15. वायदान देस

आखिरमा, हिमी चू टेम आव लागलू छे कि वायदान देस, कनान मा जाय सोके. तिना देसमा येरीहो नावोन एक गाव होतो. तेरी सुरक्षान कोरता चारू धोळे वातळा भीतळा होता. योहोशू दुय भेदी काजे मुकल्यु. तिना गावमा राहाब नावोन एक वैश्या रोरती होती. ची तीनु भेदी काजे दुकाळली, एने ओवतेन ची तीनुकाजे बारथे निकोवनेन कोरता मदत कोरी. ची ओसो एरेन कोरता कोरी काहाकी ची परमेश्वर पोर भुरसू कोरती होती. जीन टेमे इस्राईल माणसे यरीहो काजे नाश कोरसे तेतार चे राहाब एने तेरा परिवारोन राखवावी कोरनेन वायदू कोरलू होतु.

इस्राईल मानसोकाजे वायदान देसमा जाणेन कोरता यरदन नदीक छेकनो होतो. परमेश्वर योहोशू काजे कोयू, “याजक काजे पेहेल जाणे देवू.” जेतार याजक यरदन नदीमा पाय मेकतात पाणी वोयने बोंद होय गोयो, जेरेसी इस्राईल माणसे नोदीन पोल धोळे सुकली जमीन पोर जाय सोके.

चे माणसोन नदीक छेक गोया ती परमेश्वर योहोशू काजे कोयू कि यरीहो पोर हमलू कोरणे कोरीन तीयार रोयू, अगोर चे घोणा ताकद वावो गाव होतो. परमेश्वर तीनु मानसोकाजे कोयू कि तिंदरा याजक काजे एने सैनिक काजे छोव दाहळा तोक तीना गावोन चारू छिमकुर फिरनो से. आखिर चे तोसात कोऱ्या.

तेतार सातवे दाहळे, इस्राईल माणसे तिना गावोन चारू छीमकुर सात कावा ओवी फिऱ्या. तेरेबादमा याजक तिंदरा फेपाऱ्या फुक्या एने सैनिक दुरेत आवाज कोऱ्या.

तेतार यरीहोन चारू धोळेन भितळा पोळ गोया. जोसी परमेश्वर आग्या आप्यू कि इस्राईल माणसे गाव मायली हर एक चीजोन नाश कोर देदला. चे निस्ता राहाबोन एने तेरा परिवार काजे छुळ देदला जे इस्राईल मानसोन भाग बोन गोयला होता. जीन टेमे कनानमा रोयने वावा दिसरा माणसे सोमव्या कि इस्राईल माणसे यरीहो काजे नाश कोर देदा, ती चे बिह गोया कि इस्राईल माणसे तिंदरे पोर बी हमलू कोरसे.

परमेश्वर इस्राईल काजे आग्या आपलु होतु कि कनानमा रोयने वावान कानलीबी जाती साते शान्तिसंधी नि कोरनो होय, बाकून गिबोनियो नावोन एक कनानी जाती माणूस योहोशूसी झूट मेक्यू कि चे कनान वावा नी होय, बाकीन कनान गोथा नाम्बे रोयतला. चे योहोशू काजे विनंती कोऱ्या कि तिंदरे साते शान्तिसंधी कोरे. योहोशू एने दिसरा इस्राईली अगवा परमेश्वरसी नि पुछा कि तीनुकाजे काय कोरनो से, बाकून चे गिबोनिया साते शान्तीसंधी कोर लेदा.

तीन दाहळा बाद इस्राईल काजे मालूम होयो कि गिबोनी माणसे कनान मा रोयता होता. चे घोणा रीसवाय गोया काहाकी गिबोनिया तीनुकाजे धोकू आपला होता. बाकून चे तिंदरे साते जी शान्तिसंधी बोनावला होता ची बोन्ली रोयने देदा काहाकी ची परमेश्वरोन सामने कोरली होती. तेतार थुलिक टेमोबाद कनानमा रोयनेवावा दिसरा जाती, एमोरियोन राजा सोमव्या कि इस्राईल माणसे गिबोनिया साते शान्तिसंधी कोर लेदलासे, एरेन कोरता चे एक एक कोरीन, तिंदरी सेना काजे वाळाव लेदा एने गिबोन पोर हमलू कोर देदा. गीबोनिन माणसे तिंदरी मदतोन कोरता योहोशूनचा एक संदेश मुकल्यू

आखिर योहोशू इस्राईलोन सेनाक एकठा कोऱ्यू एने गिबोनी मानसोनचा पुगनेन कोरीन पुरी रात चाल्या. सोन्दारे वेगात चे एमोरिन सेना काजे चकित कोर देदा एने तिंदरे पोर हमलू कोर देदा.

तिने दाहळे परमेश्वर इस्राईलोन कोरता लोळायु. चू एमोरिया काजे बिहाळ देदू एने चू मोटा मोटा बोरफोन ढेकवा पाड्यू.

परमेश्वर सुरर्या काजे बी एक जागे कोर देदू ताकी इस्राईल काजे पुरतू टेम जूळ जाय कि एमोरि काजे पुरा रीतीसी हाराव देय. तिने दाहळे परमेश्वर इस्राईलोन कोरता घोनी मोटी विजय हासील कोऱ्यू.

जेतार पेमेश्व्र तिनी सेना काजे हारावनेन बादमा, घोणा सोवटा कणांनी जातीन माणसे इस्राईल पोर हमलू कोरणे कोरीन एकठा होया. योहोशू एने इस्राईल तिंदरे पोर होमलू कोरीन तीनुक बी नाश कोर देदा.

इनी लोळाय बाद, परमेश्वर इस्राईलोन हर पुऱ्या काजे तिना वायदान देसमा तीनुकाजे जाणे देदू. तेतार परमेश्वर इस्राईल काजे तिंदरी आखी सीमा पोर शांती आप्यू.

जेतार योहोशु डायु होय गोयू ती चू इस्राईलोन आखा मानसोकाजे एकठू बुलाव्यू. तेतार योहोशू तीनु मानसो काजे फोम कोराव्यू कि चू तिना वायदान पालन कोरनेन कोरता कोयलू होतु जो परमेश्वर सिनाई बोयळा वायदू कोरलु होतु. चे माणसे परमेश्वरोन कोरता विस्वास योग्य रोयने एने तेरा नियोमोपोर चालनेन वायदू कोऱ्या.