8. परमेश्वर युसूफ एने हेरा परिवार वाचाळे

गोणा सालन बादमा, जेतार याकुब डायु होय गोयू, ती चू तेरा मोंगावा पुऱ्या युसूफ काजे तेरा भाशोन पारख कोरनेन कोरता मुकल्यू जे जानवोरोन टूवान राखवावी कोरता होता.

यूसुफोन भाशे तेरेपोर रीस कोरता होता, काहाकी हिंदरू बास युसूफ पोर घोणु मोंग कोरतू होतु एने एरेन कोरता बी कि युसूफ सोपनो देखलु होतु कि तिंदरु मालोक होय जासे. जेतार युसूफ तेरा भाशोनचा आव्यू ती चे तीनाक बंदी बोनाव लेदा एने तिना काजे दासोन व्यापार कोरनेवावाक वेच देदा.

घर आवनेन पेहेल तेरा भाशे युसूफोन डोगलाक फाळीन बुकळान लुहीसी भिगाळ देदा ओवतेन चे तीन डोगलाकाजे तेरा बासोनचा लावीन देखाळ्या काहाकी हुयू देखीन यो जान जाय कि युसूफ काजे बोयळा माईन जानवोरे खाय गोया, याकुब घोणु दुखी होयू.

चू दासोन व्यापार कोरनेवावा युसूफ काजे मिस्र देसमा लीन जात रोया. नील नदीन धोळे बोठलो मिस्र देस एक मोटो घोनो ताकतवावो देस होतो. चे दासोन व्यापार कोरणे वावा युसूफ काजे दासोन रूपमा एक मालदार सरकारी पुढारी काजे वेच देदा. युसूफ तेरा मालीकोन वारू रीतीसी सेवा कोऱ्यू एने परमेश्वर युसूफ काजे आशिष आप्यू.

युसूफोन मालीकोन लाडी युसूफ साते सुवनेन कोशिष कोरती होती, बाकून युसूफ परमेश्वरोन विरुद्ध पाप कोरणेसी मना कोर देदू. ची रीस्वाय गोयी एने युसूफ पोर झुटू गुणु लागाडी, एरेन कोरता तिनाकाजे धोर लेदा एने जेलमा नाख देदा. बाकीन परमेश्वर युसूफ साते जेलमा बी विस्वास योग्य रोयू एने परमेश्वर युसूफ काजे आशिष आप्यू .

दुय साल जात रोया, युसूफ निरदोष होयने बावजुद जेलमा होतु. एक राती, फिरोन जू मिस्रोन राजा होतु, सोपनो देख्यू जो तीनाक घोनो चिंताम पाळ देद्लो होतो. हेरा जा सोला आपने वावा काजे बी नि मालूम होतो कि सोपनान मतलब काय से.

परमेश्वर युसूफ काजे सोपनान मतलब कोयनेन ताकत आप्यू, एरेन कोरता फोरोन युसूफ काजे जेलमा गोथू हेरेनचा बुलाव्यू. युसूफ तीना सोपनान मतलब कोयू, “परमेश्वर सात साल वारू पाकसे एने तेरे बादमा सात साल काव पोळसे.”

फिरोन युसूफसी अतरू खुशु होयू कि चू तिना मिस्र देसोन ताकतवावु माणूस कोरीन नेवाळ देदू.

युसूफ मानसोसी वारला फोवोन सात सालोमा घोणा सोवटा खानेन चिचे जमा कोरने कोरीन कोयू. जेतार सात साल बादमा सात सालोन काव पोड्यू तेतार युसूफ चो खानेन चेजे मानसोकाजे वेच्यू काहाकी तिंदरे जुव खानेन कोरता पुरती होये.

चू काव निस्तू मिस्रमा नि होतु बाकीन कनानमा बी घनु होतु जा याकुब एने तेरो परिवार रोयता होता.

एरेन कोरता याकुब तेरा मोटला पुऱ्या काजे खानो लेने मिस्रमा मुकाल्यु. जेतार चे खानो लेनेन कोरता युसूफ ओगोव आवीन उबरोया ती चे तेरा भाष युसूफ काजे नि उवख्या. बाकून युसूफ तीनुक यवखी लेदू.

यो पारोख कोरनेन बादमा कि चे सुदरी गोया कि तोसात छे यो मालूम कोरीन युसूफ तीनु काजे कोयू कि, “ मे तुमरू भाश युसूफ छे, बिहूमा. जेतार तुमु मेसेक दासोन रूपमा वेच देदला तेतार तुमु भुंडलो कोरनेन ठेराव लेदाला, बाकून परमेश्वर तिनी बुराई काजे भलाईन कोरता वापर कोऱ्यू, आवू एने मिस्रमा रोयू काहाकी मे तुमरे एने तुमरा परिवार जुगु खानेन पुरती कोर सको.”

जेतार चे पोछा तिंदरे घोर कनानमा आया एने तिंदरा बास काजे कोया कि युसूफ हिमी बी जीवतलु से ती चू घोणु खुश होयू.

याकुब डायु होय रोयू होतु बाकीन तीबी चू मिस्र देसमा तेरा परिवार साते जात रोयू, एने चे चा रोय्ने बाज गोया. याकुबोन मोरनेन पेहेल, चू हेर पुऱ्या काजे आशिष आप्यू.

जू वायदू अब्राहम काजे परमेश्वर कोऱ्यू चू इसहाक पोर ओवतेन तेरे बादमा याकुब पोर एने तेरे बादमा याकुबोन बारा पुऱ्यापोर एने तिंदरे परिवारपोर आव लागी. एने चे बारा पुऱ्या इस्राइलोन बारा गोत्र बन गोया.