21. परमातिमा मसीह के प्रतिज्ञा करे करथे

जब परमातिमा संसार के सृष्टि करीन, ऊँ जानत रए हें कि उन्हीं बाद म कोनो दिन मसीह का भ्याजाँ का होई। ऊँ आदम अऊ हव्वा से प्रतिज्ञा करिन कि ऊँ अइसा करहीं। ऊँ कहीन कि, “हव्वा से एकठे वंस पईदा लेई जऊन साँप के मुंडी का कुचरी।” जऊन सांप हव्वा का धोखा दईस व सही म शैतान रओ ह। परमातिमा के अर्थ रओ ह कि मसीह पूरा-पूरा शैतान का हरा दईहीं ।

परमातिमा अब्राहम से प्रतिज्ञा करे रए हें कि ओखे द्वारा संसार के सब जाति आसीस पईहीं। परमातिमा बाद म, कउनो समय म मसीह का भ्यजें के द्वारा य प्रतिज्ञा का पूरा करहीं। ऊँ मसीह संसार के हर एक जाति म से मनईन का उनखे पापन से छुड़ईहीं।

परमातिमा मूसा से प्रतिज्ञा करे रए हें कि भविष्य म व मूसा के समान एक ठे दूसर भविष्यवक्ता भेजहीँ। य भविष्यवक्ता मसीह होईहीं। अइसे ही परमतिमा फेर से प्रतिज्ञा करीन कि व मसीह का भेजहीँ।

परमातिमा राजा दाऊद से परतिज्ञा करीन कि वाखर एकठे वंस मसीह होईहीं। व राजा होईहीं अऊ परमातिमा के मनईन पर सदा के लाने सासन करहीं।

परमातिमा यिर्मयाह भविष्यवक्ता से बात करीन अऊ कहीन कि एक दिन ऊँ एकठे नई वाचा बँधहीं। व नई वाचा इस्राएल के साथ म सीनै परबत म बाँधे गे पुरान वाचा के जइसा न होई। जब मनई के साथ ऊँ अपन नई वाचा बंधहीं, त ऊँ उनखे ऊपर अपने आप का व्यक्तिगत रूप से परगट करहीं। सब कोऊ उनही प्रेम करहीं अऊ उन्खर व्यवस्था के पालन करे के इच्छा रखहीं। परमातिमा कहीन कि य उनखे व्यवस्था का उनखे हिरदय म लिख दें के जइसा होई। ऊँ उन्खर मनई होईहीं अऊ परमातिमा उनखे पापन का क्षमा करहीं। ऊँ मसीह होईहीं जऊन उनखे साथ व नई वाचा का बंधहीं।

परमातिमा के भविष्यवक्ता य भी कहीन कि मसीह एकठे भविष्यवक्ता होईहीं। एकठे भविष्यवक्ता व मनई आय जऊन परमातिमा के वचन का सुने करथ अऊ फेर मनईन के ऊपर परमातिमा के सन्देश के ऐलान करे करत थ। जेही भ्यजें के लाने परमातिमा प्रतिज्ञा करीन व मसीह एकठे सिद्ध भविष्यवक्ता होईहीं। मतलब व मसीह परमातिमा के संदेसन का अच्छे से सुनहीं, ऊँ मनईन का व सन्देश अच्छे से सीखईहीं।

इस्राएली याजक मनई के लाने परमातिमा के आगे बलिदान चढ़ामा का चला दईन। य बलिदान मनईन के पाप के लाने उन्हीं परमातिमा द्वारा दण्डित करे जायँ के जगह म चढ़ाव ग रओ ह। याजक मनईन के लाने प्राथना भी करीन पर व मसीह सिद्ध महायाजक होईहीं जऊन परमातिमा के सामने एकठे सिद्ध बालि के रूप म खुद का चढ़ा दईहीं। अऊ ऊँ कबहूँ पाप न करहीं, जब ऊँ खुद का बलि होयँ के लाने दईहीं, त संसार का कोनो भी दूसर बलि के ज़रूरत न रइही।

मनई के झुण्ड म राजा अऊ प्रधान सासन करत रए हें अऊ कबहूँ-कबहूँ ऊँ गलती भी करत रए हें। राजा दाऊद सिर्फ इस्राएलीन पर सासन करिस, पर राजा दाऊद के वंस 'मसीह' पूरा संसार म सासन करी अऊ ऊँ सदा के लाने सासन करहीं। एखे अलावा ऊँ हमेशा न्यायपूर्ण रीती से सासन करही, अऊ सही फैसला लईहीं।

परमातिमा के भविष्यवक्तन मसीह के बारे म बहुत से बातन का कहिन। उदाहरण के लाने, मलाकी कहिस कि मसीह के आय से पहिले एकठे भविष्यवक्ता अई। व भविष्यवक्ता बहुत महत्वपूर्ण होई। एखे अलावा, यशायाह भविष्यवक्ता लिखिस कि मसीह एकठे कुंवारी से जनम लईहीं। अऊ मीका भविष्यवक्ता कहिस कि मसीह बैतलहम नगर म जनम लईहीं।

यशायाह भविष्यवक्ता कहिस कि मसीह गलील के क्षेत्र म वास करहीं। जऊन मनई बहुत दुखी हें मसीह उन्हीं शांति दईहीं। ऊँ कैदीन का भी स्वतन्त्र करहीं मसीह बीमारन का अऊ जऊन सुन नई सकयँ, देख नई सकयँ, बोल नई सकयँ, चल नई सकयँ उन्हीं भी चंगा करहीं।

यशायाह भविष्यवक्ता य भी कहिस कि मनई मसीह से नफरत करहीं अऊ स्वीकार करे से मना कर दईहीं। दूसर भविष्यवक्ता कहीन कि मसीह के एकठे साथी उनखे खिलाफ उठी। जकर्याह भविष्यवक्ता कहिस कि उन्खर य साथी अइसा करे के लाने दूसर मनईन से चांदी के तीस सिक्का लेई। एखे अलावा कुछ भविष्यवक्ता कहीन कि मनई मसीह का मार डलहीं, अऊ य कि ऊँ उनखे कपड़ा के लाने जुआ खेलहीं।

भविष्यवक्ता य भी बातें कि मसीह कैसे मरहीं। यशायाह भविष्यवाणी कहीस कि मनई मसीह के ऊपर थूंकहीं, उन्खर मज़ाक उड़ईहीं, अऊ उन्हीं पिटहीं। ऊँ उन्हीं भाला छेद दईहीं अऊ ऊँ बड़ी पीड़ा म अऊ यातना म मर जईहीं जबकि ऊँ कुछू गलत नई करे रय होईहीं।

भविष्यवक्ता य भी बताईन कि मसीह पाप करहीं। ऊँ सिद्ध होईहीं। पर ऊँ एखे लाने मरहीं कहेसे कि परमातिमा उन्हीं दूसर मनईन के पाप के कारन दंड दईहीं। उनखे मरे से मनई परमातिमा के साथ मेल करे म सक्षम होईहीं। एही से परमातिमा चाहत हें कि मसीह मराँ।

भविष्यवक्ता य भी बताईन कि परमातिमा मसीह का मरे म से ज़िंदा करहीं। य दर्शाऊत ह कि य सब नई वाचा का बांधे के परमातिमा के योजना आय, ताकि ऊँ व मनईन का बचा सकयँ जऊन उनखे खिलाफ पाप करे रए हें।

परमातिमा भविष्यवक्तन के ऊपर मसीह के बारे म बहुत सारा बात परगट करे रए हें पर मसीह ऊँ भविष्यवक्तन म से कोनो के भी जीवन काल म नई आय रहें। ईं भविष्यवाणीन के दय जायँ के चार सौ से ज्यादा साल के बाद सही समय म परमातिमा, मसीह का य संसार म भेजहीं।