12. निर्गमोन

इस्राईली माणसे मिस्रमा गोथा निकविन घोणा खुश होता. चे हिमी गुलामीमा नि होता, एने चे वायदान देसमा जाता होता. जो काय इस्राईलोन माणसे मिस्री मानसो जु मांग्या चो चे आप देदा, या तोक कि चे सोनो, चांदी एने मोहोंगला चीजे बी मांग लेदा. दिसरा देसोन काही माणसे परमेश्वर पोर भुरसू कोऱ्या एने जीन टेमे इस्राईलीन मानसो साते चे बी निकविन आवती रोया.

दिसू दिसू चू वादवो बोनीन मोटलु खांबू बोनीन तिंदरे ओगोव ओगोव चालतु होतु. एने रातीन टेमे चू आगठान विजावो बोन जातलु. जू परमेश्वर वादवामा एने आग्ठ्ठामा होतु. होमेशा तिंदरे साते होतु, एने जाणेन टेमे तिंदरी अगवाई कोऱ्यू, एने तीनुक ओतरो कोरनो होतो कि तिंदरे पोछोव चाले.

थूलाक टेमोन बादमा फिरोन एने तेरा माणसे हेरा मोन काजे बोदलाव लेदू एने चू पोछु इस्राईल काजे गुलाम बोनावने कोर लेदू. एरेन कोरता चे इस्राईलोन पीछ्या कोऱ्या. परमेश्वर तिंदरा मोन काजे बोदलावलू होतु. यो एरेन कोरता कोऱ्यू कि परमेश्वर देखाडनी चाह्तु होतु कि फिरोन एने मिस्रीन भोगवानो गोथू योहोवा परमेश्वर मोटू एने ताकत वावु छे.

जेतार इस्राईल माणसे मिस्र देसोन सेना काजे आवतला देख्या ती मालूम होयो कि चे फिरोनोन सेना से एने होया लाल दोरीयान इचमा फोस गोयला छे. चे गोणा बिह गोयला एने रोडने बाज गोया एने कोयने बाज गोया, “आपणु मिस्र काजे काहा छूळ देदला? आपु मोरन्या छे.”

मुसा इस्राईली काजे कोयू, “बिहने बोंद कोरु, परमेश्वर आज तुमेरेन कोरता लोळासे एने तुमुक वाचाळ से.” तेतार परमेश्वर मुसा क्काजे कोयू, “इनू मानसो काजे लाल दोरीया वोखे जाणे कोरीन कोय.”

तेतार परमेश्वर वादवान खांबा काजे इस्राईलोन एने मिस्रीन इचमा उबराक देदू, काहाकि मिस्री माणसे इस्राईल काजे देखनो नि जुवे.

ओवतेन परमेश्वर मुसा काजे दोरीया वोखे हात ओगु कोरणे कोरीन कोयू. ओवतेन परमेश्वर पाणी काजे ओलोग कोऱ्यू एने पानिमा एक वाट बोनाव देदू.

ओवतेन इस्राईलोन माणसे तिने वाटे गोथा ओग बोळ्या.

ओवतेन परमेश्वर तिना वादावान खांबा काजे चूट लेदू काहाकी मिस्री माणसे इस्राईल काजे जातला देख लेये. एने मिस्री माणसे तीनुक धोरणे कोरीन फेसलू कोऱ्या.

आखिर चे दोरीयान लारे इस्राईलोन पीछा कोऱ्या बाकून परमेश्वर मिस्री काजे बिहाळ देदू एने तिंदरा रथो काजे आटकाळ देदू, एने चे आयोळने बाज गोया, “ढासू काहाकी इस्राईलोन कोरता परमेश्वर लोळायने बाज रोयू.”

आखा इस्राईली माणसे दोरीयान पोल धोळे पुग गोया तेतार परमेश्वर मुसा काजे कोयू कि पोछू पाणी वोखे हाथ ओगु कोरे. जेतार मुसा तोसु कोऱ्यू, ती दोरोयान पाणी मिस्री सेनापोर आव लाग्या एने चो पाणी पेहेलेन तोसो होय गोयो एने आखा मिस्री माणसे डूब गोया.

जेतार इस्राईली माणसे देख्या कि मिस्री माणसे मोर गोया ती चे परमेश्वर पोर भुरसू कोऱ्या एने भूरसू कोऱ्या कि मुसा परमेश्वरोनचा गोथू भविष्य कोरता से.

इस्राईली माणसे घोणा खुश होता काहाकी परमेश्वर तीनुकाजे मोरने सी एने गुलाम होयनेसी वाचाळ लेदलु होतु. हिमी चे परमेश्वरोन आराधना कोरणे एने तेरी आग्या मानने कोरीन आजाद होता. एने इनी आजादोन तिहीवार मोनावने एने परमेश्वरोन बोढाई कोरणे कोरता चे गीते गावणे बाजे गोया काहाकी परमेश्वर तीनुकाजे मिस्रीन हातोम गोटू वाचाळ लेद्लू होतु.

परमेश्वर इस्राईल काजे एक तीवार मोनावने कोरीन कोयू काहाकी चे तिहीवार मोनावे ती फोम कोरे कि परमेश्वर कोसू मिस्री काजे हाराव्यू एने गीलाम होयनेसी वाचाळ्या एने आजाद कोऱ्यू. एने यो तिहीवार वोलांडोनोन तिहीवार कोवायतू होतु. एने इनामा तिहीवार मोनावने कोरता एक चुखलो गाडरान बोली चोळावने होता, एने भुंजनो होतो, एने तीनाक बिना खमिरोन रुटा साते खानो होतो.