43. कलीसिया के आरम्भ होत हबा

यीशु के स्वर्ग लऊट जाएं के बाद, चेला यरूशलेम म ही रुकिन जईसा कि यीशु उन्हीं करे का आदेश दए रए हें । हुन के विश्वासी मनई लगातार एक साथ प्रार्थना करे के लाने इकट्ठा होये करत रए हें ।

पहर साल, फसह के पर्व के 50 दिन के बाद, यहूदी मनई पिन्तेकुस्त नाम के एक महत्वपूर्ण दिन क मनाए करत रए हें । पिन्तेकुस्त व समय रओ ह जब यहूदी मनई गेहूँ के कटाई क मनाए करत रए हें । सारा संसार से यहूदी मनई पिन्तेकुस्त के दिन क एक साथ मनामा के लाने यरूशलेम म आए रए हें । य साल, पिन्तेकुस्त मनामा के समय यीशु के स्वर्ग क चले जाएं के लगभग एक सप्ताह के बाद आओ रओ ह ।

जऊन समय सब विश्वासी मनई एक साथ इकट्ठा रए हें, त जऊन घर म ऊँ रए हें अचानक से व तेज हवा के आवाज से भर ग । तब आग के लपट के जईसा दिखे वाला कुछु सब विश्वासिन के मुंडी के ऊपर परगट होई ग । ऊँ सब पवित्र आत्मा से भर गें अऊ ऊँ अन्य भाषा म परमातिमा के स्तुति करा लगें । य व भाषा रई हीं जिनहीं बोला के लाने उन्हीं पवित्र आत्मा सक्षम करे रओ ह ।

जब यरूशलेम म रहाँ वाले मनई व शोर क सुनीन, त ऊँ भीड़ के रूप म य द्याखा के लाने एक साथ आए कि का हो रओ ह । ऊँ विश्वासिन क परमातिमा द्वारा करो ग बड़ा-बड़ा काम के घोषणा करत सुनीन । ऊँ चकित रए हें कहेसे कि ऊँ व कामन क अपने ही भाषा म सुनत रए हें ।

इनमन से कुछ मनई कहीन कि ऊँ चेला नशा म रए हें । पर पतरस खड़ा होईके अऊ उनसे बोलो, "मोर बात सुना! य मनई नशा म नई हें! एखे बजाए, जऊन तुम देखते ह व वहे आए जऊन योएल भविष्यद्वक्ता कहे रओ ह कि होई परमातिमा कहीन, 'अंत के दिन म, मैं अपन आत्मा उंडेली हों ।'"

"हे इस्राएली मनईन, यीशु एकठे अईसा मनई रओ ह जऊन य दिखामा के लाने कि ऊँ को रए हें बहुत से अनोखा काम करे रए हें । ऊँ परमातिमा के सामर्थ से बहुत से अद्भुत काम क करीन । तुम य जनते ह, कहेसे तुम ईं कामन क देखे ह। पर तुम ओही क्रूस म चढ़ा दया!"

"यीशु मर ग पर परमातिमा ओही मरे म से जिन्दा कर दईन । य व बात क पूरा कर दईन जेही एकठे भविष्यद्वक्ता लिखे रओ ह, 'तुम अपने पवित्र जन क कब्र म सड़ा न दईहा ।' हम गवाह हन कि परमातिमा यीशु क फेर से जिन्दा कर दईन ।"

"परमातिमा पिता अब यीशु क अपन दाहिना तरफ़ बईठा के ओही आदर दईन हीं । अऊ यीशु हमरे लाने पवित्र आत्मा भेजी हीं कहेसे कि ऊँ प्रतिज्ञा करे रए हें कि ऊँ भेजहीं । पवित्र आत्मा ऊँ कामन क होएं दे रए हें जिनहीं तुम देख रए ह अऊ सुन रए ह।"

"तुम व मनई, यीशु क क्रूस म चढ़ा दया । पर निश्चित रूप से जान ल्या कि परमातिमा यीशु क सब चीज़न म प्रभु अऊ मसीह दोनों ठहराईन हें!"

पतरस क सुना वाले मनई ओखे द्वारा कहो ग बात क सुनके अंदर तक हिल ग रए हें । एहिसे ऊँ पतरस अऊ चेलन से पूछीन, "हे भाई, हमही का करा क चाही ?"

पतरस उनही जवाब दईस, "तुम म से हर एक अपन पाप के लाने पश्चाताप करा ताकि परमातिमा तुम्हरे पाप क क्षमा कर दें, अऊ यीशु मसीह के नाम से बपतिस्मा ल्या । तब व तुमही वरदान स्वरूप पवित्र आत्मा भी दईहीं ।"

पतरस जऊन कहीस व म लगभग 3,000 मनई विश्वास करीन अऊ यीशु के चेला बन गें । ऊँ बपतिस्मा लईन अऊ यरूशलेम के कलीसिया के हिस्सा बन गें ।

जब प्रेरित उन्हीं शिक्षा दईन त विश्वासी लगातार सुनिन। अऊ ऊँ अक्सर मिले करत रए हें अऊ एक साथ भोजन करे करत रए हें, अऊ ऊँ अक्सर एक-दूसरेन के लाने प्रार्थना करीन । ऊँ मिल के परमातिमा के स्तुति करीन अऊ जऊन कुछू भी उनखे पास रओ ह ऊँ एक-दूसरेन के साथ साझा करीन । नगर के हर एक मनई उनखे लाने अच्छा विचार रखत रओ ह । प्रतिदिन, ज्यादा से ज्यादा मनई विश्वासी बनत गें ।