44. पतरस एने योहान एक भिकारी काजे वारू कोरे

एक दाहळे, पतरस एने योहान मंदिरमा गोया. एक अपंग माणूस भीक मांगनेन कोरता झोपला पोर बोठलु होतु.

पतरस तिना लेंगळा माणसो वोखे देख्यू एने कोयू, “मार पा तुसेक आपने कोरीन पोयशा ते नि होय, बाकीन जो मारे जुव छे चो मे तुसेक आपो. येसून नावसी उठ एने चाल फिर.

मामार, परमेश्वर तिना लेंगळा माणसो काजे वारू कोर देदू. चू इंखुर तिन्खुर चालणो एने कुदणे एने परमेश्वरोन बोढाई कोरणे चालू कोर देदू. मंदिरोन आंगनामा आवला माणसे चाकीत होय गोया.

मामार माणसोन एक भिळ तीना मानसोक देखणेन कोरता आव्या जू वारू होय गोयलू होतु. पतरस तीनुकाजे कोयू, “यु माणूस वारलू छे, बाकीन इनी वात पोर अचंबित घोन होयता. इना काजे आमु आमरा ताकतसी वारू नि कोऱ्या नीती एरेन कोरता कि आमु परमेश्वरोन आदर कोरतला. बाकीन, चू येसू छे जू इना मानसो काजे तेरी ताकतसी वारू कोरलू छे, काहाकी आमु येसूपोर भूरसू कोरतला छे.”

“चा तुमुत छे जे तिना रोमी राज्यपाल काजे येसुक मार नाखनेन कोरीन कोयला होता. तुमु तीनाक मार देदला जू आखाकाजे जीवन आपतलु छे. बाकीन परमेश्वर तीनाकाजे मोतोम गोथू जीवाळ देदुलू छे. तुमु नि सोमज्या कि तुमु काय कोरला होता, बाकीन जेतार तुमु तिना काम काजे कोरता होता, ती जो भविष्य कोरता कोयला होता चो पुरो होयो. चे कोयला होता कि मसिह दुख उठावसे रनर मोर जासे. परमेश्वर इनाकाजे इना रीतीसी होयने देदू. एरेन कोरता हिमी पश्चाताप कोरु एने परमेश्वर वोखे फिरू, टाकी चू तुमरा पापो काजे धुवीन साफ कोर देय.”

जेतार मंदिरोन अगवा पतरस एने योहान काजे सोमव्या, ती चे घोणा बिह गोया. एरेन कोरता चे तीनुकाजे धोर लेदा एने जेलमा नाख देदा. बाकीन जो पतरस कोयलू होतु तीनापोर घोणा सोवटा माणसे भुरसू कोऱ्या. येसू पोर भूरसू कोरणे वावान आकळू लगभग 5000 होय होई.

ओगले दाहळे चे योहुदी अगवा पतरस एने योहान काजे माहायाजक एने दिसरा धोर्मोन अगवान सामने लीन आव्या. चे तिना मानसो काजे बी लाव्या जू अपंग होतु. चे पतरस एने योहान काजे पुछा, “काहना होकसी तुमु इना अपंग माणूस काजे वारू कोऱ्या?”

पतरस जवाब आप्यू, “यु माणूस जू तुमरे सामने उबरोय रोयु, तीनाक येसू मसिहन ताकतन लारे वारू होय गोयू. तुमु येसू काजे ख्रूस पोर चोळाव देदला, बाकीन परमेश्वर तिना काजे जीवतु कोर देद्लू, तुमु तिना काजे मना कोर देदला, बाकीन येसून ताकतोन तोसु उद्धार लेनेन दिसरू वाट नि होय.”

चे अगवा पेरेशान होय रोया होता कि पतरस एने योहान घोनो धीर आपनेवावी वात कोयला होता. चे देख्या कि ये साधारण माणसे होता जे अनपोळ होता. बाकीन पोछो तीनुक फोम आवी कि ये माणसे येसू साते रोयता होता. एरेन कोरता चे तीनुक कोया, “आमु तुमुक मोटीत दोंड आपसू अगर तुमु इनू मानसोन येसून बारामा मानसोकाजे दिसरू ओवी प्रचार कोऱ्या.” ओसा घोणा सोवटा वाटे कोयनेन बादमा चे पतरस एने योहान काजे जाणे देदा.