15. परतिज्ञा के देस
आखिर मां व समय आ ग रओ ह कि इस्रराएली मनई प्रतिज्ञा के देश म परवेश करां । व देश म यरीहो नाम के नगर रओ ह । ओखे रक्षा के लाने चारों कई ऊँच, मजबूत दीवार रओ ह। यहोशू व नगर म दूठे भेदीयन का भेजिस। व नगर म रहाब नाम के एकठे वेश्या राहत रईही जऊन भेदियन का छुपाए रईही । अऊ फेर बाद म भेदियन का व नगर से बचा के निकाले म सहायता करे रईही। व अईसा एखे लाने करिस कि व परमातिमा के ऊपर विश्वास करत रईही । जऊन समय इस्राएली यरीहो का नाश करिहीं व समय ओखे घर का बचामा के प्रतिज्ञा करीन।
इस्राएली मनई का प्रतिज्ञा के देश म प्रवेश करा का यरदन नदी पार करा का पड़ी। परमात्मा यहोशू से कहीन कि पहले याजकन का जाएं दे, जब याजक यरदन नदी म आपन गोड़ रखिन त पानी के धार बहां क रूक ग । जेमा से कि सब इस्राएली दूसर तरफ पार जा सकां।
ऊँ मनई जब यरदन नदी पार कर लइन तब परमातिमा यहोशू से कहीन कि, “अब यरीहो म हमला करे का तैयार रहां ।” हालाँकि व बहुत दृढ़ नगर रओ ह। परमातिमा मनईन का कहीन कि, “याजक अऊ सैनिक का छ: दिन तक नगर के चारों कई चक्कर लगा म का पड़ी ।” अऊ याजक अऊ सैनिक अईसे ही करिन।
तब सातवां दिन इस्राएली मनई व नगर के चारों कई सात बार अऊ चक्कर लगाईन । उनखे नगर के चारों कई सात बार चक्कर लगाए के बाद याजक आपन तूरही फुकिन अऊ सैनिक जोर से शब्द करिन ।
अऊ जईसे ही तुरही फूकिन वईसे यरीहो के चारों कई के दीवार गिर गा । जईसे परमातिमा इस्राएलीन का आज्ञा दाय रए हें वईसे ही इस्राएली, नगर के सब चीजन का नाश कर दईन अऊ बस रहाब अऊ ओखे परिवार का छोड़ द रए हें जऊन ईनखर भाग बन गा रए हें अऊ जब कनान मां रहां वाले मनई सुनीन कि इस्राएली यरीहो का नाश कर दईन हीं, त ऊँ डेरा गें कि इस्राएली मनई उनके ऊपर भी हमला करहीं ।
परमातिमा इस्राएलीन का आज्ञा दए रए हें कि कनान म रहां वाले कोनो भी जाती से संधि ना करहीं । पर गिबोनी जाति के मनई यहोशू से झूठ बोल दईन कि हम कनान से दूर रहां वाले मनई हन । अऊ ऊँ यहोशू से संधि करा क अनुरोध करीन । अऊ यहोशू अऊ दूसर अगुवा परमातिमा से नई पूछीन कि हमही का करा क चाहि अऊ बिना पूछे गिबोनीन से संधि कर लईन।
तीन दिन के बाद इस्राएली का मालूम चलो की गिबोनी कनान म ही रहा थें । ऊँ गुस्सा होईगें कहे से की गिबोनी उन्हीं धोखा दए रए हें पर व संधि का बनाए रखिन कहे से कि व परमातिमा के सामने भ रओ ह। तब कुछ समय के बाद कनान म रहां वाली जाति एमोरी के राजा सुनीस कि गिबोनी इस्राएली से सधिं कर लईन हीं त ऊँ आपन-आपन सेना क लईके एक बहुत बड़ा सेना बना लईस अऊ गिबोनी म हमला कर दईन। तब गिबोनी, यहोशू के पास सहायता करा के लाने संदेश भेजिन ।
तब यहोशू इस्राएली के सेना का एकट्ठा करके गिबोनीन के सहायता करा के लाने पूरा रात चलीन । सबेरे एमोरी के सेना का चकित कर दईन अऊ भिन्सरहा उनखे ऊपर हमला कर दईन।
व दिन परमातिमा इस्राएलीन के लाने लड़ीन अऊ एमोरी के सेना का घबरा दईन अऊ ऊपर से बड़ा – बड़ा ओला गिरा के बहुत सारे एमोरीन का मार डालीन।
परमातिमा सूरज का भी एकठे जगह म रोंक दईन कि इस्राएलीन का एमोरीन का हरामा का भरपूर समय मिल जाए । व दिन परमातिमा इस्राएली के लाने एकठे बड़ी जीत का हासिल करिन।
जब परमातिमा एमोरीन का हरा दईन त बहुत से कनानी जाती के बहुत सारा मनई इस्राएली के ऊपर हमला करा का एकट्ठा होईगें। यहोशू अऊ इस्राएली हमला करके उनखर सर्वनाश कर दईन।
ईं युद्ध के बाद परमातिमा इस्राएलीन के हर गोत्र क प्रतिज्ञा के देश म उनखर भाग दईन। तब परमातिमा इस्राएल का अऊ ओखे सेना का शांति दईन।
जब यहोशू बूढ़बा होईगा त इस्राएल के सब मनईन का एक साथ बुलाईस। तब यहोशू ऊँ मनईन का याद करवाईस कि ऊँ व वाचा के पालन करा के प्रतिज्ञा करें रए हें जऊन परमातिमा सीनै पर्वत म करें रए हें। ऊँ मनई परमातिमा के प्रति विश्वासयोग्य रहां का अऊ व्यवस्था के पालन करा का वादा करिन।
यहोशू अध्याय 1-24 से बाइबल से एक कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।