17. दाऊद के साथ परमातिमा के वाचा

शाऊल इस्राएल के पहला राजा रओ ह। व लम्बा अऊ सुन्दर रओ ह, जइसा ऊँ चाहत रए हें, एकदम वईसा। इस्राएल म अपन सासन के पहिले कुछ साल म शाऊल एकठे अच्छा राजा रओ ह। पर बाद म शाऊल एकठे दुष्ट मनई बन ग जऊन परमातिमा के बात का नई मानीस, एहीसे परमातिमा दूसर मनई का चुनीन जऊन कि एक दिन ओखे जगह म राजा बनी।

परमातिमा दाऊद नाम के एकठे जवान इस्राएली मनई का चुन के एक दिन शाऊल के जगह म राजा बनामा के लाने तैयारी करां का सुरु कर दईन। दाऊद बैतलहम नगर के चरवाहा रओ ह। कई बेर दाऊद सिंह अऊ भालू दोनों का मार डाले रओ ह कहेसे कि दाऊद के द्वारा रखवाली करत समय ओखे बाप के भेंड़ म ऊँ हमला करे रओ ह। दाऊद एकठे नम्र अऊ धर्मी मनई रओ ह। व परमातिमा के ऊपर भरोसा रखीस अऊ उनखे बात का मानीस।

जब दाऊद अबहूँ भी जवान मनई रओ ह, व लंबा-चौड़ा गोलियत से लड़ाई करिस। गोलियत एकठे बहुत अच्छा सैनिक रओ ह व बहुत मजबूत अऊ लगभग तीन मीटर लम्बा रओ ह। पर परमातिमा गोलियत का मारे म अऊ इस्राएल का बचाय म दाऊद के मदत करीन। ओखे बाद, दाऊद इस्राएल के शत्रुन के ऊपर केतना बार विजय पाईन। दाऊद एकठे बड़ा सैनिक बन ग रओ ह, अऊ व बहुत सारा युद्ध म इस्राएली सेना के अगुवाई करिस। मनई वाखर बहुत प्रसंसा करीन।

मानई दाऊद से इतना प्रेम करीन कि शाऊल ओसे जलाँ लगो। आखिरकार शाऊल ओही मार डालाँ का चाहिस, एहीसे दाऊद ओसे अऊ ओखे सैनिक से छुपा के लाने दूर जंगल म भग ग। एक दिन जब शाऊल अऊ वाखर सैनिक ओखे खोज म रए हें। तब शाऊल एकठे गुफा म ग। य वहे गुफा रओ ह जेमां दाऊद छुपो रओ ह, पर शाऊल ओही नई देखिस। दाऊद शाऊल के पीछे ओखे बहुत पास म चलो ग रओ ह अऊ ओखे कपड़ा से एकठे टुकड़ा काट लईस। बाद म जब शाऊल व गुफा से निकलो तब दाऊद ओही पुकार के व कपड़ा के टुकड़ा दिखा दईस, तब राजा शौक जान ग कि दाऊद राजा बने के लाने ओही मार डालाँ क इंकार कर दईसी।

कुछ समय के बाद, शाऊल युद्ध म मर ग, अऊ दाऊद इस्राएल के राजा बन ग। व एकठे अच्छा राजा रओ ह। अऊ मनई ओसे प्रीति रखिन। परमातिमा दाऊद का आसीस दईन अऊ ओही सफल बनाईन। दाऊद केतना युद्ध लड़ीस, अऊ परमातिमा इस्राएल के शत्रुन का पराजित करीन। दाऊद यरुशलेम नगर क जीत के ओही अपने राजधानी बनाईस, जहाँ व रहो अऊ सासन करिस। दाऊद 40 साल तक राजा रहो। य समय के दौरान, इस्राएली सामर्थी अऊ धनवान बन ग रए हें।

दाऊद एकठे मंदिर बनामा का चाहत रओ ह जहाँ सब इस्राएली परमातिमा के आराधना कर सकतीन। लगभग 400 साल से, ऊँ मूसा के बनाए मिलाप वाला तम्बू म परमातिमा के आराधना करत रए हें अऊ उनखे लाने बलिदान चढ़ाऊत रए हें।

पर हून नतान नाम के एकठे भविष्यवक्ता रओ ह। परमातिमा ओही दाऊद से य कहा के लाने भेजे रए हें, “तें बहुत सारा युद्ध लड़े हस एखे बजे से ते मोरे लाने य मंदिर का न बना पईहे। तोर बेटवा एही बनई। तबहूँ मैं तोही बहुतायत से आसीस दईहों। तोर एकठे वंस सदा के लाने मोरे मनई के ऊपर राजा के रूप मा सासन करी।“ सदा के लाने सासन करे वाला व दाऊद के एक मात्र वंस मसीह रए हें। जऊन संसार के मनई का उनखे पापन से बचईहीं।

जब दाऊद नतान के सन्देस का सुनिस त व परमातिमा का धन्यवाद करिस। परमातिमा ओखे जस का बढ़ाऊत रए हें अऊ ओही बहुत सारा आसीस देत रए हें। भले दाऊद नई जानत रहो आय कि परमातिमा ईं बातन का कब करहीं। य समय हम जानी थे के इस्राएल एकठे लम्बा समय लगभग 1000 साल तक मसीह के आमा के ओरगे के पड़ी।

दाऊद केतना साल तक न्यायपूर्वक अपने मनईन म सासन करिस। व बड़ी लगन से परमातिमा के बातन का मानीस अऊ परमातिमा ओही आसीस दईन। हालांकि अपन जीवन के अंत म परमातिमा के खिलाफ भयानक पाप करिस।

एक दिन दाऊद अपन महल से झाँकीस अऊ एकठे सुन्दर मेहेरिआ नहात देखिस। व ओही नई जानत रहो आय पर व पता कर लईस कि वाखर नाम बतशेबा हबा।

अपन नजर का फेर ले के बजे दाऊद ओही अपने पास लामा के लाने कोऊ का भेजिस। व ओखे साथ सोईस अऊ ओही वापस घर भेज दईस। कुछ समय के बाद बतशेबा य कहिके दाऊद के पास सन्देस भेजिस कि व गर्भवती हीबा।

बतशेबा के मेन्सेरुआ उरिय्याह मेन्सेरुआ उरिय्याह नाम के एकठे मनई रओ ह। व दाऊद के उत्तम सैनिक म से एक रओ ह। य समय व युद्ध करे के लाने बाहर ग रओ ह। दाऊद उरिय्याह का युद्ध से वापस बुला के ओही अपन मेहेरिआ के साथ रहे के लाने कहिस। पर अन्य सैनिक युद्ध म रए हें एही से उरिय्याह घर जाए का मना कर दईस। अऊ सेनापति से कहिस, “ओही युद्ध अइसा जगह म रखे के लाने कहिस जहाँ शत्रु सबसे शक्तिशाली रहाँ ताकि व मारे जाए। त अइसा भय के उरिय्याह युद्ध मा मारो ग।

उरिय्याह के युद्ध म मर जाय के बाद दाऊद बतशेबा से सादी कर लईस। बाद म व दाऊद के बेटवा का जन्म दईस। दाऊद जऊन करे रओ ह परमातिमा ओसे बहुत गुस्सा रए हें, एहीसे ऊँ नतान भविष्यवक्ता का य बतामा के लाने भेजिस कि वाखर पाप केतना बुरा हबा। दाऊद अपन पाप के पश्चाताप करिस अऊ परमातिमा क्षमा कर दईन । अपन सेस जीवन म दाऊद परमातिमा के पीछे-पीछे चलीस अऊ उनखे बातन का मानीस।

पर दाऊद के लरका मर ग। अइसा करके परमातिमा दाऊद का दंड दईन। एखे अलावा, दाऊद के मरे तक, ओखे अपन परिवार के कुछ मनई ओखे खिलाफ लड़ाई करीन अऊ दाऊद के सक्ति कम होईगे रही। पर परमातिमा विश्वास योग्य रए हें अऊ अबहूँ भी व करिस जऊन ऊँ दाऊद से करें का वादा करे रए हें कि ऊँ करहीं, भले चाहे दाऊद उन्खर अवज्ञा करे रओ ह। बाद म दाऊद अऊ बतशेबा के दूसर संतान पईदा भ अऊ ऊँ वाखर नाम सुलैमान रखिन।