50. येसू पोछू आवे

लगभग 2000 सालो सी सांसारमा आखा जागा पोर जादा सी जादा माणसे मसिह येसून बारा वारली खोबर काजे सोमविरोया. मंडव्या उन्नती कोर रोया. येसू वायदू कोऱ्यू कि चू सांसारोन आखरी तोक पोछू आवसे. अगर चू पोछू नि आव्यू, तेबी चू तेरा वायदा काजे पुरू कोरसे.

आपणु ते येसून पोछो आवनेन वाट जुव रोया, परमेश्वर आपनेसी ओसली रीतीसी जीवन जीवनेन मोरजी कोरे जू पवित्र छे एने जू तेरो आदोर कोरे. जेतार येसू धोरती पोर रोयतू होतु तेतार चू कोयू, “मारा चेला संसार भोरमा आखा जागांन मानसो काजे परमेश्वरन राज्यन बारामा वारली खोबरोन प्रचार कोरसे, एने तेतार आखरी आव लागसे.”

घना सोवटा जाती हिमी तोक येशून बारामा नि सोमव्या. सोरगोन पोछु जाणेन पेहेल येसू मासीही मानसोसी तीनु मानसो काजे वारली खोबर सोमवावनेन कोरता कोयू. जा इना काजे कोबी नि सोमव्या. चू कोयू, “जाऊ एने आखा जातीन मानसो काजे चेला बोनावू,” एने “काटनि कोरनेन कोरता खेत पाक गोयलो छे.”

येसू यो बी कोयू, “काहना मानसोन सेवोक तेरा मालिक गोथू मोटू नि रोयतलू इनी संसारोन महत्वान माणसे मारेसी नफरत कोऱ्या, एने मारे वोजहसी चे तुमुकाजे वेला पाळावसे एने मार बी देसे. इनी संसारमा तुमुक विताळसे बाकीन वातळा बोणु, काहाकी मे भुतडा काजे हाराव देदलू छे. जो इनी संसार पोर राज कोरे. अगर तुमु आखरी तोक मारा भूरसान योग्य बोनला रोयू, ती तुमुकाजे वाचाळसे.”

येसू तेरा चेला काजे सोमजाळने कोरता एक काहानी सोमवाळ्यु कि जेतार संसारोन आखरी होयसे ती मानसो साते काय होयसे. चू कोयू, “काहनुस माणूस तेरा खेतमा वारलो बीज वेऱ्यू. जेतार चू सुवतू होतु ती तेरु दुस्मोन आव्यू एने गोहून बीजन इचमा जंगली झाडोन बीज वर देदू, एने ओवतेन चू जात रोयू.”

“जेतार झाडे पाक गोया ती सेवक माणसे तिना मानसो काजे कोयू, “हे मालक, तू तार खेतोम वारलो बीज वेरलू, ती एरोमा जंगली झाडे काहा छे? चू माणूस जवाब आप्यू, ‘निस्ता मारा दुस्मोनु वेऱ्या होसे. या मारा दुस्मोन छे जू ओसो कोऱ्यू.”

“चे सेवके तिंदरा मालिक काजे जवाब आप्या, ‘काय आमु जंगली झाडे उखाव देजे?’ चू मालक कोयू, ‘नि. अगर तुमु ओसा कोरसू ती तुमु गोहुक बी उखाव देसू. काटनीन टेमे तोक वाट जुवू. तेतार जंगली झाड काजे खाडामा एकठा कोर लेवू ताकी तुमु तीनाक धोपाळ सोके. बाकीन गोहू काजे पुतामा लीन आवू.”

चेला इनी काहानीन मतलब नि सोमज्या, एरेन कोरता चे येसू सी तीनुक सोमजाळनेन कोरता विनता कोऱ्या. येसू कोयू, “वारलो बीज वेरणे वावु येसून प्रतिनिधित्व कोरे. खेत संसार प्रतिनिधित्व कोरे, वारलो बीज परमेश्वरोन राज्यन मानसोन प्रतिनिधित्व.”

जंगली झाडे तिना दुष्ट जन, भुतडान प्रतिनिधित्व चाले, तिना मानसोन दुस्मोन भुतडान प्रतिनिधित्व चाले, जू जंगली झाडो काजे वेर देदलू होतु. काटनि इनी संसारोन आखरीन प्रतिनिधित्व कोरे, एने काटनि कोरणे वावा परमेश्वरन सोरगो दूतन प्रतिनिधित्व कोरे.”

जेतार संसारोन आखरी होयसे तेतार सोरगो दूत तीनु आखा मानसो काजे एकठा कोरसे जे भुतडान छे. चे सोरग दूत तीनु काजे एक घोना तातला आगठामा नाख देसे. चा चे माणसे मोटला वेलामा रोळसे एने तिंदरा दाते कोकळावसे. बाकीन जे माणसे धोरमी छे, जे येसून पोछोव चाले, चे तिंदरा बासोन राजमा सूर्य सारखा चोमोकसे.”

येसू यो बी कोयू कि चू संसारोन नाश होयनेन पेहेल धोरती पोर आव लागसे. चू तिना रीतीसी पोछू आवसे. मतलब तेरे जुव एक डील रोयसे एने चू आकाशमा वादवा पोर बोठीन आवसे. जेतार येसू आवे तेतार ती होर एक मासीही जे मोरलाम गोथा जीव उठसे एने तेरे साते आकाशमा भेटायसे.

तेतार जे मसीही हिमी जीवतला छे चे आकाशमा चुटाय जासे एने तीनु दिसरा मसीही साते भेसकाय जासे जे मोरलाम गोथा जीव जासे. चे आखा चा येसूनचा रोयसे तेरे बादमा येसू तेरा मानसो साते रोयसे. जेतार चे एकठा रोये ती तिंदरे जुव कायोम पुरी शांती रोयसे.

येसू पोर भूरसू कोरणे वावाक होर एक जोन काजे एक मुकुट आपनेन वायदू कोरलू छे. चे कायोमोन कोरता परमेश्वर साते होर एक जीजो पोर राज कोरसे. तिंदरे जुव सिद्ध शांती रोयसे.

बाकीन परमेश्वर तिंदरु आखान नियाव कोरसे जे येसू पोर भूरसू नि कोरे चू तीनुक नोरगमा नाख देसे. चा चे रोळसे एने दात कोकळावसे, एने चे वेला कोरसे. कोबी नि उलवायने वावी आगठ लगातार धोपती रोयसे, एने किळा तीनुक खाणेसी कोबी नि रुके.

जेतार येसू पोछू आवे, ती चू पुरी रीतीसी भुतडा काजे एने तिंदरा राज्य काजे नाश कोर देसे. चू भुतडा काजे नोरोग नाख देसे. चू भुतडू होमेशान कोरता धोपतू रोयसे, तीनु आखा साते जे परमेश्वर वातो काजे मानने बजाय भुतडा पोछोव चालनेन चुनाव कोर लेदा.

काहाकी आदम एने हव्वा परमेश्वरोन आग्या नि मान्या एने पाप काजे इनी संसारमा लीन आव्या, परमेश्वर तीनुकाजे श्राप आप्यू एने तीनाक नाश कोरनेन फेसलू कोऱ्यू. बाकीन काहने दाहळे परमेश्वर एक नोवलो सोरोग एने एक नोवली धोरती बोनावसे जो सिद्ध होयसे.

येसू एने तेरा माणसे तिनी धोरती पोर रोयसे, एने चे कायमोन कोरता आखा चीजोपोर राज कोरसे. चे माणसोन आसवा काजे पूस देसे. हिमी कानली बी वेला नीती दुख नि रोये. चे रोळे नि. चे मांदा नि पोळे या नि मोरे. एने चा कानलीत बुराई नि रोये. येसू तेरा राज्य पोर नियावसी एने शांती साते राज कोरसे, चू होमेशान कोरता तेरा मानसो साते रोयसे.