23. यीशु के जनम

यूसुफ नाम के एकठे धर्मी मनई के साथ मरियम के मंगनी होई ग रओ ह । जब व सुनीस कि मरियम गर्भवती हिबा त व जानत रओ ह कि व वाखर लरका न हो। पर, व मरियम क बदनाम नई करे का चाहत रहो आय, एहीसे व ओखे ऊपर दया करके अऊ ओही चुपचाप तलाक दें क सोचीस। पर एसे पहिले कि व अइसा करत, एकठे स्वर्गदूत ओखे सपना म आके ओसे बात करीस।

व स्वर्गदूत कहीस, "हे यूसुफ, मरियम क अपन मेहेरिआ के रूप म लइके आय से न डेरा। ओखे भीतर जऊन लरका हबा व पवित्र आत्मा के तरफ़ से हवय। व एकठे बेटवा क जनम देई। उन्खर नाम यीशु रख्या (ज्याखर अर्थ हबा, "यहोवा बचाय करा रए हें"), व मनईन क उनखे पापन से बचईहीं।"

यूसुफ मरियम से सादी करीस अऊ ओही अपन मेहेरिआ के रूप म घर ले आईस, पर ओखे लरका के जनम दें तक व ओखे साथ नई सोओ।

जब मरियम के जनम देय के समय निकट रओ ह, त व अऊ यूसुफ बैतलहम जाएँ के लाने एकठे लंबी यात्रा करिस। उनहीं हून जाएँ ही क रओ ह कहेसे रोमी अधिकारी इस्राएल म रहाँ वाले सब मनईन के गिनती करे क चाहत रए हें। ऊँ चाहत रए हें कि सब मनई हून जाएँ जहाँ उनखर पूर्वज रहत रए हें। राजा दाऊद के जनम बैतलहम म भ रओ ह, मरियम अऊ यूसुफ दोनों के व पूर्वज रओ ह।

मरियम अऊ यूसुफ बैतलहम गें, पर हून जानवरन के रहाँ वाले जगह के अलावा उनखर रुके के लाने कोनो अऊ जगह नई रहो। वहे जगह रओ ह जऊन मरियम अपन बच्चा क पईदा करिस। व ओही चरनी म सोवा दईस कहेसे कि हून ओखे लाने कोनो बिस्तर नई रहो। ऊँ वाखर नाम यीशु रखिन।

व रात, हून पास के खेत म थोड़ी से चरवाहा अपन भेंड़ के थोआक के रखवाली करत रए हें। अचानक से, एकठे चमकदार स्वर्गदूत उनखे ऊपर परगट होईगें, अऊ ऊँ डेरा गें। व स्वर्गदूत कहीस, "न डेरा, कहेसे मोरे पास तुम्हरे लाने शुभ संदेश हबा। बैतलहम म मसीह, स्वामी के जनम भ हवय!"

जाके व बच्चा का ढूंढा, अऊ तुम ओही कपड़ा म लिपटे अऊ चरनी म सोए पईहा।" अचानक से, आकाश स्वर्गदूतन से भर ग। ऊँ परमातिमा के स्तुति करत रए हें । ऊँ कहीन, "सब महिमा स्वर्ग म विराजमान परमातिमा क महिमा मिले। पृथ्वी पर ऊँ मनईन म शान्ति हो जिनखर ऊँ चिन्ता करां थें!"

तब स्वर्गदूत चले गें । ऊँ चरवाहा भी अपन भेंड़न क छोड़ के बच्चा क द्याखँ गें। तुरते ही ऊँ व जगह म पहुँच गें जऊन जगह यीशु रओ ह अऊ ऊँ ओही चरनी म सोऊत पाईन, जइसा कि व स्वर्गदूत कहे रए हें । ऊँ बहुत उत्साहित रए हें । तब ऊँ चरवाहा वापिस हून लऊट गें जहाँ उनखर भेड़ रई हीं। ऊँ जऊन कुछु भी सुनीन अऊ देखिन व सब के लाने ऊँ परमातिमा के स्तुति कर रए हें ।

पूर्व म दूर एकठे देश म कुछ मनई रए हें । ऊँ सितारन के अध्ययन करे करत रए हें अऊ ऊँ बहुत बुद्धिमान रए हें । ऊँ एकठे असामान्य सितारा क आकाश म देखिन । ऊँ कहीन कि याखर अर्थ हबा कि यहूदियन के एकठे नया राजा के जनम भ हबा । एखे लाने ऊँ व बच्चा क द्याखा के लाने अपन देश से यात्रा करे के निर्णय करीन। एकठे लंबा यात्रा के बाद, ऊँ बैतलहम आईन अऊ व घर क पाईन जऊन घर म यीशु अऊ उन्खर माता-पिता रुके रए हें ।

जब ईं मनई यीशु क अपन महतारी के साथ देखिन त ऊँ घुटने टेक के उन्खर आराधना करीन। ऊँ यीशु क कीमती उपहार दईन। फेर ऊँ घर वापिस लऊट गें।