु से तेरेमाईन थुलोक मेसेक बी आप दे.” याकुब जवाब आप्यू, “पेहेल तू मेसेक यु वायदू कोर कि पहलौठा होयनेन वाजहसी हर एक जीज जी तुसेक जूळतली ची मेसेक आपजी.” आखिर एसाव आखा जिचे याकुब काजे आपनेन वायदू कोऱ्यू, तेतार याकुब तीनाक खाणे आप्यू.

इसहाक एसाव काजे आशिष आपने हिंडतू होतु, बाकून एरेन पेहेल कि इसहाक एसाव काजे आपतू, रेबिका एने याकुब एसाव होय्नेन नाटक कोरीन तेरे साते धोकू कोऱ्यू. इसहाक डायु होय गोयलु होतु एने तीनाक देखायतो नि होतो. एरेन कोरता याकुब एसावोन छीन्दारा पेऱ्यू एने बुकळा खालळो तेरा गोवामा एने हातोमा वेटाव लेदू.

याकुब इसहाकोनचा आव्यू एने कोयू, “मे एसाव से, मे एरेन कोरता आव्यू कि तू मेसेक आशिष आपे.” जेतार इसहाक बुकळा बुकळान झोटाकाजे पारख्यु एने छीन्दाराआजे गोंद्यू, ती चू सुचू कि यो एसाव से ती चू तीनाक आशिष आप्यू.

एसाव याकुब पोर रीस कोऱ्यू काहाकी याकुब एसावोन मोटलु पुऱ्यू अधिकार कीजे एने तेरा आशिष काजे बी चुरी कोर लेदलु. आखिर चु तिन्दारू बासोन मोरनेन बादमा याकुब काजे मार नाखनेन योजना बोनाव्यू.

बाकून रेबिका एसावोन वाते सोमवी लेदली. एरेन कोरता रेबिका एने इसहाक याकुब काजे तिंदरा सोगासाईमा घोणे नाम्बे मुकली देदा.

याकुब घोणा साल तोक रेबिकान रीस्तेदारमा रोयू. टेमे चू वियाव कोर देदू एने हेरे लारे बारा पुऱ्या एने एक पुराय होई एने परमेश्वर तीनाक घनु मालदार बोनाव देदू .

कनान देस जा हेरो घोर होतो चा गोथू वीस साल नाम्बे रोयनेन बादमा, याकुब तेरा परिवार काजे एने तेरा दासोकाजे एने जानवरोकाजे लीन होयू चा पोछू आव्यू.

याकुब बिह्तु होतु काहाकी चू विचार कोरतू होतु कि एसाव हिमिबी कोदामाईन मेसेक मार देसे, एरेन कोरता याकुब भेटोन रूपमा जानवोरोन टूवा काजे एसावोनचा लीन मुकल्यू. जा सेवोके तिना तुवा काजे लीन गोयला होता चे कोया, “तारू दास याकुब, इनू जानवोरो काजे तुसेक आपे, एने चू साटू आवने बाज रोयू.”

बाकून एसाव हिमी याकुब काजे नुकसान नि पुगाळने चाह्तु होतु, बाकीन चू तीनाकाजे पोछु देखीन घोणु खुश होतु. तेरे बादमा याकुब कनान देसमा वारू शांतीसी रोयू, ओवतेन इसहाक मोर गोयू एने याकुब एसाव तीनाक गाळ्या. वायदान कोसमे जा परमेश्वर अब्राहमसी कोरलु होतु हिमी इसहाक सी याकुब पोर आव लागली होती.