48. येसुत वायदू कोरलू मसिह छे.

जेतार परमेश्वर संसार काजे बोनाव्यू ती आखो काहीन वारू होतो, कानलोत पाप नि होतो. आडाम एने हव्वा एक दिसरा साते मोंग कोरता होता, एने चे परमेश्वर सी मोंग कोरता होता. काही बिमारी या मोट नि होतो. परमेश्वर ओस्लोट संसार चाह्तु होतु.

भुतडू सापोन लारे इचमात बोगीचामा गोथू हव्वा साते वात कोऱ्यू, काहाकी चू तीनिकाजे फोसाळने चाह्तु होतु. तेतार हव्वा एने आदम परमेश्वरोन विरुद्ध पाप कोऱ्या. काहाकी चे पाप कोऱ्या एरेन कोरता धोरती पोर रोय्ने वावा आखात मोरे.

काहाकी आदम एने हवा पाप कोरला होता, एरेन कोरता काहीन ओविबी भून्डो होयो. चे परमेश्वरोन दुश्मोन बोन गोया. जेरो परिणामन रूपमा, तेतार गोथू होर एक जोन पाप कोरला छे. होर एक जोन पोयदायीस परमेश्वरोन दुश्मन छे. परमेश्वर एने माणसोन बीचमा शांती नि होती. बाकीन परमेश्वर शांती लावनेन कोरतू होतु.

परमेश्वर एक वायदू कोऱ्यू कि हव्वान एक पिढी भुतडान मुनका काजे कुचरसे. चू यो बी कोयू कि भुतडू तेरी एडी काजे चावसे. दिसरा शब्दामा भुतडू मसिह काजे मार देसे. बाकीन परमेश्वर पोछू जीवतु कोर देसे. तेरे बादमा मसिह भुतडान ताकत काजे हमेशा खोतोम कोर देसे. घोणा सोवटा साल बाद परमेश्वर प्रकट कोऱ्यू कि चू मसिह छे.

परमेश्वर तिना बाढ सी तेरा परिवार काजे वाचाळ्यु जीआक चू लावणे वावु होतु. तेरे बादमा नूह सी एक ढोंड्यो बोनावनेन कोरता कोयू कि चू इना रीतीसी परमेश्वर माणसो काजे वाचळ्यु जे तेरेपोर भूरसू कोरता होता. इना रीतीसी, चे आखण आखा परमेश्वरोन लारे मार नाखनेन योग्य होता काहाकी चे पाप कोरला होता बाकीन परमेश्वर तीनु आखा काजे वाचाळनेन कोरता येसू काजे मुकल्यू जे तेरे पोर भूरसू कोरे.

घोणा सोवटा साल तोक, पुजारा परमेश्वरोन कोरता बलिदान चोळावता रोया. यो दर्शावतो होतो कि माणसे पाप कोरता होता., एने यो कि चे परमेश्वरोन लारे तीनु काजे दोंड आपनेन योग्य होता. बाकीन बलिदान तिंदरा पापोकाजे क्षमा नि कोर सोकतो होतो. येसू आखान मोटलु माहायाजक छे. चू चो कोऱ्यू जो कुदू पुजारू नि कोर सोकतु होतु. चू एकुत बलिदान होयनेन कोरता खुद काजे आप देदू जू होर एकोण पापो काजे धुव देदू. चू स्वीकार कोऱ्यू कि परमेश्वर तिंदरा आखान पापोन कोरता तीनुक दोंड आपे. इनान कोरता, येसू सिद्ध माहायाजक होतु.

परमेश्वर अब्राहम काजे कोयू, “मे तारे लारे संसारोन आखी जाती काजे आशिष आपीस.” येसू इनी अब्राहमन पीढीन होतु. परमेश्वर अब्राहमन लारे आखा जाती काजे आशिष आपे काहाकी जे येसू पोर भूरसू कोरे परमेश्वर तीनु आखा काजे पापोसी वाचाळे. जेतार ये माणसे येसुपोर भूरसू कोरे, ती परमेश्वर तीनुकाजे अब्राहमन पीढीक मानतला छे.

परमेश्वर अब्राहम काजे कोयू कि चू तेरु लाळकु पुऱ्यू, तेरेन कोरता बलिदान कोर देय. बाकीन ओवतेन परमेश्वर इसाहकोन बोदले बोली कोरनेन कोरता एक गाडरो आप देदू. आपनू आखा आपणा पओन कोरता मोरनेन योग्य होता, बाकीन परमेश्वर आपने जागे मोरनेन कोरता येसू काजे बलिदानोन रूपमा आप्यु. एरे वोजेहसी आपणु येसू काजे परमेश्वरोन गाडरू कोयतला छे.

जेतार परमेश्वर मिस्र पोर आखरी पिळा मुकल्यू ती चू होरे एक इस्राईलोन परिवार काजे कोयू कि चे एक गाडरान बली कोरे. तीना गाडरामा काहीन गुणु नि रोयनो जुवे. तेतार चू तेरा झोपलान चौखोट उपोर एने धोळे लुय काजे लागाळनो होतो. जेतार परमेश्वर तिना लुय काजे देख्यू, ती चू तिंदरा घोरो काजे देखीन ओगु जात रोयू, एने तिंदरा पेहला पुऱ्या काजे नि माऱ्यू. जेतार यो होयो ती परमेश्वर इना काजे फसहन तिहीवार कोयू.

येसू फसहन तिहीवारोन एक गाडरान सारखो छे. चू कोबी पाप नि कोऱ्यू, एरेन कोरता तेरेमा कानलो बी गलत नि होतो. चू फसहन तिहीवारोन तेमोपोर मोऱ्यू. जो कुदू येसुपोर भूरसू कोरे, तेतार येसून लुय तिना मानसोन पापोन किंमत चुकाळे. यो ओसो छे जोसो कि परमेश्वर तिना मानसोनचा गोथू ओगु जात रोयू, काहाकी चू तीनाक दोंड नि आपे.

परमेश्वर इस्राईल मानसो साते एक वायदू कोऱ्यू, काहाकी चे ओसला माणसे होता जीणूक परमेश्वर हेरा होयनेन करता नेवाळ लेदलू होतु. बाकीन हिमी परमेश्वर एक ओसी वायदू कोऱ्यू जो कि आखान कोरता छे. अगर कानली बी जातीन कुदू बी इनी वायदा काजे मान लेय ती चू परमेश्वरोन माणसोमा भेसकाय जाय. चू ओसू एरेन कोरता कोरे काहाकी चू येसू पोर भूरसू कोरे.

मुसा एक ओसू भविष्य कोरता होतु जीनाक परमेश्वरन वचन काजे मोटली ताकत साते प्रचार कोरलू होतु. बाकीन येसू आखा भविष्य कोरतामा गोथू आखान मोटलु होतु. चू परमेश्वर छे, एरेन कोरता जो काय बी चू कोऱ्यू एने कोयू चो परमेश्वरोन काम एने वचन होतो. एरेन कोरता पवित्र शास्त्र येसू काजे परमेश्वरोन वचन कोये.

परमेश्वर राजा दाउद साते वायदू कोरलू होतु कि राजान रूपमा तेरु एक पिढी परमेश्वरोन माणसो पोर हमेशान कोरता राज कोरसे. येसू परमेश्वरन पुऱ्यू, एने मसिह छे, एरेन कोरता चू राजा दाऊदन पिढी छे जो कायमोन कोरता राज कोर सोकसे.

दाऊद ते इस्राईलोन राजा होतु, बाकीन येसू आखा जोगोन राजा छे, चू पोछू आवसे एने हमेशान कोरता नियाव एने शांतीन साते तेरो राज्य पोर राज कोरसे.