5. प्रतिज्ञा शोरो

अब्राम होर सारै कनान देशा दे पुजणै का दसा साला बाद भी तिन्है कोए शोरो नी थी। तै, तेसरी लाड़ी सारै तेसलै बोला, “किलैकि हेर परमेश्वरै अझी तिक मुलै कोइ शोरो नी आथी दैयादा। होर एबै हाँ शोरु लै जन्म दैणै कठै हैन ठगड़े भी होए गोएदे, एबै शुण, मेरे दासे हाजिरा इंधे आसी। तू मेरी दासी हाजिरै जरियै मेरै कठै शोरो पैदा कर।”

तै सारै बोलणै केरे अब्राम हाजिरा गोलै डेया। हाजिरै एक शोरो जम्मा, होर अब्रामै तेसरा नांओं इश्माएल डा। पर सारै लै हाजिरै रोष लागे। जिंया इश्माएल तेरहा वर्षा थिया, परमेश्वरै भी का अब्रामा सागे गला की।

तिंया परमेश्वरै बोला, “हाँ सर्व-शक्त्तिमान परमेश्वर आसी। मूं ता सागे एक वायदा करणा।” तिंया अब्रामै जमीना दे पड़ेकेरे तेसलै प्रणाम किया। परमेश्वरै अब्रामा का एड़ा भी बोला, “तू हैन सारी जातैया बाब होंणा। मूं तालै और तेरै वंशजा लै तिन्है आपणे जमीन होंणै कठै कनान देश दैणा होर हाँ सदा लै तिन्हा परमेश्वर होंणा। ता आपणै घरानै हर एकी मर्दा खतना करणा पड़णा।

“तेरी लाड़ी सारै एक शोरो जमणा – स प्रतिज्ञा शोरो होंणा। तेसरा नांओं इसहाक डाया। मूं तेस सागे आपणा वायदा बणाये डाणा होर स एक बड़े जाते बंणे जांणे। मूं इश्माएला का भी एक बड़े जाते बणाणे, पर मेरा वायदा इसहाका सागे रौहणा।” तिंया परमेश्वरै अब्रामा नांओ बदड़ेकेरे अब्राहम डा, जेता मतलब “हैना जैणैआ बाब” आसी। परमेश्वरै सारै नांओ भी बदड़ेकेरे सारा डा, जेता मतलब आसी, “मूलमाता”।

तेस धैड़ै अब्रामै आपणै घौरै सभी मर्दा खतना किया। लगभग एकी वर्षा का बाद, जिंया अब्राहम 100 वर्षा थिया होर सारा 90 वर्षै थिये, तिंया सारै अब्राहमै शोरु लै जन्म दैया। जेड़ा परमेश्वरै तिन्हा लै बोला थिया तिन्है तेसरा नांओ इसहाक डा।

जिंया इसहाक जवान हुआ, तिंया परमेश्वरै अब्राहमै विश्वासै परीक्षा लौए। परमेश्वरै बोला, “आपणै एकलौतै शोरु लौ, होर तेस मेरी कठै बलिए रूपा दे चढ़ा।” तेखा अब्राहमै परमेश्वरै आज्ञा मने होर आपणा शोरो बलि चढ़ाणै कठै त्यार किया।

जिंया अब्राहम होर इसहाक बलि चढ़ाणै जगहा बालै जांदै लागै तिंया इसहाकै पूछा, “ओ बाबा, हामा का बलि चढ़ाणै कठै छिड़ी तो आसी, पर बलि चढ़ाणै कठै छेलो किंदे आसी?” अब्राहमै जवाब दैया, “ओ मेरै शोरुआ, परमेश्वरा बलि चढ़ाणै कठै छेलुआ प्रबंध भी करणा।”

जिंया सिंयो बलि चढ़ाणै जगहा दे पुज्जै, तिंया अब्राहमै इसहाक बैनै केरे बेदी गैश सताये दैया। स आपणै शोरु मारणै आड़ा ही थिया कि परमेश्वरै बोला, “रुकै जा शोरु लै नुकसान नी पजैड़ी। एबै मौं जैणे लोआ कि तू मेरा भय मनो किलैकि तू मेरी कठै सभ किछ दैणै लै त्यार थिया, इंदा तिक कि आपणै एकलौतै शोरु भी।”

तिंया तिंदे नेड़ ही अब्राहमै एक छेलो भाड़ा जुण झाखड़ा दे शैचादा थिया। इसहाकै बदलै परमेश्वरै बलिए कठै छेलुआ प्रबंध किया थिया। अब्राहमै खुशी-खुशिए छेलुए बले चढ़ाये।

तिंया परमेश्वरै अब्राहमा का बोला, “किलैकि तू मेरी कठै सभ किछ दैणै लै त्यार थिया, इंदा तिक कि आपणै एकलौतै शोरु भी। एतिकठै हाँ तालै आशीष दैणै प्रतिज्ञा करो। तेरै वंशज सर्गै तारै का भी हैन होंणै। किलैकि तौं मेरे आज्ञा मनेदे तै मूं तेरै परिवारै जरियै संसारै सभी कुलै लोगा लै आशीष दैणे।”