48. यीशु प्रतिज्ञा करे मसीह आए

जब परमातिमा संसार क बनाईन त सब कुछ अच्छा रओ ह । कोऊ पापी नई रओ ह । आदम अऊ हव्वा एक-दूसर क प्रेम करत रए हें, अऊ ऊँ परमातिमा से प्रेम करत रए हें । कोनो बीमारी या मृत्यु नई रई ही । परमातिमा अइसे ही संसार क चाहत रए हें ।

शैतान साँप के माध्यम से बगईचा म हव्वा से बात करीस, कहेसे व ओही धोखा दें क चाहत रओ ह । तब हव्वा अऊ आदम परमातिमा के विरुद्ध पाप करीन । कहेसे ऊँ पाप करे रए हें एहीसे पृथ्वी म रहाँ वाले सब झन मरत हें ।

कहेसे आदम अऊ हव्वा पाप करे रए हें, एहीसे कुछ अऊ भी बुरा भ । ऊँ परमातिमा के शत्रु बन गें । तब से हर एक झन पाप करत आऊत ह । हर एक झन जनम से ही परमातिमा के शत्रु ह । परमातिमा अऊ मनईन के बीच म शान्ति नई रई ही । पर परमातिमा शान्ति स्थापित करा क चाहत रओ ह ।

परमातिमा प्रतिज्ञा करीन कि हव्वा के एकठे वंशज शैतान के मुंडी क कुचरी । व य भी कहीन कि शैतान उनखे एड़ी क डसी । दूसर शब्द म, शैतान मसीह क मार डाली, पर परमातिमा उनही फेर से जिन्दा कर दईहीं । एखे बाद, मसीह शैतान के शक्ति क हमेशा के लाने समाप्त कर दई हीं । कई सालन के बाद, परमातिमा प्रगट करीन कि व मसीह यीशु हें ।

परमातिमा व बाढ़ से अपन परिवार क बचाईन जेही ऊँ लामा वाला रए हें । नूह से एकठे नाव बनामा के लाने कहीन कि ऊँ य प्रकार से परमातिमा ऊँ मनईन क बचाईन जऊन व म विश्वास करत रए हें । यहे प्रकार, ऊँ सब के सब परमातिमा के द्वारा मार डाले जाएं के योग्य रए हें कहेसे ऊँ पाप करे रए हें । पर परमातिमा ऊँ सब क बचामा के लाने यीशु क भेजिन जऊन व म विश्वास करत हें ।

सैकड़ों साल तक, याजक परमातिमा के लाने बलिदान चढ़ाऊत रए हें । य दर्शाऊत ह कि मनई पाप करीन हीं, अऊ य कि ऊँ परमातिमा के द्वारा उन्हीं दंड दए जाएं के योग्य रए हें । पर ऊँ बलिदान उनखे पापन क क्षमा नई करत रए हें । यीशु सबसे बड़ा महायाजक ह। ऊँ व करीन जऊन कोऊ याजक नई कर सकत रओ ह । ऊँ व एक मात्र बलिदान होएं के लाने खुद क दई दईन जऊन हर कोनो के पापन क मिटा सकत रओ ह । ऊँ स्वीकार करीन कि परमातिमा ऊँ सब के पापन के लाने ओही दंड दईन हीं । य कारण, यीशु सिद्ध महायाजक रए हें ।

परमातिमा अब्राहम से कहीन, "मैं तोरे द्वारा संसार के सब कुल क आशीष दईहों ।" यीशु यहे अब्राहम के वंशज रए हें । परमातिमा अब्राहम के माध्यम से सब कुल क आशीष देत हें, कहेसे जऊन यीशु म विश्वास करत हें परमातिमा ऊँ सब क पाप से बचाऊत हें । जब ईं मनई यीशु म विश्वास करत हें, त परमातिमा उन्हीं अब्राहम के वंश मानत हें ।

परमातिमा अब्राहम से कहीन कि व अपन निज बेटबा क, ओखे लाने बलिदान कर दे । पर फेर परमातिमा इसहाक के बदले म बलि करा के लाने एकठे मेमना दईन । हम सब अपन पापन के लाने मार डाले जाय के योग्य रए हन ! पर परमातिमा हमरे जगह म मरे के लाने यीशु क बलिदान के रूप म दईन । यहे कारण से हम यीशु क परमातिमा के मेमना कहत हन ।

जब परमातिमा मिस्र म अंतिम विपत्ति भेजीन त ऊँ हर एकठे इस्राएली परिवार से कहीन कि ऊँ एकठे मेमना क बलि करा । व मेमना म कोनो दोष नई हों चाहि। तब अपन दरवाजा के चौखट के ऊपर अऊ बगल म ओखे लहू क लगामा क रओ ह । जब परमातिमा व लहू क देखिन त उन्खर घर से आगे बढ़ गें अऊ उनखर पहलौठा बेटबा क नई मारीन । जब य भ त परमातिमा एही फसह के पर्व कहीन ।

यीशु फसह के पर्व के एकठे मेमना के तरह हें । ऊँ कभी पाप नई करीन, एहीसे यीशु म कुछ भी गलत नई रओ ह । ऊँ फसह के पर्व के समय मरो । जब कोऊ यीशु म विश्वास करत ह, तब यीशु के लहू व मनई के पापन के कीमत चुकाऊत ह । य अइसा ह जईसे कि परमातिमा व मनई के पास से आगे बढ़ गें, कहेसे व ओही दण्ड नई देत हें ।

परमातिमा इस्राएली मनईन के साथ एकठे वाचा बाँधीन, कहेसे ऊँ अइसे मनई रए हें जिनहीं परमातिमा अपन होएं के लाने चुने रए हें । पर अब परमातिमा एकठे अइसा वाचा बाँधीन हें जऊन कि सब के लाने ह । अगर कोनो भी जाति के कोऊ भी झन य नई वाचा क स्वीकार करत ह, त व परमातिमा के मनईन म शामिल होई जात ह । व अइसा एहीसे करत ह कहेसे व यीशु म विश्वास करत ह ।

मूसा एकठे अइसा भविष्यद्वक्ता रओ ह जऊन परमातिमा के वचन क बड़ी सामर्थ के साथ प्रचार करे रओ ह । पर यीशु सब भविष्यद्वक्ता म सबसे बड़ा हें । ऊँ परमातिमा हें, एहीसे जऊन कुछ भी ऊँ करीन अऊ कहीन व परमातिमा के कार्य अऊ वचन रए हें । एहीसे पवित्र-शास्त्र यीशु क परमातिमा के वचन कहत ह ।

परमातिमा राजा दाऊद से प्रतिज्ञा करे रए हें कि राजा के रूप म ओखर एकठे वंश परमातिमा के मनईन म सदा के लाने शासन करी । यीशु परमातिमा के बेटबा अऊ मसीह हें, एहीसे व राजा दाऊद के वंश हें जऊन सदा के लाने राज्य कर सकत हें ।

दाऊद त इस्राएल के राजा रओ ह, पर यीशु सारे जगत के राजा हें ! व फेर से अईहीं अऊ सदा के लाने न्याय अऊ शान्ति के साथ अपन राज्य म शासन करीहीं ।