3. जल प्रलय

एक समा एड़ा आया, जिंया संसारा दे हैन सारै लोग रहो थियै। सिंयो हैन दुष्ट होर पापै होए गोए थिए। ए सब किछ एत्रा बुरा होए गोआ थिया कि परमेश्वरै फैसला लौआ कि एकी बड़ी प्रलय केरे एस पूरै संसारा नाश करे दैया जाए।

पर परमेश्वर नूहै कामा का खुश थिया। स एक धर्मे आदमे थिया, जुण दुष्ट मंणछा मेंझ रौहो थिया। परमेश्वरै नूहा का बोला कि स लोगै दुष्टतै वजहा का एक बड़े प्रलय आड़णै आड़ा आसी। एति वजहा केरे, तिनी नूहा लै एक बड़ा जहाज बणाणै कठै बोला।

परमेश्वरै नूहा लै एक जहाज बणाणै कठै बोला, जुण लगभग 140 मीटर लांबा, 23 मीटे चौड़ा होर 13.5 मीटर उछटा हुणा। नूहा स गोपेरै डाड़ै काठा केरे बणाणा थिया होर तेत दे चन मजला, हैन जै कमरै, एक छत होर एक खिड़के बणाणे थिये। तेस जहाजा नूह, तेसरै परिवारा आड़ै, होर धरतीयै हर भांतियै जानवर तैसा प्रलय का बचाए ड़ाणे थियै।

नूहै परमेश्वरै आज्ञा मने। तिनी होर तेसरै चन शोरुए तेड़ा ही जहाज बणाया जेड़ा परमेश्वरै तिन्हा लै बोला थिया। किलैकि स जहाज हैन बड़ा थिया तै तेस बणाणै लै कई साला लागी। नूहै संसारै लोगा लै आछणै आड़ै प्रलय बारै दे चेतावने दिए होर तिन्हा लै परमेश्वरा बाखा लै फिरणै कठै बोला, पर तिन्है तेसरी गला गैश विश्वास नी करी।

परमेश्वरै नूहा और तेसरै परिवारा लै आपणै कठै होर जानवरै कठै जरूरतानुसार खांणै लै होर घा जमा करणैआ हुक्म भी दैया। जिंया सभ किछ तयार होए गोआ, तिंया परमेश्वरै नूहा का बोला कि एबै तेस, तेसरी लाड़ी, तेसरै चन शोरो, होर तिन्ही लाड़ी-कुल मिलाएकेरे आठा जैणैया जहाजा भिथरा लै जाणैआ समा थिया।

परमेश्वरै हर जानवरै होर पंछिए नर होर मादा प्रजातियै अशुद्ध जानवरै ता दुए-दुए जोड़ै पर शुद्ध जानवरै सात-सात जोड़ै नूहा गोलै भेजै ताकि सिंयो जहाजा दे जाए सको होर प्रलय आछणै समै दे परमेश्वर तिन्हा बचाए सको। परमेश्वरै एड़ै सब प्रकारै जानवरै सात-सात जोड़ै यानी नर होर मादा भेजै जसरा बली चढ़ाणै कठै इस्तेमाल किया जाये सको। जिंया सिंयो सभ जहाजा भिथरा लै डे गोए तिंया परमेश्वरै आपु जहाजा दवार बंद किया।

तिंया साता धैड़ै बाद सर्गा का पांणे लागणा शुरु होआ, होर पांणे होंदा रौहा, हैन होंदा रौहा। बगैर रुके चाड़ी धैड़ै होर चाड़ीए रैचे तिक पांणे लागादा रौहा। जमीना भीथरा का भी पांणी सोभड़ा फूटी सारै संसारै हर एक चीज, इंदा तिक कि ऊछटी का ऊछटी धारा भी पाणी दै डूबे गोइ।

सिर्फ तिन्हा लोगा होर जानवरा का छाड़ेकेरे जुण जहाजा दे थियै, हर एक चीज जुण शुकी जमीना दे थिये मरे गोए। स जहाज पाणी दे तैरदा रौहा होर जहाजा भिथरै हरेक चीज ड़ूबणै का बचे गोए।

तेखा पांणी रुकणै का बाद, पांज महीनै तिक जहाज पांणी दे तैरदा रौहा, तेस समै बाद संसारा दे पांणे कम होंदा लागे गोआ थिया। तिंया एकी धैड़ै स जहाज एकी धारै टिलै गैश टिके गोआ, पर संसार अझी भी पांणी केरे भरुआदा थिया। चन महीनै का बाद, धारै टिलै शुजदै लागै थिए।

तेखा होर चाड़ियै धैड़ै का बाद, नूहै एक काओ एड़ा भाड़णै कठै बाहरा लै भेजा कि किजै पांणे शुके गोआ थिया कि नहीं। स काओ शुकी जमीनै खोजा दे ओरै-पोरै उड़दा रौहा, पर तेसलै एहड़े कोए भी जगहा नी मिड़ी जिंदे स बैठे सको थिया।

तेखा कुछ धैड़ै बाद नूहै भी का एक कबूतरे बाहरा लै भेजे। पर तैसा लै भी कोए शुके जमीन नी मिड़ी, तै स नूहा गोलै वापस आये। एकी हपतै का बाद तिनी स कबूतरे भी का भेजे, होर स आपणी चोंचा दे जैतूना एक नौंआ पाच लौयेकेरे वापस आये। पांणे घटदा लागादा थिया, होर डाड़ बूट भी का जमदै लागै थियै।

नूहै एक हप्ता होर नैहड़ा होर चिती बारी स कबूतरे बाहरा लै भेजे, एस समै तैसा लै बैठणै लै जैगहा मिड़े गोए होर स वापस नी आई। पांणे शुकदा ही लागादा थिया।

दुई महीनै का बाद परमेश्वरै नूहा का बोला, “एबै तू होर तेरा परिवार होर सभ जानवर जहाजा का बाहरा लै निकड़ो। हैन सारै शोरो होर बाल-बच्चै पैदा करो होर संसारा दे भरुए जाओ।” तै नूह होर तेसरा परिवार जहाजा का बाहरा लै निकड़ै।

नूहै जहाजा का बाहरा लै आछणै का बाद, तिनी एक बेदे बणाए। होर बलि लै इस्तेमाल करणै आड़ै हर एक शुद्ध जानवरा मैंझा का कुछ लौएकेरे बले चढ़ाए। परमेश्वर तिन्हा बलि केरे खुशी हुआ और नूह होर तेसरै परिवारा लै आशीष दैये।

तेखा परमेश्वरै बोला, “हाँ शपथ लओ कि मंणछै द्वारा कियै जाणै आड़ै बुरै कामै बजहा का मूं कबै भी भूमि लै श्राप नी दैणी। मूं ना तो प्रलय जरियै संसारा नाश करणा, हालाँकि मंणछ आपणै बचपना का ही पापे आसी।”

तेखा परमेश्वरै आपणी वाचै नशाणै रुपा दे पैहला मेघधनुष बणाया। जिंया कबै भी सरगा दै मेघधनुष शुजणा, तिंया परमेश्वरा याद करणै कि तिनी किजै शपथ लौएदे होर तेड़ै ही तेसरै लोगा भी याद करणा।