46. पौलूस, मसीही विस्वासी बोन जाय

शाउल नावोन एक माणूस होतू जू येसू पोर भूरसू नि कोरतू होतु. जेतार चू जुवान होतु, तेतार चू स्तिफनुस काजे मारणे वावान डोगलान निगराणी कोरलू होतु. बादमा चू विस्वासी काजे वेला पाळावलु होतु. चू यरुशलेममा घर-घर जाईन माणसोक एने बायरा काजे धोरीन जेलमा नाख देदा. तेतार माहायाजक शाउल काजे दमिश्क गावमा जाणेन अनुमती आप्यू. चू चान मसिही काजे धोरने एने तीनुक पोछू यरुशलेममा लावनेन कोरता शूल काजे कोयू.

आखरी, शाउल दमिश्क जाणे चालू कोऱ्यू. तिना गावमा पुगनेन थुलोक पेहेल, तेरा चारू ढोळे वादवाम गोथा एक धोव्वो विजावो चोमक्यो, एने चू धोरती पोर पोळ गोयू. शाउल कुदा काजे कोयतलु सोमव्यु, “हे शाउल, हे शाउल तू मेसेक काहा विताळे?” शाउल पुछू, “हे प्रभू तू कुन छे?” येसू जवाब आप्यू, “मे येसू छे, तू मेसेक वेला पाळाव रोयू.”

जेतार शाउल उठ्यू ती देख नि सोकतु होतु. तेरा दोस्तो तीनाकाजे दमिश्कमा लीन गोया. शाउल तीन दाहळा तोक नि काडू एने नि पाणी पीदू.

दमिश्कमा हनन्याह नावोन एक चेळू होतु. परमेश्वर तिना काके कोयू, “पोला घोरमा जा, जा सारीक शाउल रोय रोयू. तीरा हातो काजे तेरेपोये मेक टाकी चू पोछू देख सोके.” बाकीन हनन्या कोयू, “हे प्रभू, मे सोमोवलू छे कि यु माणूस विस्वासी काजे घोणु वेला पाळावलु छे.” परमेश्वर तीनाकाजे जवाब आप्यू, “जा, मे तिना काजे याहुदिमा एने दिसरा जातीन माणसोमा मारा नावोन प्रचार कोरणेन कोरता नेवाळ लेदलू छे. चू मारा नावोन कोरता घोणु दुख झेलसे.”

आखरी, हनन्या शाउलोनचा गोयू, तेरा हात काजे तेरे उपोर मेक्यू एने कोयू, “येसू, जू या आवनेन तारे वाटे तुसेक भेटलु, मेसेक तारेनचा मुकल्यू टाकी तू पोछू देखणे बाज जाय एने पवित्र आत्मा तुसेक भोर देय.” तेतरूत शाउल देखने बाज गोयू, एने हनन्या तीनाक बाप्तिस्मा आप्यू. तेतार शाउल खानो खादू एने पोछू ताकतवावु होय गोयू.

तेतार गोथू शाउल दमिश्कमा रोयने वावा योहुदिमा प्रचार कोरणे चालू कोर देदू. चू कोयू, “येसुत परमेश्वरोन पुऱ्यू छे,” योहुदी माणसे अचंबित होय गोया, काहाकी शाउल ते विस्वास्या काजे मारनेन कोरतू होतु, बाकीन हिमी चू येसू पोर भूरसू कोरलू होतु. शाउल योहुदी साते जोखळायने बाज गोयू. चू देखाळ्यु कि येसुत मसिह होतु.

घोणा सोवटा दाहळा बादमा, योहुदी माणसे शाउल काजे मारनेन योजना बोनाव्या. चे तीनाक मारणे कोरता गावोन झोपला पोर माणसो काजे मुकल्या, कि तेरी निगराणी कोरे, बाकीन शाउल तिनी वातो काजे सोमवी लेदू एने तेरा दोस्त तिना काजे वाचाळ कोरता मदत कोऱ्या. एक रात चे तिना काजे एक टूपलीमा बोसाळीन गावोन भीतळा पोर गोथा नेचा उतार देदा. दमिश्कमा गोथू वाचीन जाणेन बादमा शाउल येसून बारामा प्रचार कोरणे चालू राख्यू.

शाउल प्रेरितो काजे भेटनेन कोरता यरुशलेम गोयू, बाकीन चे तेरेसी बिहता होता. तेतार बारनाबास नावोन एक विस्वासी शाउल काजे प्रेरितोनचा लीन गोयू. चू तीनुकाजे कोयू कि शाउल कोसू साहसी होयीन दमिश्कमा प्रचार कोऱ्यू. तेरे बादमा प्रेरित माणसे शाउल काजे स्वीकार कोर लेदा.

थुलाक विस्वासी जे यरुशलेमोन सतावसी ढास गोयला चे नांबे अंताकिया गावमा जात रोयला होता एने एने येसून बारामा प्रचार कोरता होता. अंताकियामा रोय्ने वावा माणसे जादातर योहुदी नि होता बाकीन पेहली बार तिंदरेम गोथा घोणा सोवटा माणसे विस्वासी बोन गोयला. बरनाबास एने शाउल इनू नोवला विस्वस्या काजे येसून बारामा ओवी जादा सिकनेन कोरता चा गोया एने मंडव्या काजे वातळा कोऱ्या. येसुपोर भुरसू कोरणे वावा पेहली कावा अंताकियामात मसीही कोवाया.

एक दाहळू अंताकियान मसिह माणसे उपवास मेकीन प्रार्थना कोरता होता. पवित्र आत्मा तीनुक कोयू, “मारेन कोरता बरनाबास एने शाउल काजे तिना कामो काजे कोरणे कोरता मे तीनुक बुलावलु छे.” एरेन कोटा अंताकियान मंडवी बरनाबास एने शाउलोन कोरता प्रार्थनान कोऱ्या. एने तिंदरे पोर हात मेक्या. तेतार चे तीनुकाजे घोणा सोवटा दिसरे जागे येसून बारामा वारली खोबोरन प्रचार कोरनेन कोरता मुकल्या. बरनाबास एने शाउल ओलोग ओलोग जातीन माणसो काजे शिक्षा आप्या. एने घोणा सोवटा माणसे येसुपोर भुरसू कोऱ्या.