25. शैतान यीशूआ जो आजमा

यीशू आ रा बपतिसमा ऊणे रे तिसी समय, पवित्र आत्‍मा तिसो जगंला च लेई गया। यीशू तिथी चाली दिन ओर राती था। तिस समय तिने वर्त रखया, ओर शैताना ने तिस ते पाप करवाने खतर तिस री परिकशा लेई।

जब यीसुआ जो पुख लगी, तब शैताना ने यीसूआ जो अजमाणे खतर बोलया, “जे तु परमेसवरा रा बेटा तो ईना पत्‍थरा जो रोटी बणाई दे जिते जो तु खाई सको।”

यीशूआ ने शैताना जो बोलया, “परमेसवरा रे बचना च लिखिरा, ‘जिऊदा रेणे खतर आदमीया जो रोटिया री जरूरत नी हुदी, तिना जो से हर बात री जरुरत हुई जो परमेसवर तिना कने बोला’।”

तब शैतान यीशू आ जो मंदिरा रे सबीते ऊची जगह पर लेई गया। तिने तिसो बोलया, “जे तु परमेसवरा रा बेटा तो इथी ते ऊदे जो छलांग लगाई दे, लिखीरा बी, ‘परमेसवर तिजो चकने खतर अपणे स्‍वर्ग दुता जो बोलगा बी तेरे पैरा पर पत्‍थरा कने चोट ना लगो’।”

यीशूआ ने से नी कितया जो शैताना ने तिसो करने जो बोलया। पर, तिने बोलया, “परमेसवर सबी जो बोला, तु अपने परमेसवरा जो कदीनी आजमाणा।”

शैताना ने तिसो संसारा रे सारे देस कुमाए। तिने तिसो देखया बी से कितने महान ऐ, ओर से कितने धनी थे।तिने यीशूआ जो बोलया, “अऊ तिजो येसब देगा जे तु चुकीके मेरी पुजा करो।”

यीशूआ ने बोलया, “हे शैतान, मेरे सामने ते चलीजा! परमेसवरा रे वचना च से लोका जो बोला, ‘सिरफ अपणे परमेसवरा रे गुणगाण करने, और परमेसवरा रा आदर करो’।”

यीशूआ ने शैताना री बाता ते हार नी मानी, ईते खतर शैतान तिसगे ते चलीगा। तब सवर्गदुत यीशुआ री सेवा करने लगे।