2. संसारा दे पाप प्रवेश होआ

आदम होर तेसरे लाड़े हवा सुंदर बगीचै दे हैन खुशी केरे रौहो थियै। ए बगीचा परमश्वरै तिन्है कठै बणाया थिया। सिंयो दुए झिकड़ै नी पैहनदै थियै, पर तेखा भी सिंयो शर्मदै नी थियै, किलैकि संसारा दे तेस समै पाप नी थी। सिंयो कबल्लै तेस बगीचै दे घुमो थियै होर सिंयो परमेश्वरा सागे गलाबाता करो थियै।

पर इंदे तेस बगीचै दे एक किड़ा थिया। स हैन दुष्ट थिया। तिनी तैसा बेटड़ी का पूछा, “किजै सची परमेश्वरै तुम्हा का बोला, कि एस बगीचै कसी भी ड़ाडा फल नी खाई?”

तैसै बेटड़िए जवाब दैया, “परमेश्वरै हामालै बोलादा कि हामै तेस भलै होर बुरै ज्ञाने ड़ाडा का छाड़ेकेरे कसी भी ड़ाडा फल खाए सको। परमेश्वरै हामाका बोलादा कि जै हामै स फल खा या स छुंआ भी, तै तुम्है मरे जाणै।”

तिनी किड़ै बेटड़ी लै जवाब दैया, “ए सच नी आथी! तुम्है नी मरणी। परमेश्वर आपु जैणो कि जै तुम्है तेस डाड़ा फल खाए हेरा, तै तुम्है परमेश्वरा सैंइ होए जाणै होर थारी आखे खुलणी और तुम्है तेस सैंइ भला होर बुरा समझदै लागणै।”

तैसै बेटड़िए भाड़ा कि स फल खाणैलै बढ़िया, होर भाड़णै लै चाओआ जोगता आसी। स भी परमेश्वरा सैंइ समझदार बणणा चाहो थिए, तै तैसै स फल चोड़ेकेरे खा। तेखा तैसै आपणै लाड़ै लै स फल दैया, जुण तैसा सागे थिया होर तिनी भी स फल खा।

होर जेड़ा ही तिन्है स खाया तिंया ही तिन्हा दूई जैणै आखे खुली; होर फल खाए केरे तिन्हा लै समझ आए कि सिंयो नांगी आसी। तिन्है पाच जोडेकेरे सिंयै तेतै झिकड़ै बणाए और आपणै शरीरा ढकणै कोशिश किए।

तिंया आदमै और तेसरी लाड़ियै बगीचै दे घुमदी बारी परमेश्वरै आवाज शुणे। सिंयो दुए परमेश्वरा का झाखड़ा पिछो लुके रौहै। तिंया परमेश्वरै आदमा लै हाका लाई, “तू किंदै आसी?” आदमै जवाब दैया, “मं तुम्है बगीचै दे घुमदी बारी शुणे हेरै थिए, और हाँ डरे गोआ थिया, किलैकि हाँ नांगा थिया। एतिकठै हाँ लुके रौहा।”

तेखा परमेश्वरै पूछा, “ताखा कुणी बोला कि तू नांगी आसी? किजै तौं स फल खा जस खाणै लै मं ना किए थिये?” आदमै जवाब दैया, “तुम्है जुण बेटड़े मेरी कठै बणाए थिये एसै ही मूलै स फल दैया।” तिंया परमेश्वरै स बेटड़े पुछे, “तौं ए किजै किया?” तैसै बेटड़िए बोला, “किड़ै मूलै धोखा दैया तेखा मं स फल खा।”

परमेश्वरै किड़ै का बोला, “तू सभी बणाएदै जानवरा मेंझ श्रापित आसी! ता आपणै पेटै बल रेंगणा होर माटा चाटणा। ता होर एसा बेटड़ी एकी दूजै सागे बैर डाणा, होर तेरै शोरु होर एसै शोरु भी एकी दूजै सागे बैर डाणा। एसा बेटड़िए वंशा तेरा मुंड झेचणा, होर ता तेसरी घुंडी लै डंक बांणा।”

तेखा परमेश्वरै बेटड़ी का बोला, “मूं तेरे हड़खदी बारीए दा हैन बढ़ाणै। ता आपणै लाड़ै का उम्मीद डांणै, होर तेस ता गैश हक जमाणा।”

परमेश्वरै आदमा का बोला, “तौं आपणी लाड़िए गल शुणे होर मेरे आज्ञा नी मनी। एतिकठै जमीन श्रापित होए, होर ता अनाज पजैरनै कठै होर आपणै पेटै भूखै कठै कठिण मैनत करणे पड़णे। एबै तू मरे जाणा, होर तेरा शरीर माटै दे मिड़े जांणा।” आदमै आपणी लाड़िया नांओ हव्वा डा, जेता मतलब आसी “जिन्दगी दैणे आड़े”, किलैकि स सभी लोगै आदिमाता होंणे। होर परमेश्वरै आदम और हव्वा लै जानवरै चांभड़ै बणैदै झिकड़ै फनैए।

तेखा परमेश्वरै बोला, “मंणछ एबै भलै और बुरै जैणणै केरे हामा सैंइ होए गोआदा, एतिकठै तिन्हा लै तेस जीवनै ड़ाडा फल नहीं खाणे दैणा चाहिए। किंदे एड़ा नी हो कि सिंयो खाओ होर हमेशा लै जिंओदै रौहे जाओ।” एतिकठै परमेश्वरै आदम और हव्वा तेस बगीचै का बाहरा लै काढे दैयै। होर परमेश्वरै तेस बगीचै प्रवेश दवारा गो शक्त्तिशाली स्वर्गदूता पैहरा ला ताकि कोए भी तेस जीवनै ड़ाडा फल नी खाए सको।