1. परमेश्वरै दवारा संसारा बणाणा
परमेश्वरै शुरुआता दे एहड़ै केरे संसारा दे सब चिजा बणाइ। तिनी छ धैड़ै दे संसार होर जुण किछ तेत दे आसी सब किछ बणाया। जिंया परमेश्वरै पृथ्वे बणाए, तिंया पृथ्वे न्हैरै थिए होर खाली थिए, किलैकि परमेश्वरै अझी तिक तेत दे कोए भी चिजा नी बणाई थी। पर परमेश्वरा आत्मा पाणी गैश घुमो थिया।
तेखा परमेश्वरै बोला, “प्रैशा हो।” होर प्रैशा होए गोआ। परमेश्वरै भाड़ा कि प्रैशा बढिया आसी और तेता लै “धैड़ा” बोला। होर तिनी प्रैशा न्हैरै का लग किया न्हैरै लै तिनी रैच बोला। परमेश्वरै संसारा बणाणै का पैहलै धैड़ै प्रैशा बणाया थिया।
संसारा बणाणै का दूजै धैड़ै परमेश्वरै बोला, “पाणी मेंझ एक अंतर बणे जाओ।” एक अंतर बणे गोआ। परमेश्वरै तेस अंतरा लै “सर्ग” बोला।
तेखा चितैहै धैड़ै परमेश्वरै बोला, “पांणे एकी जगहा लै कट्ठा होए जाओ होर शुके जमीन शुजुए लौणे।” तिनी शुकी जमीना लै “धरते” होर पांणी लै समुंदर बोला। परमेश्वरै भाड़ा कि जुण किछ भी तिनी बणाया था स सब बढ़िया थिया।
तेखा परमेश्वरै बोला, “धरती गैश सभी भांतिए डाड़-बूट जमै लोंणै।” होर तेड़ा ही हुआ। परमेश्वरै भाड़ा कि जुण तिनी बणाया थिया स सब बढ़िया थिया।
संसारा बणाणै चौथै धैड़ै परमश्वरै बोला, “सर्गा दे प्रैशा हो।” होर सूरज, जोथ और तारै बणे गोए। परमेश्वरै सिंयो पृथ्वी गैश प्रैशै दैणै कठै होर धैड़ै होर रैचे, मौसम होर साला पछैणणै कठै बणाऐ। परमेश्वरै भाड़ा कि जुण किछ तिनी बंणाया थिया स बढ़िया थिया।
पांजवै धैड़ै परमेश्वरै बोला, “जिओंदै प्राणे पांणी दे भरुए होर सर्गा दे पंछे उडै लौणी।” एड़ैकेरे तिनी पाणी दे तैरणै आड़ै सब जानवर होर पंछे बणाऐ। परमेश्वरै भाड़ा कि स सब बढ़िया थिया होर तिनी तिन्हालै आशीष दैए।
संसारा बणाणै छठै धैड़ै परमेश्वरै बोला, “धरती गैश रौहणै आड़ै सब भांतिऐ जानवर पैदा हो।” होर परमेश्वरै बोलणै मुताबक तेड़ा ही होए गोआ। एखो जानवर पालतो थिऐ, एखो जमीना दे रिंगणै आड़ै होर एखो कुछ जंगली जानवर थिऐ। परमेश्वरै भाड़ा कि स सब बढ़िया थिया।
तेखा परमेश्वरै बोला, “आछो हामै मंणछा आपणै रूपा दे होर आपणी समानता दे बणाइए परमेश्वरै पृथ्वी ओर तेतदे रौहणै आड़ै सभ जानवर तेसरै अधीन किए।
तेता का बाद परमेश्वरै एड़ा किया कि माटा लोआ होर तेता केरे आदमे बणाया होर तेसदै जीवना शा भरा। तेस आदमिया नांओ परमेश्वरै आदम डा। परमेश्वरै आदमै रौहणै कठै एक बडा बगीचा बणाया होर तेतै देख-रेखै कठै आदम तिंदे डा।
तेस बगीचै मेंझा दे परमेश्वरै दुए खास डाड़ लाए जीवना डाड़ होर भलै होर बुरै ज्ञाना डाड़। परमेश्वरै आदमा लै आज्ञा दैये तू बगीचै सभी डाड़ै फल खाए सको, पर भलै होर बुरै ज्ञाना जुण डाड़ आसी तेता फल तू कधी भी नी खाई किलैकि जस धैड़ै ता तेस डाड़ा फल खांणा तेस धैड़ै तू जरुर ही मरे जाणा।
तेखा परमेश्वरै बोला, “मर्दा लै कल्ला रौहणा ठिक नी आथी।” पर कोए भी जानवर आदमा साथ दैणै आड़ा नी होए सका।
एतिकठै परमेश्वरै आदम घंणी निंजा दे पा। तेखा परमेश्वरै आदमै एकी पशड़ी काढे केरे तेता केरे एक बेटड़े बणाए होर स आदमा गोलै आंणे।
जिंया आदमै स बेटड़े भाड़े तै तिनी बोला, “वाह ए तो मूं सैंइ आसी। ए बेटड़े कहलाणे, किलैकि ए मर्दा का बणाएदे।” एती वजहा केरे मर्दा आपणै आम्मा-बाब छाडेकेरे आपणी लाड़ी सागे रौहणा।
परमेश्वरै मर्द होर बेटड़े आपणै समान बणाऐ। होर तेता का बाद तिनी तिन्हा लै आशीष दैये ओर तिन्हा का बोला, “हैन सारै शोरो पोत्रो पैदा करो होर पृथ्वी दे भरुए जाओ।” होर परमेश्वरै भाड़ा कि जो कुछ भी तिनी बणाया थिया सब बढ़िया थिया, होर स तिन्हा सभी का हैन खुश थिआ। ए सब कुछ संसार बणाणै छठै धैड़ै हुआ।
जिंया सातवा धैड़ा हुआ तै जुण काम परमेश्वर करदा लागादा थिया तिना सभी कामा करेकेरे तिनी आराम किआ। तिनी सातवै धैड़ै लै आशीष दैए होर स पवित्र ठहरा किलैकि तेस धैड़ै तिनी सब काम खत्म किए जुण स करदा लागादा थिया। एहड़ै केरे परमेश्वरै संसार होर जुण किछ भी तेत दे आसी सब बणाया।
उत्पत्ति पाठ 1-2 का बाइबलै एक काहणे
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।