9. परमेश्वरोन मुसा काजे बुलावनो

युसूफोन मोरनेन बादमा, हेरो आखो परिवार मिस्रमा रोयता होता. होया एने हेरे पुऱ्या घोणा साल मिस्रमा रोया, एने घोणा सोवटा पुऱ्या होया एने चे इस्राइल कोवाया.

गोणा सोवटा साल बादमा इस्राईली माणसे वाळ गोया एने युसेफ कोरलु चे कामे मिस्री माणसे विसरी गोयला एने हिमी तीनुक इस्राईल मानसोन बिक लागणे बाज गोयली काहाकी चे वाळने बाज गोयला. तिने टेमे मिस्र पो राज कोरणे वावु फिरोन इस्राईल मानसोकाजे गुलाम बोनाव लेदुलू.

मिस्री माणसे इस्राईली मानसोक मोटला-मोटला बोंगला बांदने एने गाव बोसाडणे कोरीन काम कोराव्या, एने इना कामोसी तीनुकाजे घोनी तकलिप होई, बाकून परमेश्वर तीनुकाजे आशिषित कोऱ्यू एने ओवी पुऱ्या आप्यू.

फिरोन देख्यू कि इस्राईल काजे घोणा पुऱ्या होयने बाज रोया कोरीन चू इस्राईलोन पुऱ्याक मारीन नील नोदिमा नाखनेन आग्या आप्यू.

एक इस्राईल बायोर एक पुऱ्याक जन्मो आपी एने ठुलाक दाहळा हेर आसी बासा डूकाळीन राख्या.

जेतार हेरा आसी बासा जादा दाहळा डूकाळ नि सोक्या तेतार चे तिना काजे वाचाळने कोरीन नील नोंदीमा एक तोरेंगन्या टूपला मेकीन नील नोंदिमा वोयाळ देदा, एने हेरी बोहनिस हिनाक देखती होती कि हेरो काय होयसे.

फिरोनोन पुराय ची टूपली उगाडीन देखी, एने जेतार ची पुऱ्याक देखी ती ची तेरो पुऱ्यू बोनाव लेदी. ची तिना पुऱ्याक दुध पिवाळने कोरीन एक इस्राईली बायोर काजे बुलावी, एने ची तिना पुऱ्यान आश होती, बाकीन कुदाकाजे मालूम नि होतो कि होई हेरी आश छे. जेतार चो पुऱ्यो मोटो होयो ती ची फिरोनोन पुराय काजे आप देदी एने ची तेरो नाव मुसा मेकी.

एक दाहळू मुसा मोटू होय गोयू तेतार एक मिस्री माणूस यहुदी माणूस काजे देतलू देख्यू, एने मुसा तिना यहुदी इस्राइली काजे वाचाड्नेन कोशीस कोरतू होतु.

मुसा तिना मिस्री काजे मार देदू यो सोमजीन कि हिनाक कुदू नि देखतो एने तिनाक धुवामा गाळ देदू, बाकीन मुसा काजे कुदू तोरी देख लेडलो होतो.

जीन टेमे फिरोन यो सोम्व्यू कि मुसा मिस्री माणूस काजे मार देदू ती फिरोन मुसाकाजे मारनेन कोशिष कोऱ्यू, एने तिंदरे सी वाचनेन कोरीन मुसा बोयळा ढास गोयू.

ओवतेन मुसा मिस्र देसमा गोथू घोणु नाम्बे होतु एने चा सारीक चू बुकळा चारतू होतु. एने चा सारीक मुसा एक पुराय साते वियाव कोऱ्यू.

एक दाहळू गाडरा चारतू होतु, तेतार मुसा एक झाड काजे धोपतेलु देख्यू बाकून धोपीन रुखळू होयतलु नि देख्यू, धोपतेलो देखने कोरीन मुसा साते गोयू एने एक आवाज काजे सोमव्यू, “तू तारा पायोन चाट्या काड काहाकी तू चुखला जागापोर उबरोय रोयू.”

परमेश्वर कोयू, “मे मारा मानसोन दुख काजे देखलु से, एने मे तुसेकाजे मिस्र देसमा जा मारा माणसे फिरोनोन गुलामिमा से तीनुक सुळोवने कोरीन मुकेलन्यू छे, एने मे तीनुक कनान देस आपन्यू छे, जो मे अब्राहम, इसहाक, एने याकुब काजे वायदू कोरलूसे.”

मुसा कोयू, “अगर माणसे मेसेक पुछ्से कि तुसेक कुन मुकेललो से ती मे काय कोयीश?” परमेश्वर कोयू, “मे से चू से, तीनुकाजे कोय कि मे छे चू मुकली रोयू, तीनुकाजे यो बी कोय कि मे तुमरा डाह-डाहान मतलब अब्राहम, इसहाक, एने याकुबोन परमेश्वर से, एने योत मारो कायमोन नाव छे.

मुसा गोनू बीह गोयू एने फिरोनोनचा जाणे मोना कोरणे बाज गोयू, काहाकी तीनाक वारूस बुल्ता नि आवोळतो होतो, एरेन कोरता मुसा हेरा भाश हारून काजे मोदत कोरणे कोरता मुकल्यू. मुसाक एने हारून काजे परमेश्वर पेह्लुत कोय देद्ळू कि फिरोन डाहवाय कोरसे.