43. मंडव्यान चालू होयनो

येसून सोरगोमा जानेन बादमा, चेला यरुशलेममात रुकाय गोया जोसो येसू तीनुकाजे कोरनेन कोरता कोयलू होतु. चान विस्वास्या माणसे लगातार एकठा होयीन प्रार्थना कोरनेन कोरता भेवा होया.

होर साल फसह तिहीवारोन 50 दाहळा बादमा योहुदी माणसे पेन्तेकुस्त नावोन एक खास दाहळाक मोनाव्या कोरता होता. पेन्तेकुस्त चू टेम होतु जेतार योहुदी माणसे गोहून काटनि काजे मोनावतला. आखी सांसारोन योहुदी माणसे पेन्तेकुस्तन दाहळे एकठा होयीन यरुशलेममा आवळा होता. इने साल पेन्तेकुस्त मोनावनेन टेम येसून सोरगोम जात रोयनेन एक हाप्ता बादमा आवलु होतु.

जीन टेमे आखा विस्वासी माणसे एक एकठा होया, ती जिना घोरमा चे होता अचानकसी चो घोर वागवासी भोराय गोयो. तेतार आगठान तिनगा सारखो देखायने वावो थूलाक विस्वास्यान मुनका उपोर देखाय पोड्यो. चे आखा पवित्र आत्मासी भोराय गोया एने चे दिसरी भाषामा परमेश्वरोन बोढाई कोरणे बाज गोया. ये चे भाषा होती जीनाक बुलनेन कोरता पवित्र आत्मा बुलनेन कोरता नेवाळलु होतु.

जेतार यरुशलेममा रोय्ने वावा माणसे तिना आवा काजे सोमव्या ती चे एकठा होयीन यो देखने आव्या कि काय होयने बाज रोयो. चे विस्वास्या काजे परमेश्वरोन लारे कोरला मोटला मोटला कामोन घोषणा कोरतळा सोमव्या. चे वाहराय गोया काहाकी चे तीनु कामो काजे तिंदरी भाषामा बुलता होता.

इंदरे माईन थुलाक माणसे कोया कि चे चेला नशामा होता. बाकीन पतरस उबरोयू एने कोयू, “मारी वात सोमवु, ये माणसे नशामा नि होय, बाकीन जो तुमु देखतला चो चोत से जो योएल भविष्य कोरतान लारे कोवायलो होतो कि होयसे; परमेश्वर कोयू, ‘आक्री दाहळामा, मे मारी आत्मा आपीस.’”

“हे इस्राईल माणूस, येसू एक ओसलू माणूस होतु जू यो देखाळनेन कोरता कोऱ्यू कि चू कुन छे, घोणा सोवटा मोटा काम कोरलू होतु. चू परमेश्वरोन ताकतसी घोणा अतभूत कामो काजे कोरलू होतु. यो जाणे काहाकी तुमु इनू कामो काजे देखला छे. बाकीन तुमु तिना काजे ख्रूस पोर चोळाव देदा.”

“येसू मोर गोयू बाकीन परमेश्वर तीनाक मोरलाम गोथू जीवतु कोर देद्लू. यु तिनी वात काजे पुरू कोर देदू जीनाक एक भविष्य कोरता लिखलु होतु. ‘तारा चूखला माणसे काजे मोळवाट्यामा सोळने नि देये.’ आमु गावा छे कि परमेश्वर येसू काजे पोछू जीवतु कोर देदू.”

“परमेश्वर बास हिमी येसू काजे तेरे जेवळे धोळे बोठाळीन तीनाक आदर आप्यू. एने येसू आपनेन कोरता पवित्र आत्मा मुकललु छे जोसा कि चू वायदू कोऱ्यू कि चू मुकलसे. पवित्र आत्मात यो काम होयने डी रोयू जीनाक तुमु देख रोया.”

“तुमु तिना मानसो काजे, येसू काजे ख्रूसपोर चोळाव देदा. बाकीन छाचलीन जान लेवू कि परमेश्वर येसू काजे आखा चीजो पोर प्रभू एने मसिह दुयू ठेरावलु छे. “

पतरसन सोमोवने वावा माणसे तेरे लारे कोयली वाते माही तोक हाल गोयला होता. एरेन कोरता चे पतरस एने चेला काजे पुछा, “हे भाशो, अआमुक काय कोरनो जुवे?”

पतरस तीनुक जवाब आप्यू, “तुमेरे माईन होर एक पापोन कोरता पश्चाताप कोरु ताकी परमेश्वर तुमरा पापो काजे माफ कोरे, एने येसू मसिहन नाव सी बाप्तिस्मा लेवू. तेतार चू तुमुक वरदानोन रूपमा पवित्र आत्मा बी आपसे.

पतरस जो कोयू तेरेपोर लगभग 3000 माणसे भुरसू कोऱ्या एने येसून चेला बोन गोया. चे बाप्तिस्मा लेदा एने यरूशलेमोन मंडवीन हिस्सू बोन गोया.

जेतार प्रेरित तीनुक शिक्षा आप्या ती विस्वासी लगातार सोमव्या. चे हमेशा मेवायता होता एने एकठा खानो खाता होता, एने चे हमेशा एक दिसरान कोरता प्रार्थना कोऱ्या. चे एकठा होयीन परमेश्वरोन स्तुती कोऱ्या एने जो काय तिंदरे जू होतो ची एक दिसरा साते एकठा कोऱ्या. नगरन होर एक माणूस तिंद रेन कोरता वारलू विचार कोरता होता. होर दाहळे, जादासी जादा माणसे विस्वासी बोन्ता होता.