4. अब्राहमा सागे परमेश्वरै वाचा

प्रलय का कइ साला बाद, संसारा दे हैन सारै लोग रहो थिये, होर सिंयो अझी भी परमेश्वरै होर एकी दूजै खलाफ पाप करो थियै। सिंयो सभ एक ही भाषा बोलो थियै, एतिकठै सिंयो कठै होए होर एकी नगरा बणांदै लागै। जेड़ा परमेश्वरै आदेश दैया थिया, तेतै मुताबक सिंयो सारै संसारा दे नी फैली।

सिंयो लोग हैन घमंडी थिये, होर तिन्हा परमेश्वरै बोलणै मुताबक केड़ा जीवन जिणा चाहिये एतै बारै दै परमेश्वरै आज्ञा नहीं मनणा चांहदी थिये। आपणा नांओ महान करणै कठै तिन्है एक एड़ा उछटा भवन बणाणा शुरु किया जुण सर्गा तिक पुज्जे सको। परमेश्वरै भाड़ा कि जै सिंयो सागे मिड़ेकेरे बुरै काम करदै रहुंग तै सिंयो होर भी हैन सारै बुरै काम करे सको।

तै परमेश्वरै तिन्है भाषा हैन सारी लग-लग भाषा दे बदले दैयी होर सिंयो लोग सारै संसारा दे फैलाऐ। जुण नगर तिन्है बणाणा शुरु किया थिया तेता नाओं बाबेल रौहा, जेता मतलब “गडबड़े” आसी।

तेखा कई शौ साला बाद, परमेश्वरै अब्राम नांओंऐ एकी मंणछा सागे गल किए। परमेश्वरै तेसका बोला, “आपणै देशा होर परिवारा छाड़ेकेरे तेस देशा लै जा जुण मूं तालै दसणा। मूं तालै आशीष दैणे होर ताखा एक बड़े जाते बणाणे। मूं तेरा नांओ महान बणाणा। जस तालै आशीष दैणे तेसलै मूं आशीष दैणे, होर जस तालै श्राप दैणा तेसलै मूं श्राप दैणा। संसारै सभी कुलै लोगा तेरै जरियै आशीष पाणे।”

तै अब्रामै परमेश्वरै आज्ञा मने। तिनी आपणे लाड़े सारै आपु सागे निंये, होर आपणै सारै दास होर आपणे सभ धन-दौलत भी निंये होर तेस देशा लै, यानि कनान देशा लै डेया जुण परमश्वरै तेसलै दसा थिया।

जिंया अब्राम कनान देशा दे पुज्जा तिंया परमेश्वरै तेसका बोला, “आपणै चउ बाखा लै भाड़। मूं तालै ए सारा देश दैणा होर तेरै वंशै लोगा कबल्ला एत गैश अधिकार डाणा।” तिंया अब्राम तेस देशा दे ही बसा।

मलिकिसिदक नांओंआ एक मर्द थिया जुण सर्वोच्च परमेश्वरा परोहत थिया। एकी धैड़ै जिंया अब्राम युद्धा करणै का बाद आछदा लागादा थिया तिंया स होर अब्राम एकी जगहा दे मिड़ै। मलिकिसिदकै अब्रामा लै आशीष दैये होर बोला, “सर्वोच्च परमेश्वर जुण स्वर्ग होर संसारा मालक आसी स तालै आशीष दैयो।” तेखा अब्रामै युद्धा दे जिती दी सभी चिजा दसवा हिस्सा मलिकिसिदका लै दैया।

कई साला बीतै गोई, पर अझी भी अब्रामै होर सारै कोए शोरो नी होइ थिया। परमेश्वरै अब्रामा सागे गल किए होर भी का प्रतिज्ञा किये। तिनी ए प्रतिज्ञा किये, कि तेसरा एक शोरो पैदा होंणा होर जेड़ै सर्गा दे तारै आसी तेड़ै ही तेसरै भी हैन सारै वंशज होंणै। अब्रामै परमेश्वरै प्रतिज्ञा गैश विश्वास किया। परमेश्वरै घोषणा किये कि अब्राम एक धर्मे मंणछ थिया किलैकि तिनी परमेश्वरै प्रतिज्ञा गैश विश्वास किया था।

तिंया परमेश्वरै अब्रामा सागे एक वादा किया। आमतौरा दे, एक वादा दूई दला मेंझ एकी दूजै कठै काम करणैया एक समझौता हो। पर एस बारै दे, परमेश्वरै अब्रामा सागे ए प्रतिज्ञा तिंया किये थिये जिंया अब्राम सुतादा थिया, पर स तिंया भी परमेश्वरै आवाज शुणे सको थिया। परमेश्वरै बोला, “मूं तालै होर सारा लै थारा एक आपणा शोरो दैणा। हाँ तेरै वंशजा लै एस कनान देशा दैयो।” पर अझी अब्रामै कोए शोरो नी आथी थिया।