41. परमातिमा यीशु क मरे म से जिलाऊत ह

सैनिकन द्वारा यीशु क क्रूस म चढ़ा दें के बाद, यहूदी अगुवन पिलातुस से कहीन, "व झूठा, यीशु कहे रए हें कि व तीन दिन के बाद मरे म से जी उठी । कोनो क य निश्चित करे के लाने कब्र के निगरानी करा क होई कि उन्खर चेला उन्खर द्याँह क चुरा के न लई जाएँ। अगर ऊँ ऐसा करत हें त ऊँ कहीं कि व मरे म से जी उठो ह ।"

पिलातुस कहीस, "कुछ सैनिक क लई जा, अऊ जईसा तुम कर सकते ह वईसा कब्र के निगरानी करा ।" एहीसे ऊँ व कब्र के प्रवेश द्वार के पत्थर म एकठे मोहर लगा द रए हें । ऊँ य निश्चित करा के लाने हुन सैनिकन क भी बैठा दईन कि कोऊ भी उन्खर द्याँह क चुरा न सका ।

यीशु के मरे के बाद के दिन सब्त के दिन रओ ह । कोऊ भी सब्त के दिन काम नई कर सकत रओ ह, एहीसे यीशु क कोऊ भी मित्र कब्र म नई आओ रओ ह । पर सब्त के बाद के दिन, सुबह बहुत भोर क, कुछ मेहेरिआ यीशु के कब्र म जाएं के लाने तैयार भईं । ऊँ उन्खर द्याँह म अऊ भी मसालन क लगामा क चाहत रई हीं ।

ऊँ मेहेरिअन के पहुँचे से पहिले, कब्र म एकठे बड़ा भूकम्प भ । स्वर्ग से एकठे स्वर्गदूत व पत्थर क लुढ़का दईस जऊन कब्र के प्रवेश द्वार क ढाँके रओ ह अऊ व म बैठ ग। य स्वर्गदूत उजियाले के समान चमक रओ ह । कब्र म जऊन सैनिक रए हें ऊँ व देखिन । ऊँ एतना डर गें रए हें कि मृतकन के समान भूईयाँ म गिर गें।

जब ऊँ मेहेरिआ कब्र म पहुँचीं त व स्वर्गदूत उनही कहीस, "मत डेरा । यीशु यहाँ नई ह । व मरे म से जी उठे हें, जईसा कि व कहे रए हें कि ऊँ जी उठहीं ! कब्र म खोजा अऊ देखा ।" ऊँ मेहेरिआ कब्र के भीतर अऊ जहाँ यीशु के द्याँह रखो रओ ह हुन खोज के अऊ देखिन कि उन्खर द्याँह हुन नई रओ ह !

तब व स्वर्गदूत उन मेहेरिअन से कहीस, "जाके उन्खर चेला क बताबा, 'यीशु मरे म से जी उठे हें अऊ व तुम्हरे आगे-आगे गलील क जई ।'"

ऊँ मेहेरिआ अचम्भित होई गईं अऊ बहुत ख़ुश भईं । ऊँ चेला क य शुभ संदेश सुनामा के लाने दौड़ीन ।

जब ऊँ मेहेरिआ चेला क य शुभ संदेश बतामा के लाने अपन मार्ग म रई हीं, त यीशु उनखे म प्रगट होई गें । ऊँ उन्खर पैर म गिर गईं । तब यीशु कहीन, "मत डेरा । जाके मोरे चेला से गलील जाएं क कहा । ऊँ हुन मोही देखहीं ।"