10. पिळा

परमेश्वर मुसा एने हारून काजे चेतावनी आप्यू कि फिरोन एक हेट्यु होय जासे. जेतार चे फिरोनोनचा गोया ती चे कोया, “इस्राइलोन परमेश्वर ओसू कोये कि, ‘मारा मानसोकाजे जाणे दे,’” बाकून फिरोन तिंदरी नि सोमव्यु एने इस्राईली काजे आजाद कोरनेन जागे चू तीनुक ओवी बी जादा कठीन काम कोरनेन कोरता मजबूर कोऱ्यू.

फिरोन तीनुकाजे मुकलनेन कोरता लगातार मना कोरतू रोयू, एरे वजहसी परमेश्वर मिस्रपोर दस घोणा मोटा पिळा मुकल्यू. इना पिळाम गोथू परमेश्वर फिरोन काजे देखाड्यू कि फिरोनोन एने मिस्रन देवो गोठा जादा ताकतवावु से.

परमेश्वर नील नदी काजे लुय बोनाव देदू, तेबी फिरोन इस्राईल मानसोकाजे नि जाणे देदू.

परमेश्वर मिस्रमा डेटका मुकल्यू. फिरोन मुसासी विनंती कोऱ्यू कि डेटका छेटा कोर देय. एने मुसा तीनुक छेटा कोऱ्यू बाकून तेबी फिरोन तेरा मोन काजे कोठोर कोर लेदू एने इस्राईल जाणे नि देदू.

एरेन कोरता परमेश्वर मोखळान पिळा काजे मुकल्यू, तेरे बादमा डाँसों पिळाक मुकल्यू. ओवते फिरोन मुसा काजे एने हारून काजे बुलाव्यो एने कोयू कि अगर यी पिळा काजे रुक देसू ती इस्राईली मिस्रकाजे छुडीन जाय सोकतला. तेरे बादमा मुसा प्रार्थना कोऱ्यू कि मिस्रमा गोथू यी पिळा रुक जाय एने ची रुक गयी, बाकून फिरोन पोछू तेरा मोनोकाजे कोठोर कोर लेदू एने मानसोकाजे जाणे नि देदू.

तेरे बादमा मिस्र मायला आखा पावणे वावा जानवोरो काजे बिमार पाडीन मोरने देदू, बाकून तेबी फिरोनोन मोन कोठोर होय गोय्लो होतो एने चू इस्राइल काजे जाणे नि देदू.

तेतार परमेश्वर मुसा काजे फिरोनोन सामने रुखळू नाखने कोयू, एने जेतार चू तोसु कोऱ्यू तेतार मिस्र मायला मानसोपोर मोटला फुळा निकव्या, बाकून इस्राईल मानसोकाजे काय नि होयो. परमेश्वर फिरोनोन मोन काजे ओवी वातळू कोर देदू एने फिरोन इस्राईल काजे जाणे नी देदू.

तेरे बादमा, परमेश्वर बोरफो पाड्यू एने मिस्र मायला जादात खेतो मायला बीज काजे नाश कोऱ्यू एने जू कुदू बारथे निकव्या तीनुक मार नाख्यू. फिरोन ओवी हारून काजे एने मुसा काजे बुलाव्यू एने कोयू, “मे पाप कोरलु से, तुमु जाय सोकतला.” आखिर मुसा प्रार्थना कोऱ्यू, एने वादवाम गोठा बोरफो पोडणे बंद होय गोयो.

बाकून फिरोन पोछू पाप कोऱ्यू एने तेरा मोन काजे कोठोर कोऱ्यू, एने चू इस्राईली काजे जाणे सी रुक देदू.

एने ओवते ओवी परमेश्वर मिस्र पोर टिड्यान तुवा काजे आवने देदू, एने या टिड्या रोयला बीज काजे खाय गोया जीणूक बोरफो नाश नि कोर सोक्यो.

ओवतेन परमेश्वर मिस्रमा तीन दाहळा तोक आन्दारो कोर देदू, यो ओत्रो आन्दारो होतो कि मिस्री माणसे तिंदरा घोरोमा गोथा नि निकव सोक्या. बाकून जा इस्राईली माणसे रोयता होता चा विजावो होतो.

इना नोव पिळान बादमा बी फिरोन इस्राईलोन मानसोकाजे जाणे नि देदू, काहाकी फिरोन नि सोमव्यु एरेन कोरता परमेश्वर एक आखरी पिळा मुकलनेन योजना बोनाव्यू. एने यो फिरोनोन मोन काजे बोदल देसे