13. इस्राईल साते परमेश्वरो वायदू

लाल दोरीयू पार कोरनेन बादमा परमेश्वर इस्राईल काजे बोयळामाईन सिनाई बोयळानचा लीन गोयू, एने यु बोयळू चू होतु जू मुसा काजे धोपतलु झाड देखायलु होतु. ओवतेन चे तिना बोयळान नेचा तोम्बा काजे उबराख्या.

परमेश्वर मुसा काजे एने इस्राईलोन मानसो काजे कोयू, “तुमुकाजे हमेशा मारी वात काजे माननो पोळसे एने जू वायदू मे तुमरे साते बांधो चू बोनावला राखजू, अगोर तुमु ओसा कोर्सू ती तुमु मारा पुरस्कार मोहेंगलो धोन, याजकोन राज एने एक पवित्र जाती ठेरावीस.”

परमेश्वरोन लारे माणसे परमेश्वरोनचा आवनेन कोरता चे तीन दाहळा तीयारी कोरता होता. तेतार परमेश्वर सिनाई बोयळान छेंडी नेचू उतऱ्यू, जेतार चू आव्यू ती भूकंप होयू, विजवी पोळी, धुवाळू निकव्यू, फेपाऱ्यान मोटूत आवाज आव्यू, तेतार मुसा बोयळा उपर चोळ गोयू.

तेतार परमेश्वर मानसोन साते वायदू कोऱ्यू. चू कोयू, “मे तुमरु परमेश्वर, योहोवा छे, मे छे जू तुमुक मिस्रीन गुलामी मा गोथू छुळाविन लावलू. ती दिसरा देवोन आराधना घोन कोरता.”

मुर्त्या घोन बोनावता एने तेरी पूजा घोन कोरता, काहाकी मे योहोवा तुमरुत एकमात्र परमेश्वर छे. अनुचित रीतीसी मारो नावोन वापोर घोन कोरता, दितवारोन दाहळू पवित्र माननेन फोम राकजू. छोव दाहळा आखो काम कोरु बाकून सातवे दाहळे आराम कोरणे एने मारी फोम कोरनेन दाहळू छे.”

तुमरा आसी बासान आदर कोरजू, खून घोन कोरता, व्यभिचार घोन कोरता, एने सातेवावान लाडी, नि ते तिंदरा घोरोन नि ते सोमानोन लालुच घोन कोरता.

तेतार परमेश्वर मुसा काजे दस आग्या काजे दोगळान पाटीपोर लीखीन आप देदू. परमेश्वर मानसो जुगु ओसला ओवी घोणा सोवटा नियोमे आप्यू परमेश्वर वायदू कोऱ्यू कि अगोर चे परमेश्वरोन आग्या काजे मानसु तेतार तीनु काजे आशिष आपसे एने तीनुक सोमावसे. एने अगोर चे नियोम नि पाळे तेतार तीनुकाजे दोंड आपसे.

परमेश्वर इस्राईल काजे एक मोटीत तंबू बोनावने कोरीन कोयू, (भेट कोरनेन तंबू ). एने चू वारू रीतीसी कोयू कि इना तंबू काजे कोसा बोनावनो से, एने तेरे माहीमा काय मेकनो से यो बी कोयू. एने चू तीनुकाजे तंबू काजे दुय भाग कोरनेन कोरता एक मोटलु पोरदा काजे बोनावने कोरीन कोयू. काहाकी परमेश्वर पोछला भागमा आवीन रोये. जा परमेश्वर रोयतू होतु चा निस्ता पुढारी माणसे जाय सोकता होता.

तीनु मानसोनुक एक भेटाळनेन तंबू ओगोव एक वेदी बोनावनो पोळसे. कुदू बी परमेश्वरोन नियोमोन अवज्ञा कोरे तीनाक तिनी वेदी पोर एक जानवोरोन बोली कोरसे एने तिनी वेदी काजे परमेश्वर कोरता बोलीन रूपमा धोपाळसे. परमेश्वर कोयू कि इना जानवोरोन लुय मानसोन पापो काजे डूकाळ लेसे. इना रीतीसी, हिमी परमेश्वर तिना पाप काजे नि देखे. चू माणूस देवोन नोजोरमा चुखलू गीनायसे. परमेश्वर मुसान भाश हारून एने हारुनोन पिढी काजे याजोक होयनेन कोरता नेवाळयु.

चे माणसे परमेश्वरन आपला नियोमोन पालोन कोरनेन कोरता तीयार होया, एने चे परमेश्वरोन माणसे होयने कोरता एने तेरी आराधना कोरणे कोरता राजी होया.

घोणा दाहळा तोक, मुसा सिनाई बोयळान चोटीपोर रोयू. चू परमेश्वरसी वाते कोरतू होतु. बाकून माणसे मुसान पोछो आवणेन वाट जुवता- जुवता थाक गोयला होता. एरेन कोरता चे हारुनोनचा सोनो लीन आव्या एने एक मूर्ती बोनावने कोरीन कोया काहाकी चे परमेश्वरोन जागे तिनी मूर्तीन पूजा कोर सोके. इना रीतीसी घोणा भयंकोर रीतीसी चे परमेश्वरोन विरुद्ध पाप कोऱ्या.

हारून तिना सोनान एक वाछोळान आकारमा सोनान मूर्ती बोनाव्यू. चे माणसे तिनी मूर्तीन पूजा कोरणे चालू कोर देदा एने बोली बी चोळाव्या. एने इना पापोन वोजोहसी परमेश्वर घोनु रीसवायू. चू तीनुक नाश कोरने कोरतू होतु, बाकून मुसा तीनुक नि मारनेन विनंती कोऱ्यू. परमेश्वर मुसान विनंती काजे सोम्व्यू एने तीनुक नि माऱ्यू.

तेरेबादमा मुसा सिनाई बोयळा पोर गोथू नेचू उतऱ्यू, चू दोगळान दुय पाट्या पोर दस आग्या लीन आव्यू जे परमेश्वर आपलू होतु. ओवतेन चू तिनी मूर्ती काजे देख्यू, एने घोणु रीसवायू कि चू तीनु दोगळान पाट्याक चूर-

ओवतेन मुसा तिनी मूर्ती काजे पिसीन तेरो भूरदो बोनाव देदू एने तिना भूरदा काजे पाणी घुवीन तीनु मानसो काजे पीवाळ देदू. परमेश्वर तीनु मानसोपोर एक पिळा मुकल्यू जिनासी घोणा सोवटा माणसे मोर गोया.

जिना दोगळान पाट्या काजे मुसा तुळ देदलु तिंदरु जागू लेणे कोरीन मुसा दस आग्यान दोगळा सार्कू नोवला पाट्या बोनाव्यू. ओवते ओवी मुसा सिनाई बोयळापोर चोळ गोयू एने प्रार्थना कोऱ्यू कि, परमेश्वर तीनु मानसो काजे माफ कोर, एने परमेश्वर मुसान सोमव्यू एने तीनुक माफ कोर देदू. एने नोवली पाट्यापोर दस आग्या काजे लीन मुसा बोयळा पोर गोथू नेचू उतऱ्यू. एने चा दोखू परमेश्वर वायदानदेस तोक इस्राईलोन अगवाई कोऱ्यू.