27. दयालु सामरी के कहानी

एक दिन, यहूदी व्यवस्था के एकठे विशेषज्ञ यीशु के पास आओ । व सब क य दिखामा का चाहत रओ ह कि यीशु गलत तरीका से शिक्षा देत हें । एहीसे व कहीस, "हे गुरु, अनन्त जीवन पामा के लाने मैं का करों?" यीशु जवाब दईन, "परमातिमा के व्यवस्था म का लिखो ह?"

व मनई कहीस, “व कहा थी कि अपने परमातिमा से अपन सारा मन, प्राण, सामर्थ, अऊ बुद्धि से प्रेम कर । अऊ अपन पड़ोसी से अपन समान प्रेम कर ।" यीशु जवाब दईन, "ते एकदम सही हस ! यदि ते अइसा करीहे, त तोही अनन्त जीवन मिल जई ।"

पर व व्यवस्था के विशेषज्ञ मनईन क दिखामा का चाहत रओ ह कि वाखर जीवन जीएं के तरीका सही हबा। एहीसे व यीशु से पूछीस, "ठीक ह, त मोर पड़ोसी को आए?"

यीशु व व्यवस्था के विशेषज्ञ मनई क एकठे कहानी बतामा के द्वारा जवाब दईन । "एकठे यहूदी मनई रओ ह जऊन एकठे सड़क से होईके यरूशलेम से यरीहो के यात्रा करत रओ ह ।"

"पर कुछ डाकुं ओही देखिन अऊ ओखे ऊपर हमला कर दईन । ऊँ वाखर सब कुछ लई लईन अऊ ओही लगभग मर जाएं तक मारीन -पीटीन । तब ऊँ चले गें ।"

"ओखे तुरत बाद, एकठे यहूदी याजक वहे सड़क से होईके गुजरत रओ ह । व याजक व मनई क सड़क म पड़े देखिस । जब व ओही देखिस त व सड़क के दूसर तरफ जाके आगे बढ़ गा । व वहे मनई क पूरी तरह से अनदेखा कर दईस ।"

"एखे बाद थोड़ी से समय बीते के बाद, एकठे लेवी व सड़क म आओ (लेवी यहूदियन के एकठे गोत्र रओ ह जऊन मंदिर म याजक के सहायता करे करत रओ ह) । व लेवी भी सड़क के दूसर तरफ से निकल ग। वहो भी व मनई क अनदेखा कर दईस ।"

"अऊ एक झन जऊन व सड़क म आओ व सामरिया के एकठे मनई रओ ह । (सामरी अऊ यहूदी एक दूसर से नफरत करत रए हें) । व सामरी सड़क म व मनई क देखिस । व देखिस कि व यहूदी आए, पर तबहूँ भी व ओखे ऊपर बड़ा तरस खाईस । अऊ व ओखे पास गा अऊ ओखे घाव म पट्टि बाँधीस ।"

"फेर व सामरी व मनई क अपन गदहा ऊपर डालिस अऊ ओही व सड़क से एकठे सराय म लईगा । जहेमा व वाखर देखभाल करें क जारी रखिस ।"

अगले दिन, व सामरी क अपन यात्रा क जारी रखा के आवश्यकता रई ही । व वहे सराय के प्रभारी मनई क कुछ धन दईस । अऊ व ओसे कहीस, "य मनई के देखभाल करे । अगर य धन के अलावा तोर कुछ अऊ धन खर्च होई जई त वापस आये के बाद मैं तोर ऊँ खर्चन का भर दईहों ।"

फेर यीशु व व्यवस्था के विशेषज्ञ से पूछीन, "तुम का सोचते ह? ईं तीन मनईन म से कऊन व मनई के पड़ोसी हबा जऊन लूटररो अऊ पीटररो रओ ह?" व जवाब दईस, "वहेन जऊन ओखे ऊपर दया करीस।" यीशु ओसे कहीन, "ते जा अऊ अइसे ही करे ।"