49. रमेश्वरोन नोवलू वायदू

एक सोरगो दूत एक जुवान बायोर मोरीयोम काजे कोयू कि ची परमेश्वरोन पुऱ्याक जन्मो आपीस. ची तेतार छोल्ली होती, बाकीन पवित्र आत्मा तेरेनचा आव्यू एने ची भारीस होई. ची एक पुऱ्या काजे जन्म आपी जेरो नाव ची येसू मेकी. एरेन कोरता, येसू परमेश्वर एने माणूस दुय छे.

येसू घोणा सोवटा चमत्कार कोऱ्यू जो देखाळे कि चू परमेश्वर छे. चू पाणी पोर चाल्यू एने आंजी काजे शांत कोर देदू. चू घोणा सोवटा मांदळा काजे वारू कोऱ्यू एने घोणा सोवटा मानसोमा गोथू दुष्टात्मा काजे निकाव्यू. चू मोरला मानसो काजे जीवता कोऱ्यू एने चू पाच रुटा एने दुय माछा काजे 5000 मानसो काजे खावाळनेन कोरता खानामा पुरती कोऱ्यू.

येसू एक माहान मास्तोर होतु. जो काय बी चू सिकाळ्यु, तिना काजे दाखला आपीन सिकाळ्यु. जो चू माणसो काजे कोरनेन कोरता कोये चो तीनुक कोरनो जुवे काहाकी चू परमेश्वरोन पुऱ्यू छे. उदाहरनोन कोरता, चू सिकाळ्यु कि तुमुक दिसरा माणसोसी तीनात रीतीसी मोंग कोरनेन गोरोज छे जोसा तुमु खुद पोर मोंग कोरतला.

चू यो बी सिकाळ्यु कि तुमुक आखा चीजोसी जादा एने तुमरा पोयशा सी जादा परमेश्वरसी मोंग कोरनो जुवे.

येसू कोयू कि संसारमा काहणी बी चीजो काजे हासील कोरणे सी जादा वारू छे परमेश्वरोन राजमा रोयनो. तेरा राजमा तुमरो जानो गोरजोन छे कि परमेश्वर तुमुक पापोन गोथू वाचाळे.

येसू कोयू कि थुलाक माणसे तीनाक ग्रहण कोरसे. परमेश्वर तीनु मानसो काजे वाचाळ्यु. बाकीन दिसरा माणसे तीनाक ग्रहण नि कोरे. चू यो बी कोयू कि काहानास माणसे वारली जागा सारखा छे, काहाकी चे येसून बारामा वारली खोबर काजे स्वीकार कोर लेतला छे. एने परमेश्वर तीनुक वाचाळे. बाकीन काहणास माणसे वातळा जागा सारखा छे, जे परमेश्वरोन वचन बीज सारखो वाटीपोर पोळे, बाकीन चा काय बी नि उगतलो. ये माणसे येसून बारामा प्राचार अस्वीकार कोर देतला छे. चे तेरा राजमा जाणेसी मना कोर देतला छे.

येसू सिकाळ्यु कि परमेश्वर पापीसी घोणु मोंग कोरे. चू तीनुक माफ कोरणे चाहे एने तीनुक तेरा पुऱ्या बोनावने हिंडे.

येसू यो बी कोयू कि परमेश्वर पापसी घृणा कोरे. काहाकी आदम एने हव्वा पाप कोऱ्या, एरेन कोरता चू आखी पिढी बी पाप कोऱ्या. इनी संसारमा रोयनेवावा होर एक जोन पाप कोरतला एने परमेश्वरसी नांबे छे. होर एक जोन परमेश्वरोन दुश्मोन छे.

बाकीन परमेश्वर इना संसारमा रोयने वावा होर एक जोना साते इना रीतीसी मोंग कोऱ्यू, चू तेरा लाळका पुऱ्या काजे आप देदू ताकी परमेश्वर तीनुक दोंड नि आपे जे तेर्पोर भूरसू कोरे. एरे बोजाय, चे तेरे साते हमेशा कोरता रोयसे.

तुमु मोरनेन योग्य छे, काहाकी पाप कोरला छे. तुमरेसी परमेश्वर रीसवायनो सही छे. एरी मोरजी, चू येसू पोर येसुपोर रीसवाय गोयू. चू येसू काजे ख्रुसोन मोत आपीन दोंड आप्यू.

येसू कोबी पाप नि कोऱ्यू, बाकीन चू परमेश्वर काजे तिनाक दोंड आपने देदू. चू मोर जाणो स्वीकार कोऱ्यू. इना रीतीसी तुमरा पापोकाजे एने इना संसारमा रोयने वावा होर एक जोनोन पाप हाकलणेन कोरता चू एक खोरलू बलिदान होतु. येसू खुदोकाजे परमेश्वरोन कोरता बलिदान होय गोयू. एरेन कोरता परमेश्वर काहाना बी पापोक, या तोक कि मोटला पापो काजे बी माफ कोऱ्यू.

भोले तुमु वारला काम कोरता होसे, ती एरे लारे परमेश्वर तुमुकाजे नि वाचाळे. तेरु दोस्त बोननेन कोरता ओसलो काय बी नि होय जो तुमु कोर सोकतला. एरी अपेक्षा, तुमुक भूरसू कोरनो छे. कि येसू परमेश्वरोन पुऱ्यू छे, एने चू तुमरे बोदले ख्रूस पोर मोर गोयू, यो बी कि परमेश्वर तीनाक पोछू जीवतु कोर देदू. अगर तुमु एरेपोर भूरसू कोरे ती परमेश्वर तुमरा पापोकाजे माफ कोर देसे.

परमेश्वर तीनु होर एक जोन काजे वाचाळसे जू येसू पोर भूरसू कोरे एने तीनाक आपणु प्रभू स्वीकार कोरे. बाकीन चू तीनुक नि वाचाळे जे तेरेपोर भूरसू नि कोरे. यो काय मायने नि राखतलो कि तुमु मालदार छे या नि गरीब, माणूस या बायोर, डायलु या जुवान नीती तुमु का रोये. परमेश्वर तुमरेसी मोंग कोरे एने चाहतलु कि तुमु येसू पोर भूरसू कोरे कि तुमरू दोस्त बोन सोके.

येसू तुमुक बुलाव रोयू कि तेरे पोर भूरसू कोरे एने बाप्तिस्मा लिये. काय तुमु भूरसू कोरे कि परमेश्वरोन एकलौतू पुऱ्यू, येसुत मसिह छे? काय तुमु बरसू कोरे कि तुमु एक पापी छे एने यो कि तुमु परमेश्वरोन्लारे तुमुक दोंड जुळतो? काय तुमु भूरसू कोरे कि तुमरा पापो काजे धुवणे कोरता येसू ख्रूस पोर मोऱ्यू?

अगर तुमु येसू पोर जो चू तुमरेण कोरता कोरलू तिना पोर भूरसू कोरे, ती तुमु एक मसिही छे, भुतडू तेरो आंदारलान राज्यमा तुमरे पोर राज नि कोरे. हिमी परमेश्वर तेरा विजावान राज्याम तुमरेपोर राज कोरे. चू तुमुकाजे पाप कोरणे सी रुक देद्लू छे जीनाक तुमु कोऱ्या कोरता होता. चू तुमुक एक नोवलो योग्य जीवन आपलू छे.

अगर तुमु एक मसीही छे ती जो येसू कोऱ्यू तेरे कारण परमेश्वर तुमरा पापो काजे माफ कोर देदू. हिमी परमेश्वर एक दुष्मोनोन आस तुमुक एक वातळू दोस्त बोनावे.

अगर तुमु परमेश्वरोन दोस्त छे एने प्रभू येसून सेवक छे ती तुमु तीन वातोन पालोन कोरनेन मोरजी कोरसू जो येसू तुमुक सिकाळे. भोले तुमु एक मसीही होय, भुतडू हिमिबी पाप कोरनेन कोरता तुमरी पारख कोरे, बाकीन परमेश्वर हमेशा चो कोरे जो चू कोये कि चू कोर्से. चू कोये कि अगर तुमु तुमरा पापो काजे मान लेये ती चू तुमुकाजे माफ कोर देसे. चू तुमुक पापोन विरुद्ध लोळायनेन ताकत आपे.

परमेश्वर तुमु काजे प्रार्थना कोरणे एने तेरा वचन भोनने कोरता कोये. चू तुमु काजे दिसरा विस्वास्या साते भेवा होयीन आराधना कोरनेन कोरता बी कोये. तुमुकाजे दिसरा माणसे काजे बी कोयनो छे कि चू तुमरेण कोरता काय कोऱ्यू. अगर तुमु इनू आखा कामो काजे कोरे ती तुमु तेरा एक पाक्का दोस्त बोन जासू.