45. स्तिफनुस एने फिलिप्पुस

पेहला मसिह अगवान बिचमा स्तिफनुस नावोन एक माणूस होतु. आखा माणसे तेरो आदर कोरता होता. पेवित्र आत्मा तिना काजे घोनि सोवटी ताकत एने बुद्धी आप्यू. स्तिफनुस घोणा सोवटा चमत्कार कोरलू होतु. जेतार चू येसू पोर भुरसू कोरणे शिक्षा आप्यू ती घोणा सोवटा माणसे तेरे पोर भुरसू कोऱ्या.

एक दाहळे, स्तिफनुस येसून बारामा शिक्षा आपतू होतु, एने थुलाक योहुदी माणसे आव्या जे येसुपोर भुरसू नि कोऱ्या एने तेरे साते झोगळायने बाज गोया. चे घोणा रीसवाय गोया, एरेन कोरता चे धोर्मोन अगवानचा गोया एने तेरे बारामा झूट मेक्या. चे कोया, “आमु स्तिफनुस काजे मुसा एने परमेश्वरोन बारामा भुन्डला वाटे कोरतला सोमव्या,” एरेन कोरता एरेन कोरता धार्मिक अगवा स्तिफनुस काजे धोर लेदा एने तीनाकाजे माहायाजक एने योहुदीन दिसरा अगवान सामने लाव्या. ओविबी झुटा गोवा आव्या एने चे स्तिफनुसोन बारामा झूट मेक्या.

माहायाजक स्तिफनुस काजे पुछू, “काय या माणसे तार बारामा छाचलीन कोयने बाज रोया?” स्तिफनुस माहायाजक काजे जवाब आपनेन कोरता घोणा सोवटा वाटे कोय्नेन कोरता चालू कोऱ्यू. चू कोयू कि अब्राहामन टेमोसी, येसून टेमो तोक परमेश्वर इस्राईलोन मानसोन कोरता घोणा मोटा मोटा काम कोरलू होतु. बाकीन माणसे हमेशा परमेश्वरोन आग्या नि मान्या. स्तिफनुस कोयू, “तुमु परमेश्वरोन विरुध एक हेट्या एने लोळाय कोरणे वावा छे. तुमु हमेशा पवित्र आत्मा काजे मना कोऱ्या. जोसा कि आमरा जूनला माणसे हमेशा पवित्र आत्मा काजे मान लेदला होता एने हमेशा तेरा भविष्य कोरता काजे मार देदला होता. बाकीन जो चे कोरला होता तेरी मापोमा तुमु ओवीबी भुंडलो कोरला छे. तुमु मसिह काजे काजे मार देदला.”

जेतार चे धार्मिक अगवा यो सोमव्या, ती चे ओतरा रीसवाय गोया कि चे तीनदारा कांटा काजे बोंद कोर लेदा एने मोटेत आयळ्या. चे स्तिफनुस काजे घोसळीन गावोन बारथे लीन गोया एने तीनाक मार नाखने कोरीन दोगळा देदा.

जेतार स्तिफनुस मोरतू होतु चू आयळ्यु, “हे येसू मारी आत्मा काजे लीले,” तेतार चू तेरा घुटना पोर पोळ्यु एने पोछू कोयू, “हे प्रभू यो पाप इंदरे पोर घोन लागाळे.” तेतार चू मोर गोयू..

तिने दाहळे, यरूशलेममा रोयने वावा घोणा सोवटा माणसे येसू पोछोव चालण्यानुक सतावणे चालू कोऱ्या, एरेन कोरता विस्वासी माणसे दिसरे जागे ढास गोया. बाकीन तेबी, जा का चे गोया चे येसून बारामा प्रचार कोरता गोया.

फिलिप्पुस नावोन एक येसून विस्वासी होतु. जोसा दिसरा विस्वास्या कोरला तोसुत चू बी यरूशलेममा ढास गयलू. चू सामरीन जागामा जात रोयलू. चा चू मानसोमा येसून बारामा प्रचार कोऱ्यू. घोणा सोवटा माणसे येसू पोर भुरसू कोऱ्या एने उद्धार ली लेदा. एक दाहळे, फिलिप्पुसनचा परमेश्वरोनचा गोथू एक सोरगोन दूत आव्यू एने तिना काजे बोयळामा जाणे कोरीन, एने एक सोयळोक पोर चालणे कोरीन कोयू. फिलिप्पुस चा जात रोयू. जेतार चू सोयळोक पोर चालतु होतु, ती चू एक माणूस काजे तेरा रथ पोर जातलू देख्यू. यु माणूस कुश देसोन खास अधिकारी होतु. पवित्र आत्मा फिलिप्पुस काजे कोयू कि जाईन तिना माणसो साते साते चाले.

एरेन कोरता फिलिप्पुस रथनचा गोयू. चू सोमव्यू कि चू कुशी परमेश्वरोन वचन वाचतू होतु, जो यशाया भविष्य कोरतान लारे लीखायलो होतो तीनाक वाचतू होतु. चू वाचतू होतु, “चे तिना मोरने वावा गाडरा सारखा लीन गोया एने जोसो एक गाडरो हुगो होय रोये, चू बी एक बुल बी नि कोयू. चे तेरे साते नि कोरणे जुवे तोसो व्यवहार कोऱ्या एने तेरो आदोर नि कोऱ्या. चे तेरु जीव ली लेदा.”

फिलिप्पुस तिना कुशी काजे पुछू, “जो तू वाच रोयू काय तू तीनाक सोमजे बी?” चू कुशी जवाब आप्यू, “नि. जेतार तोक कुदू मेसेक नि सोमजाळे, तेतार तोक सोमज नि सोकतेलू. दोया कोरीन मारेनचा आवीन बोठ, यशाया हेरे बारामा लिखलु कि दिसरान बारामा?”

फिलिप्पुस रथ पोर चोळीन बोठ गोयू. तेतार चू तिना कुशी माणूस काजे कोयू, जो यशायाह येसून बारामा लिखातु होतु. फिलिप्पुस परमेश्वरोन वचनोन घोणा सोवटा दिसरा भागोन चर्चा कोऱ्या. इना रीतीसी, चू तिना माणसो काजे येसून बारामा वारली खोबोर सोमवाड्यू.

फिलिप्पुस एने चू कुशी चालता जाईन पाणिनचा आव्या. चू कुशी कोयू. “देख न्या पाणी छे, काय मे बाप्तीस्मा ली सोकतेलु?” एने चू सारथी काजे रथ उबराखने कोयू.

आखरी, चे पाणीमा जात रोया, एने फिलिप्पुस तिना कुशी काजे बाप्तिस्मा आप्यू. जेतार चे पानीम गोठा बारथे आव्या ती पवित्र आत्मा अचानक सी फिलिप्पुस काजे चुटीन दिसरे जागे लीन जात रोयू. चा फिलिप्पुस माणसो काजे येसून बारामा कोयनो चालू राख्यू.

चू कुशी तेरा घोरोन वाटे जाणे बाज गोयू. चू खुश होतु कि चू हिमी येसू काजे जंतू होतु.