11. तिहीवार

परमेश्वर मुसा काजे एने हारून काजे फिरोनोनचा यो कोयने कोरीन मुकल्यू कि इस्राईलोन मानसोकाजे जाने दे. चे तीनाकाजे चेतावनी आप्या कि अगर चू तीनुकाजे नि जाने देय, ती परमेश्वर मिस्र देस मायला मानसोन एने जानवोरोन पेहेला पुऱ्या मोर जासे. फिरोन यो सोमविन बी परमेश्वर पोर भूरसू नि कोऱ्यू एने तेरी वात माननेसी मोना कोर देदू.

परमेश्वरपोर भूरसू कोरनेवावान पेहला पुऱ्या वाचाळनेन उपाय कोऱ्यू. हेर परिवार काजे चुखला गाडराक मारनो होतो.

परमेश्वर इस्राईली काजे तिना गाडरान लुय काजे गोरोन झोपले लागाडणे कोयू. एने तीनुकाजे तेरो मास काजे भुंजनो होतो एने एने ओवतेन बिना खामिरोन रुटा साते खानो होतो. चू तिना खाना काजे खानेन बादमा तीनुकाजे मिस्र काजे छुळनेन कोरता तीयार रोयने कोयू.

जोसू परमेश्वर इस्राईलोन मानसोकाजे कोरणे कोयलु तोसा चे आखो कोरला, एने आरदी राती परमेश्वर हेर एक मिस्रीन पेहेला पुऱ्याक मारतू जाईन मिस्र देसोमाईन गोयू.

इस्राईलोन हर एक घोरोन झोपला पोर लुय लागाळला होता, एरेन कोरता परमेश्वर चे घोरे छुळ देदू. तिना गाडरान लुयसी इस्राईली माणसे आखा वाच गोया.

बाकून इस्राईली माणसे भुरसू नि कोऱ्या एने परमेश्वरोन वात नि सोमव्या. एरेन कोरता परमेश्वर तिंदरा घोरो काजे नि छुड्यू परमेश्वर मिस्र मायला हर एकोण पेहला पुऱ्या काजे मार देदू.

जेल मायलान पेहला पुऱ्या सी लागाडीन ती फिरोनोन पेहेला पुऱ्या तोक हर एकोण पेहला पुऱ्याक मोर गोया. इना दुखमा मिस्री माणसे घोणा रोळता होता, एने दुखी होयता होता.

तिने राती फिरोन मुसाक एने हारून काजे बुलावीन कोयू, “इस्राईलोन मानसोकाजे लीन हिंताव निकविन जात रोय.” मिस्री माणसे बी इस्राईलोन मानसो काजे जाणेन विनंती कोऱ्या.