40. यीशु क क्रूस म चढ़ाव जात ह।

यीशु के ठट्ठा करे के बाद, सैनिक उन्हीं क्रूस म चढ़ामा के लाने लई गें। ऊँ व क्रूस क उन्हीं से उठवाईन जेखे ऊपर ऊँ मरहीं।

ऊँ सैनिक यीशु क व जगह म लईके आएँ जऊन "खोपड़ी" कहाऊत रओ ह अऊ ओखे हाथ अऊ पैर क क्रूस म ठोक दईन। पर यीशु कहीन, "हे पिता, इन्हीं क्षमा कर, कहेसे ईं नई जानत हें कि ईं का करत हें।" ऊँ एकठे तख्ती क भी उन्खर सिर के ऊपर टांग दईन। वमा लिखो रओ ह, "यहूदियन के राजा।" पिलातुस उन्हीं यहे लिखा के लाने कहे रओ ह।

तब सैनिक यीशु के कपड़ा के लाने चिट्ठि डालीन। जब ऊँ अइसा करीन त ऊँ व भविष्यद्वाणी क पूरा करीन जऊन कहत रई हीं, "ऊँ मोरे कपड़ा क आपस म बाँट लईहीं, अऊ मोरे कपड़ा के लाने चिट्ठी डलहीं।"

हुन दूट्ठे डाकू भी रए हें, जिनहीं सैनिक वहे समय म क्रूस म चढ़ाय रओ ह। ऊँ उन्हीं यीशु के दोनों तरफ रखे रए हें । उनमन से एकठे डाकू यीशु के मजाक उड़ाईस, पर दूसर कहीस, "का ते नई डरते हस कि परमातिमा तोही दंड दईहीं? हम बहुत सारा बुरा काम क करे के दोषी हवन, पर य मनई निर्दोष हबा।" फेर व यीशु से कहीस, "जब ते अपन राज्य म आए त कृपया मोही याद रखे।" यीशु जवाब दईन, "आज ही ते मोरे साथ स्वर्गलोक म होईहे।"

यहूदी अगुवाँ अऊ भीड़ के दूसर मनई यीशु के मजाक उड़ाईन। ऊँ ओसे कहीन, "अगर ते परमातिमा के बेटवा हस, त क्रूस से नीचे उतर आ अऊ खुद क बचा ले! तब हम तोरे ऊपर विश्वास करब।"

तब व पूरा देश के आकाश पूरा-पूरा काला होई ग, भले ही व दुपहरी के समय रओ ह। य दुपहरी के समय काला होई ग रओ ह अऊ तीन घंटा तक अइसे ही रहो आए।

तब यीशु पुकार के कहीन, "पूरा होइग! हे पिता, मैं अपन आत्मा तोरे हाथ म सँऊपत हों।" तब ऊँ अपन मुंडी क झुकाईन अऊ अपन प्राण क त्याग दईन। जब ऊँ मरे त एकठे भूकम्प आओ। व बड़ा पर्दा जऊन परमातिमा के उपस्थिति से मनईन क अलग करत रओ ह ऊपर से नीचे के तक फट के दू टुकड़ा होई ग।

अपन मृत्यु के द्वारा, यीशु मनईन के लाने परमातिमा के पास आमा के रास्ता खोल दईन। जब यीशु के निगरानी करा वाला एकठे सैनिक जऊन कुछू भ रओ ह य सब देखिस त व कहीस, "सचमुच, य मनई निर्दोष रओ ह। य परमातिमा का बेटवा आए।"

तब यूसुफ अऊ नीकुदेमुस नाम के दूट्ठे यहूदी अगुवा आएं। ऊँ विश्वास करत रए हें कि यीशु ही मसीह रए हें। ऊँ पिलातुस से यीशु के शरीर क माँगीन। ऊँ ओखे शरीर क कपड़ा म लपेटीन। तब ऊँ उन्हीं एकठे चट्टान म काट के बनाओ ग कब्र म लई गें अऊ ओखे भीतर रख दईन। तब ऊँ व कब्र के द्वार क बंद करे के लाने एकठे बड़ा पत्थर क लुढ़का दईन।