14. बोयळामा भोटेकनो

परमेश्वर इस्राईल मानसोकाजे नियोम कोयने बोंद कोऱ्यू, जीणूक हिंदरेसी बांधला परमेश्वरोन वायदान वोजेसी नियोमोन पालोन कोरनो होतो. ओवते चू सिनाई बोयळानचा गोथू ओगु अगवाई कोऱ्यू. चू तीनुकाजे वायदान देसमा लीजाने चाहतू होतु. यो देस कोनान देस बी कोवायतो होतो. परमेश्वर वादवान खांबू बोनीन तिंदरे ओगोव ओगोव चाल्यू एने चे तेरे पोछोव पोछोव चालता रोया.

परमेश्वर अब्राहम, इसहाक एने याकुब काजे वायदू आपलु कि वायदान चू देस तिंदरे पिढी काजे आपीस, बाकून तिने टेमे चा सारीक घोणा सोवटा जाती माणसे रोयता होता, एने चे कनान कोवायता होता. ये कोनानी माणसे परमेश्वरोन आराधना नि कोरता होता एने तेरी आग्या काजे नि मानता होता. चे झुटा देवोन आराधना कोरता होताएने घोणा भुंडला कामे कोरता होता.

परमेश्वर इस्राईल मानसो काजे कोयू, “जेतार तुमु वायदान देसमा जासू ती आखा कनानीसी छुटकारू ली लेजू. तेंदरे साते सोंगती घोन कोरता एने वियाव बी घोन कोरता. तुमु हिंदरा आखा मुर्त्या काजे नाश कोर देजू, ओगोर तुमु मारी आग्या काजे नि माने ती तुमु बी तिंदरा देवोन आराधना कोरणे बाज जासू.”

जेतार इस्राईल कनान देसोन सीमापोर पुग्या, मुसा इस्राईलमा गोथा होर एक जातीन एक-एक कोरीन बारा मानसोकाजे नेवाड्यू. चू तीनुकाजे तिना देसोन भेद जाननेन आदेश आप्यू कि चो देस कोसलो छे. तीनुकाजे कनानीन बी खोबोर लेनो होतो कि चे ताकतवावा छे कि नि होय.

चे बारा माणसे चावीस दाहळा तोक फीऱ्या एने चे पोछा आवती रोया. चे मानसो काजे कोया, “कानान दस उपजावू छे एने बियारू रेट से,” बाकून दस भेद कोरनेवावा कोया, “तिंदरा गावे घोणा वातळा छे एने चे माणसे उचला एने जाडा छे. अगोर आपणु तिंदरे पोर हमलू कोरजे, ती साचलीन चे आपणूक हाराव देसे एने आपणूक मार देसे.”

कालेब एने योहोशू एने दिसरा दुय भाशे साटात कोया, “यो साचलीन छे कि कनानोन माणसे उचला एने ताकतवावा छे, बाकून छाचलीन आपणु तीनुक हाराव सोकतला, परमेश्वर आपनेन कोरता लोळायसे.”

बाकून माणसे कालेबोन एने योहोशून नि सोमव्या. चे मुसा एने हारून पोर रीसवाय गोया एने कोया, “ तु आमुक इना भयानक जागामा काहा लाव रोयू? आमुक मिस्रमात रोयनो होतो. अगोर आपणु हीना देसमा जासू ती लोळायमा मोर जासू, एने कणांनी माणसे आपणा बायराकएने पुऱ्याक गुलाम बोनाव लेसे.” चे माणसे तीनुकाजे पोछा मिस्रमा लीजानेन कोरता एक नोवला ओगवाक नेवाळने चाहता होता.

जेतार चे माणसे ओसा कोऱ्या ती परमेश्वर घोणु रीसवायू. एने चू मेवावनेन तंबूमा आव्यू एने कोयू, “तुमु मार विरुद्ध पाप कोरला छे, एरेन कोरता तुमु आखा काजे इना बोयळामा भोटेकनो पोळसे. हर एक जोन्जे वीस सालोन एने तेरे गोथा जादा से चे मोर जासे एने चे कोबी नि तिना देसमा नि जाय सोके जो मे तुमुक आपलु छे. निस्ता काळेब एने योहोशू जाय सोकसे.”

जेतार चे माणसे परमेश्वरोन यी वात सोमव्या ती चे घोणा दुखी होया काहाकी चे पाप कोरला होता. एरेन कोरता चे कनान देस पोर होमलू कोरनेन फेसलू लेदा. मुसा तीनुकाजे नि जाणे कोरीन चेतावनी आप्यू काहाकी परमेश्वर तिंदरे साते नि जाय, बाकून चे नि सोमव्या.

परमेश्वर तिनी लोळायमा तिंदरे साते नि गोयू, एरेन कोरता चे हार गोया एने तिंदरे माईन घोणा सोवटा मोर गोयला होता. तेतार इस्राईल माणसे कनान गोथा पोछा आवती रोया एने ओवतेन चावीस साल तोक चे बोयळामा भोटोकता रोया.

जीन टेमे इस्राईल माणसे बोयळामा भोटोकता होता तिने टेमे परमेश्वर चावीस साल तोक तिंदरी गोरजा काजे पुरा कोरतू होतु. तीनुक सोरगोम गोथू “मन्ना” कोवायने वावा रुटा आप्यू. ढीक कोरने वावन भीळ काजे बी तिनी छावनीमा मुकल्या ताकि तिंदरेन कोरता खाणे कोरीन मास रोये. तिना पुरा टेमोमा, परमेश्वर तिंदरा डोगला एने चाट्या फाटने नि देदू.

या तोक कि परमेश्वर तिंदरेन कोरता दोगळाम गोथू पाणी निकाव्यू. बाकून ओतरो कोरनेन बादमा बी इस्राईलोन माणसे परमेश्वरोन विरुद्ध एने मुसान विरुद्ध सिकायत कोऱ्या एने कुळकुळ कोऱ्या. तीबी, परमेश्वर विस्वास योग्य रोयू. चू जो वायदू कोरलू होतु कि चू अब्राहम, इसहाक, एने याकुबोन पिढीन कोरता कोरसे एने चू चो कोऱ्यू.

एक ओवी ओसी टेम आवी कि तिंदरे जू पाणी नि होतो, परमेश्वर मुसा काजे कोयू, “चाफऱ्या साते वात कोर, एने तेरेमा गोथो पाणी निकोवसे.” बाकून मुसा चाफऱ्या साते वात नि कोऱ्यू. बाकून चू हेरी लाकळी दुय कावा चाफऱ्या पोर देदू. एना रीतीसी चे परमेश्वर आदोर नि कोऱ्या. चाफऱ्याम गोथा पाणी ते निकवी आव्य, बाकून परमेश्वर मुसासी रीसवाय गोयू. चू कोयू, “तू मारी नि सोमव्यु कोरीन, तू वाय्दान देसमा नि जाय सोके.”

जेतार इस्राईल माणसे चावीस साल तोक बोयळामा भोटकि गोयला, तेतार जे परमेश्वरोन विरुद्ध आवाज उठावला चे आखा मोर गोयला होता. तेतार परमेश्वर तीनुकाजे वायदान देसोन धोळे लीन गोयू. मुसा घोणु डायू होय गोयलू होतु. एरेन कोरता परमेश्वर योहोशू काजे नेवाळयु काहाकी चू तिंदरी अगवाई कोरनेमा मदत कोरे. परमेश्वर मुसासी वायदू कोऱ्यू कि एक दाहळू परमेश्वर मुसान तोसु एक भविष्य कोरता काजे मुकलसे.

तेतार परमेश्वर मुसा काजे एक बोयळा चोटीपोर जाणे कोरीन कोयू ताकि चू तिना वायदान देस काजे देख सोके. मुसा तिना वायदान देस काजे देख्यू बाकून परमेश्वर मुसा काजे तिना देसमा जाणेन कोरता अनुमती नि आप्यू. ओवतेन मुसा मोर गोयू. एने इस्राईल माणसे तीस दाहळा तोक दुख मोनाव्या. ओवतेन योहोशू तिंदरु अगवू बोन्यू, योहोशु एक वारलू अगवू होतु काहाकी चू परमेश्वरपोर भुरसू मेक्तू होतु, तेरी वातो काजे मान्यु.