22. यूहन्ना के जनम

अतीत म, परमातिमा अपन भविष्यद्वक्ततन से बात करीन एहीसे ऊँ मनईन से बात कर सकत रए हें । पर व समय से लइके फेर 400 साल के बीत तक ऊँ उनखे से बात नई करीन । तब परमातिमा जकर्याह नाम के भविष्यद्वक्तन के पास एकठे स्वर्गदूत क भेजीन । जकर्याह अऊ वाखर मेहेरिआ एलीशिबा परमातिमा के आदर करत रए हें । ऊँ बहुत बूढ़वा होई ग रए हें, अऊ उनखे कोनो संतान नई रहो ।

व स्वर्गदूत जकर्याह से कहीस, "तोर मेहेरिआ के एकठे बेटवा पईदा होई । ते वाखर नाम यूहन्ना रखे । परमातिमा ओही पवित्र आत्मा से परिपूर्ण करी, अऊ यूहन्ना मनई क मसीह का स्वीकार करे के लाने तैयार करी।" जकर्याह जवाब दईस, "मैं अऊ मोर मेहेरिआ संतान पईदा करे के लाने बहुत बूढ़वा हन! मैं कइसे जानो कि ते मोसे सच कहते हस?"

व स्वर्गदूत जकर्याह क जवाब दईस, "तोरे पास य शुभ संदेश क लामे के लाने मैं परमातिमा के द्वारा भेजे गय हों । कहेसे कि ते मोरे ऊपर विश्वास नई करे, एहिसे लरकन के जनम लयँ तक तें बोल न पईहे।" तुरत ही, जकर्याह बोले म असमर्थ होई ग । तब व स्वर्गदूत जकर्याह के पास से चलो ग। एखे बाद, जकर्याह घर लऊट आओ अऊ वाखर मेहेरिआ गर्भवती होई ।

जब एलीशिबा छः महीने के गर्भवती रई ही, त व स्वर्गदूत अचानक से एलीशिबा के रिश्तेदारन पर प्रकट होई ग, जेखर नाम मरियम रओ ह। मरियम कुँवारी रई ही अऊ सादी होयँ के लाने यूसुफ नाम के मनई के साथ वाखर मंगनी होई ग रओ ह। स्वर्गदूत कहीस, "ते गर्भवती होइहें अऊ एकठे बेटवा क जनम दईहे । तोही वाखर नाम यीशु रख का पड़ी। व सर्व-शक्तिमान परमातिमा के बेटवा होई अऊ हमेशा के लाने सासन करी।"

मरियम जवाब दईस, "य कईसे होई, कहेसे मैं तो कुँआरी हों?" व स्वर्गदूत समझाईस, "पवित्र आत्मा तोरे ऊपर अई, अऊ परमातिमा के सामर्थ तोरे ऊपर छा जई। एहीसे व बच्चा पवित्र होई, अऊ व परमातिमा के बेटवा होई।" जऊन व स्वर्गदूत कहीस ओखे ऊपर मरियम विश्वास करीस।

य होयँ के तुरत बाद, मरियम जाके एलीशिबा से भेंट करीस । जईसे ही मरियम ओही नमस्कार करीस, एलीशिबा के बच्चा ओखे भीतर उछलीस। उनखे लाने परमातिमा जऊन करे रए हें ओखे कारन ऊँ मेहेरिआ एक साथ खुश होई गईं। एलीशिबा के साथ तीन महीना रहे के बाद, मरियम घर लौट आई।

एखे बाद, एलीशिबा अपन बेटवा का जनम दईस। जकर्याह अऊ एलीशिबा व बालक के नाम यूहन्ना रखीन, जईसा कि व स्वर्गदूत आदेस दय रए हें। तब परमातिमा जकर्याह क बोले म सक्षम करीन। जकर्याह कहीस, "परमातिमा के स्तुति हो, कहेसे कि ऊँ अपने मनईन के सहायता करे क याद रखीन! हे मोर बेटवा, ते सर्व-शक्तिमान परमातिमा के भविष्यद्वक्ता होईहे। ते मनईन क बतईहे कि ऊँ कइसे अपन पाप से क्षमा पा सकहीं! "