31. यीशु रा पाणीया पर चलणा

पाजं हजार लोका जो रोटी खलाने ते बाद, यीशुआ ने अपने चेलेया जो किसतीया पर जाणे जो बोलया। तिने तिना जो किसतीया री दुजी तरफ जाणे जो बोलया ओर अपु थोडी देरा जो तिथी रुकिगा। तब चेले चलीगे ओर यीशुया ने लोका जो बिदा कितया बी से अपने करा जो जावो। तिते बाद, यीशु परमेसवरा रि प्राथना करने जो ईक पाडां पर चलीगा। तिथी से कला था, ओर से आधी राती तक तिथी रेया।

तिस, समय चेले अपणी किसतिया जो चलाई के जाणे लगीरे थे, पर हवा तिना री तरफ चलीरी थी। बोत रात हुणे पर बी से नदिया रे बीचे ही फसीरे थे।

तिस समय यीशुआ ने परमेसवरा री पराथना खतम किती ओर अपने चेलो गे वापस जाणा सुरु कितया। से किसतिया री तरफ जाणे खतर पाणीया पर चलने लगेया।

जब चेलेया ने तिसो देखया। से बोत डरीगे तिने सोचया बई ये कोई पुत आ। यीशु जाणा था बई ऐ डरी गे, तब तिने जोरा कने अवाज देई के बोलया, “डरो मत, ऐ अऊ आ!”

तब पतरसा ने यीशुआ जो बोलया, “हे प्रभु, जे ऐ तुआ तो मीनजो पाणीया पर चली के तंगे आणे खतर बोल।“ यीशुआ ने पतरसा जो बोलया, “आ!”

तब पतरस किसतिया ते ऊतरी गया ओर यीशुआ गे जाणे जो पाणीया पर चलने लगया। पर जरा कर दुर जाई के, तिने अपनी आखीया यीशुआ ते फेरीलिया ओर हवा,तेज लहरा जो देखणा सुरु करीता।

तब पतरस डरी गया ओर पाणीया च डुबने लगया। से चिगया, “हे प्रभु, मिन्‍जो बचा!” यीशुआ ने तिसी समय तिस रा आथ बडाईके पकडी ला। तब तिने पतरसा जो बोलया, “तेरा परोसा बोत कमां! अपू जो सुरकसित रखणे खतर तैं मा पर परोसा कऊ नी किता?”

तब यीशु ओर पतरस किसतिय पर बैठी गे, तब ईक दम अवा रा चलना बंद हुईगा। पाणी री लेरा बंद हुई गिया। चेलया ने हैरन हुई कर यीशुआ रे पैरा च पडीगे। तब तिने तिसरे गुणगाण किते ओर तिसो बोलया, “सच्‍ची तु परमेसवरा रा बेटा।“