6. परमेश्वर इसहाकै कठै प्रबंध करो

जिंया अब्राहम हैन ठगड़ा होए गोआ थिया तिंया तेसरा शोरो इसहाक, जवान होए गोआ थिया। तै अब्राहमै आपणा एक दास तेस देशा लै भेजा जिंदे तेसरै रिश्तेदार रहो थियै, ताकि स आपणै शोरु इसहाका लै एक लाड़े आणे सको।

एक लांबै सफरा करणै का बाद, अब्राहमा दास तेस देशा लै डेया, जिंदे अब्राहमै रिश्तेदार रहो थिये। परमेश्वरै तेसरा मार्गदर्शन किया, कि स रिबका सागे मिड़ो। स अब्राहमै भाइये पोत्रे थिये।

रिबका आपणै परिवारा छाड़ेकेरे तेस दासा सागे वापस जाणै कठै मने गोए। जिंया ही रिबका पूज्जे इसहाकै तैसा सागे बैह करे लौआ।

तेखा एक लांबै समै का बाद, अब्राहम मरे गोआ। तिंया परमेश्वरै अब्राहमै शोरु इसहाका लै आशीष दैये, किलैकि परमेश्वरै अब्राहमा सागे वादा कियादा थिया। तेस वादै दे परमेश्वरै एक प्रत्तिज्ञा थिये कि अब्राहमै हैन सारै वंशज होंणै। पर इसहाकै लाड़ी रिबकै शोरो नी हुई।

तेताका बाद इसहाकै रिबकै कठै प्रार्थना किये, परमेश्वरै तैसै प्रार्थना शुणे होर तैसा लै जुडवा शोरुआ गर्भ धारण करणै सामर्थ दैये। जिंया सिंयो शोरो रिबकै पेटा दे ही थियै सिंयो आपण झगड़दै लागै, तै रिबकै परमेश्वरा का पूछा कि ए किजै होंदा लागादा थिया।

तिंया परमेश्वरै रिबका का बोला, “ता दूई शोरु लै जन्म दैणा। तिन्है वशंजा दूए लग-लग जाति बणाणी। सिंयो एकी दूजै सागे झगड़णै। पर बड़ड़ै शोरु का होंणै आड़ी जाति माठड़ै शोरु का पैदा होंणै आड़ी जातिए आज्ञा मनणे।

जिंया रिबकै शोरुआ जन्म होआ, तिंया बड़ड़ा शोरो लाल होर झुशला थिया, होर तिन्है तेसरा नांओ एसाव डा। तिंया माठड़ा शोरो एसावै घुंडी पाकड़दियै जमा, होर तिन्है तेसरा नांओ याकूब डा।