23. यीशुआ रा जन्म होणा
युसुफ नामा रे धरमी आदमीया कने मरियमा रा रिसता हुई गया था। जब तिसो पता लगया बी मरियम पेटा तेई तो तिसो पता था बी ऐ मेरा बच्चा नीआ।पर,से मरियमा री बेजती नी करना चा था, इते खतर तिने तिसा पर दया किती ओर तिसा जो तलाक देने री सोची।पर इते पेले से ऐडा करदा, ईक स्वर्गदुता ने तिसरे सुपने च आईके बात किती।
स्वर्गदुते बोलया, “हे युसुफ, मरियमा जो अपनी घरवाली बनाने ते मत डर। तिसारे पेटाच जो बच्चा से पवितर आतमा रे तरफा तेआ। तिसा रे ईक बेटा हुणा। तिसरा नाव यीशु रखना (जिते रा मतलब “यहोवा बचा”) से लोका जो पापा ते बचागा।”
तब युसुफा ने मरियमा कने बया करीला ओर तिसा जो घराली बनाई के करे लेई आया, तिसा रे बच्चा हुणे तक से तिसा रे नजदिक नी गया।
मरियमा रे बच्चे हुणे रा समय नेडे था, तिसे ओर युसुफे ने बेतलहम जाणे री लम्बी यात्रा किती। तिना जो तिथी जाणा जरुरी था तिथी रोमी अधिकारी इसराइला च रेणे वाले सारे लोका री गिनती करना चा थे। से चा ते सारे लोक तिथी जावो जिथी तिनारे बर्जुग रेया थे। राजा दाऊदा रा जन्म बेतलहमा च हुआ था, ओर से मरियम ओर युसुफा दोनो रे पुरखे थे।
मरियम ओर युसुफ बैतलहम गे, पर तिथी पसु रखने री जगह ते लवा तिना रे ठेरने री कोई जगह नी थी। सेई जगह थी जिथी मरियमा ने अपने बच्चे जो पैदा कितया। तिसे बच्चे जो चरनी च सुलाया पर तिथी तिस खतर कोई बिसतर नी था। तिने तिसरा नाव यीशू रखया।
तिस राती, नेडे ई तिथी पैड बकरीया चराने वाले चरवाहे रखवाली करने लगीरे थे। तबी, ईक चमकदा सवर्गदुत आया, तब से डरीगे, तिस सवर्गदुते बोलया, “डरो नी, अऊ तुसा खतर सुख सनदेंस लयाईरा। आज दाऊदा रे नगर बेतलहमा च तुसा खतर मुक्तिदाता पैदा हुई रा से ई मसीह ओर प्रभु आया।”
जावो ओर तिसो टोलो, ओर तुसा जो से कपडे च लिपटिरा ओर चरनीया च लेटीरा मिलना। तबी आसमाण सवर्गदुता कने परीगा। से परमेसवरा री अरादना करने लगीरे थे। तिने बोलया, “सारा गुणगान सवर्गा च रेणे वाले परमेसवरा जो मिलो। तरतिया पर तिना लोका जो सकुन मिलो जिनारी से चिन्ता करा।”
सवर्गदुत तिथी ते चलीगे। से चरवाहे बी तिथी अपनी पेडा छडीके तिस बच्चे जो देखणे गये। छोड ई से तिथी पहुचे जिथी यीशू पैदा ऊआ तिने देखया बई से चरनी च सुतिरा, जेडा सवर्गदुता ने बोलेया था। से बोत खुस थे। तब से अपनी पेडा गे वापस आइगे। तिने जो देखेया सुणेया तिते खतर से परमेसवरा रा गुणगान करने लगे।
पुरबा ते दुर ईक देसा च कुछ लोक थे। तिने जो तारेआ रा ज्ञान था से बडे बुद्धिमान थे। तिने ईक चमकदार तारे जो आसमाणा च देखया। तिने बोलया ईते रा मतलब यहुदिया रे नए राजे रा जनम हुईरा। ईते खतर तिने तिस बच्चे जो देखने खतर अपने देसा ते चली पडे बहुत सफरा ते बाद, से बेतलहम पहुचे ओर तिस करा गे पहुचे जिथी यीशु ओर तिसरे माता पिता रुकीरे थे।
इना लोका ने जब यीशुआ जो अपनी मांवा कने देखया तब तिने चुकीके तिसारे गुणगान किते। तिने लोका ने यीशुआ जो मेगीं चीजा दितिया। तब से अपने करा जो चलीगे।
मत्ती पाठ 1; लूका 2 ते ईक बाइबला री काणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।