20. बँधुवाई अऊ लऊटना

इस्राएल के राज्य अऊ यहूदा के राज्य दोनों परमातिमा के विरुद्ध पाप करीन। ऊँ व वाचा का तोड़ दईन जऊन परमातिमा उनखे साथ सीनै पर्वत म बाँधे रए हें। परमातिमा उन्हीं पश्चाताप करे का अऊ फेर से उन्खर आराधना करे के लाने चेतावनी दे के लाने अपन भविष्यवक्ता का भेजिन, पर ऊँ उनखे बातन का माने से मना कर दईन।

तब परमातिमा उनखे शत्रुन का उन्हीं नाश करे म सक्षम कर दईन अऊ दोनों राज्य का दंड दईन। अश्शूर एकठे दूष्ट देस रओ ह जऊन बहुत शक्तिशाली होई ग रओ ह। ऊँ दूसर देस के लाने बहुत निर्दई भी रए हें। ऊँ आके इस्राएल के राज्य का नाश कर दईन। अश्शूरी आके इस्राएल के राज्य म बहुतन का मार डालीन । जऊन चाहीन व लूट लईन, अऊ देस के केतना हिस्सान का जला दईन।

अश्शूरी सब अगुवन का, धनवान मनई, अऊ अइसे मनईन का जऊन कीमती चीजन का बना सकत रए हें एक साथ एकट्ठा करीन अऊ ऊँ उन्हीं अश्शूर देस लई गें। इस्राएल म बस चुटु से गरीब इस्राएली बचे रए हें।

फेर अश्शूरी मनई व देस म रहे के लाने विदेसीन का लेके आईन। ऊँ विदेसी ऊँ नगरन का फेर से बनाईन। जऊन इस्राएली हुन बचे रए हें उनखे से ऊँ सादी करीन। ईं मनईन के वंसज सामरी कहलाईन।

यहूदा के राज्य के मनई देखिन कि कइसे परमातिमा ओखे ऊपर बिसवास न करा वालेन क अऊ ओखे बातन का न माना वाले इस्राएल के राज्य के मनईन का सजा दईन। पर तबहूँ भी ऊँ कानानीन के देऊतन के मूर्तिन के उपासना करीन। परमातिमा उन्हीं चेताउनी दे के लाने भविष्यवक्तन का भेजिन पर ऊँ सुने से मना कर दईन।

लगभग सौ साल के बाद अश्शूरी इस्राएल के राज्य का नाश कर दईन। परमातिमा बेबीलोन के राजा नबूकदनेस्सर का यहूदा के राज्य म हमला करे के लाने भेजिन। बेबीलोन एकठे शक्तिशाली देस रओ ह। यहूदा के राजा नबूकदनेस्सर के दास बना के अऊ हर साल ओही बहुत सारा धन दे के लाने सहमत होई ग।

पर कुछ सालन के बाद, यहूदा के राजा बेबीलोन के खिलाफ बलवा कर दईस। बेबीलोनीन वापस आके यहूदा के ऊपर हमला कर दईन। ऊँ यरुशलेम नगर म कब्ज़ा कर लईन, मंदिर का नष्ट कर दईन अऊ नगर अऊ मंदिर के खजाना का लूट लई गें।

बलवा करे के कारन यहूदा के राजा का सजा दे के लाने, नबूकदनेस्सर के सैनिक राजा के बेटवा का ओखे सामने मार डालीन अऊ फेर ओही अंधा कर दईन। एखे बाद, ऊँ राजा का लई गें ताकि व बेबीलोन के जेल खाना म मर जाय।

नबूकदनेस्सर अऊ वाखर सेना यहूदा के राज्य के लगभग सब मनईन का बेबीलोन लई गें, बस थोड़ी से गरीब मनईन का पीछे छोड़ दईन ताकि ऊँ खेतन म फसल ऊगा सकयँ। समय के य ब्यरा का बंधुवाई कहीन जेमा परमातिमा के मनईन का परतिज्ञा के देस से निकल जायँ के लाने विवस करे रए हें।

भले ही परमातिमा अपन मनईन का उनखे पापन के कारन बंधुवाई म जायँ के द्वारा सजा दय रए हें, तबहूँ ऊँ उनखे अऊ अपने परतिज्ञा का नई भूले रहे आयँ। परमातिमा अपने मनईन के निगरानी करे का जारी रखिन। अऊ अपन भविष्यवक्तन के द्वारा उनखे से बात करत रहीगें। ऊँ प्रतिज्ञा करीन कि, “सत्तर साल के बाद, ऊँ फेर से प्रतिज्ञा के देस म लऊटहीं।”

लगभग सत्तर साल के बाद, फारस के राजा कुस्रू बेबीलोन का हरा दईस, एहीसे बेबीलोन के साम्राज्य के बजे फारस के साम्राज्य केतना देसन म सासन करिस। इस्राएली मनई अब यहूदी कहाऊत रए हें। उनखे म से बहुत अपने जीवन का बेबीलोन म बिता द रए हें। बस थोड़ी बुढ़वा यहूदीदीन का हीं यहूदा के देस याद रओ ह।

फ़ारसी मनई बहुत ताकतवर रए हें, पर ऊँ अपने जीते मनईन के ऊपर दया करीन। फ़ारसी मनईन के राजा बने के थोड़ी समय के बाद, कुस्रू एकठे आदेस दईस कि कोनो भी यहूदी जऊन यहूदा का लऊटे का चाहत ह, व फारस से निकल के वापिस यहूदा जा सकत ह । यहो तक कि मंदिर का फेर से बनामा के लाने पइसा दईस। बंधुवाई के सत्तर साल के बाद, यहूदीन के एकठे छोट हस थ्वाक यहूदा म यरुशलेम नगर लऊट आयँ।

जब ऊँ मनई यरुशलेम पहुंचीन तब ऊँ मंदिर का अऊ नगर के चारों कई के दीवार का फेर से बनाईन। फ़ारसी मनई अबहूँ भी उनखे ऊपर सासन करत रए हें पर एक बार फेर से व परतिज्ञा के देस म रहाँ लगें अऊ मंदिर म आराधना करां लगें।