19. भविष्यवक्ता

परमातिमा हमेशा इस्राएलीन के पास भविष्यवक्ता भेजे करते र‌ए हें। भविष्यवक्ता परमातिमा के संदेश का सुने करत र‌‌ए हें अऊ ऊं मन‌ईन का बताए करत र‌ए हें।

जब अहाब इस्राएल राज्य म राजा र‌ओ ह व समय एलीय्याह भविष्यवक्ता रओ ह। अहाब बहुत बुरा मनई र‌ओ ह। व झूठा देऊतन के उपासना करे के लाने मन‌ईन का विवश करे र‌ओ ह । एखे बजे से एलीय्याह अहाब से कहिस कि उन्ही परमातिमा दंड दे का जा र‌ओ ह। व उनसे कहीस कि जब तक मैं फेर से बारिश होएँ क न कहो तब तक इस्राएल के राज्य म न बारिश होई अऊ न ओस गिरी। य बात अहाब का एतना गुस्सा दिला द‌ईस कि व एलीय्याह का मारा का निर्णय ल‌ईस ।

एहीसे परमातिमा एलीय्याह का कहीन कि, “ते अहाब से दूर जंगल म जाके छुप जा।” एलीय्याह तब व सोता के पास ग ज‌ऊन परमातिमा ओही बताए र‌ए हें। हर सुबह अऊ शाम पक्षी एलीय्याह के लाने रोटी अऊ मांस लाए करत र‌ए हें। य पूरा समय म अहाब अऊ वाखर सेना जंगल म एलीय्याह का ढूंढत रहिगें पर ओही नई पा‌ईन।

बारिश होएं से थोड़ी समय के बाद व सोता सूख ग र‌ओ ह । तब एलीय्याह एकठे पास के देश म चलो ग र‌ओ ह। व देश म एकठे गरीब विधवा रहत र‌ईही ओखे एकठे बेटवा र‌ओ ह । ओखे पास से खाना लगभग समाप्त होई ग र‌ओ ह । तबहूं व एलीय्याह के देखरेख करिस एखे बजे से परमातिमा व विधवा के सब आवश्यकता का पूरा करिन। य कारण से ओखे आटा के पात्र अऊ तेल के कुप्पी कबहूं खाली नई भा । व पूरा अकाल के समय म उनखे पास भोजन र‌ओ अऊ एलीय्याह कुछ साल तक हूने रहो।

साढ़े तीन साल के बाद परमातिमा एलीय्याह से कहिन कि, “मैं फेर से बारिश करीहों।” ऊं एलीय्याह से वापिस इस्राएल म जाके अहाब से बात करे के लाने कहीन। एखे बजे से एलीय्याह अहाब के पास ग। जब अहाब एलीय्याह क देखिस त कहिस, “अच्छा ते आहे मुसीबत प‌ईदा करा वाला।” एलीय्याह कहीस, “मुसीबत तो ते प‌ईदा करा वाले आहे । ते परमातिमा का त्याग द‌ए हस। ऊं सच्चा परमातिमा हें, पर ते बाल के उपासना करते हस। अब ते इस्राएल के सब मन‌ईन का कर्मेल पर्वत म ल‌ईके अईहे।”

तब सब मनई कर्मेल पर्वत म गें। अऊ ऊं मन‌ई भी गें ज‌ऊन कहत र‌ए हें कि हम बाल के संदेश बोले बाले आहन। ईं बाल के भविष्यवक्ता र‌ए हें अऊ सब मिलाके साढे़ चार सौ मन‌ई र‌ए हें । एलीय्याह ऊं मन‌ईन से कहीस कि, “कब तक तुम अपने मन का न फिर‌ईहा? यदि यहोवा परमातिमा हें त उनखर आराधना करा अऊ अगर बाल देऊता परमातिमा आए त वाखर उपासना करा।”

तब एलीय्याह बाल के भविष्यवक्ता से कहीस कि एकठे बैल का बली करके ओखे मांस का बलिदान होएं के लाने वेदी म रखा पर व म आग न लगया। अऊ फेर महूँ व‌ईसे ही करिहों अऊ एकठे अलग बेदी म ओखे मांस क रख द‌ईहों अऊ तब परमातिमा व म आग गिर‌ई तब तुम जान ल‌ईहा कि ऊं सच्चा परमातिमा हें। अऊ बाल के भविष्यवक्ता एकठे बलि क तैयार करिन अऊ व म आग न लगाईन।

तब बाल के भविष्यवक्ता बाल से प्रार्थना करिन कि, “बाल हमार सुन!” पूरा दिन ऊं चिल्ला-चिल्ला के प्रार्थना करिन यहां तक कि अपने आप का चाकू से काट लइन पर उन्हीं बाल कुछु जवाब न द‌ईस, अऊ न आग गिराईस।

बाल के भविष्यवक्ता बाल से प्रार्थना करत-करत पूरा दिन बिता द‌ईन। तब ऊं प्रार्थना करा क बंद कर दईन । ओखे बाद एलीय्याह दूसर बइला का परमातिमा के बेदी म रखिस। ओखे बाद व मन‌ईन का तब तक पानी डाला का कहीस जब तक व बेदी अऊ लकड़ी, मांस अऊ वेदी के चारो क‌ई के भुइयां गील न हो‌ई जा।

तब एलीय्याह प्रार्थना करिस कि, “हे यहोवा, अब्राहम, इसहाक अऊ याकूब के परमातिमा हमहीं दिखावा कि तुम इस्राएल के परमातिमा आ हा, यहो भी कि मैं अपनन के दास आहों। मोही जबाब द्या ताकि ईं जान लें कि तुम सच्चा परमातिमा आहा।”

तब तुरन्त आग गिरो अऊ मांस, लकड़ी, चट्टान, माटी अऊ यहो तक कि वेदी के आसपास के चारो क‌ई के पानी तक का जला द‌ईन। मनई जब य देखिन त भू‌ईयां म गीर के कहां लगे, “यहोवा ही परमातिमा आएं! यहोवा ही परमातिमा आएं!”

तब एलीय्याह कहीस, “बाल के भविष्यवक्ता बचके जां क न चाही । एही से मनई भविष्यवक्ता का पकड़ के अलग ल‌ईगें अऊ उन्हीं मार डालिन।

तब एलीय्याह अहाब राजा से कहीस, “जल्दी अपन घर का भग जा कह से कि बारिश होएं वाला ह।” तब जल्दी ही बादल घना होईगा अऊ भारी बारिश चालू होईगा कहेसे कि यहोवा सूखा का समाप्त करत र‌ए हें । एसे य परगट होईगा कि यहोवा ही सच्चा परमातिमा हें।

जब एलीय्याह आपन काम समाप्त कर द‌ईस तब परमातिमा एलीशा नाम के एकठे मनई क भविष्यवक्ता होएं क चुनीन। परमातिमा एलीशा के द्वारा बहुत से चमत्कार के काम करिन। जे म से नामान के साथ भ र‌ओ ह। व एकठे शत्रु के सेना के सरदार र‌ओ ह। ओखे चमड़ी म बुरा रोग होईगा र‌ओ। नामान एलिशा के बारे म सुने र‌ओ ह एखे बजे से नामान एलीशा के पास आओ अऊ व रोग का ठीक करा के एलीशा से अनुरोध करा लगो । तब एलीशा कहीस, “जा अऊ यरदन नदी म सात बार जाके डुबकी लगा ले।”

तब नामान गुस्सा होईगा अऊ डुबकी लगामा से मना कर द‌ईस कहेसे कि ओही लगत र‌ओ ह कि या मूर्खता के काम आए । पर बाद म जाके व यरदन नदी म सात बार डुबकी लगाईस । अऊ जब अंतिम बार व पानी से निकलो त परमातिमा ओही ठीक कर द र‌ए हें।

परमातिमा इस्राएल के मन‌ईन के पास बहुत सारे भविष्यवक्ता भेजिन अऊ ऊं भविष्यवक्ता मन‌ईन का मूर्ति के उपासना बन्द कर दें क कहीन। बल्कि उन्ही एक – दूसर क न्याय पूर्वक व्यवहार करां क चाही अऊ एक – दूसर के ऊपर दया करा क चाही। ऊं भविष्यवक्ता मन‌ईन का चेतावनी द‌ईन कि बुरा काम करे का छोंड़ दे अऊ ओखे बजाय परमातिमा के बातन के पालन करां। यदि ऊं मनई अईसा न करहीं त परमातिमा उन्हीं दोषी ठहरा के उनखर न्याय करहीं, अऊ उन्हीं दंड दईहीं।

अधिकांश समय, ऊं मन‌ई परमातिमा के आज्ञा के पालन न‌ई करिन अऊ अक्सर भविष्यवक्ता के साथ बुरा व्यवहार करिन अऊ यहो तक की कबहूं – कबहूं उन्हीं मार तक डालीन। एक बार, यिर्मयाह भविष्यवक्ता का सूखन कुआँ म डाल दे र‌ए हें अऊ मरा के लाने छोड़ द र‌ए हें। व कुआं के तल म किचड़ म धंस ग र‌ओ ह। तब राजा का ओखे ऊपर दया आ गा तब सैनिक क आदेश द‌ईन कि यिर्मयाह के मरे के पहले, ओही कुंआ से बाहर खींच लें।

भविष्यवक्ता परमातिमा के तरफ से बोआलें क जारी रखिन। भले मनई, उनसे नफरत करत र‌ए हें। ऊं व मन‌ईन का चेतावनी ‌द‌ईन, यदि ऊं पश्चाताप न करहीं त परमातिमा उनखर नाश कर द‌ईहीं। ऊं मन‌ईन का य भी बताईन, “परमातिमा उनखे लाने मसीह का भ्याजां क प्रतिज्ञा करीन हें।”