7. परमेश्वरै याकूबा लै आशीष दैये

जिंया सिंयो शोरो बड़ै होए तिंया याकूबा लै घौरै रौहणा बढ़िया लागो थिया, पर एसावा लै जानवरा शकार करणा बढ़िया लागो थिया। रिबकै याकूब पैरा थिया, पर इसहाकै एसाव पैरा थिया।

एकी धैड़ै, जिंया एसाव शकार करेकेरे वापस आ तिंया तेसलै हैन भूख लागैदे थिये। एसावै याकूबा का बोला, “जुण तौं खाणै लै चाणेदे तेता मैंझा का मुलै भी थोड़े जे खाणैलै दै।” याकूबै जवाब दैया, “पैहलै मूं सागै एड़े प्रत्तिज्ञा कर कि पैहला शोरो होंणै वजहा केरे हर एक चीज, जुण मुलै मिड़णै चहिए थिये, स सभ ता मुलै दैणे।” तै एसावै सिंयो सभ चीजा याकूबा लै दैणै प्रत्तिज्ञा किए। तिंया याकूबै तेसलै थोड़े जे खाणैलै दैये।

इसहाक एसावा लै आशीष दैणा चाहो थिया। पर एताका पैहलै कि तिनी एड़ा किया होंदा, रिबकै होर याकूबै इसहाका सागे धोखा किया। तिन्है याकूबा एसाव होणैया छल करेकेरे तेस सागे धोखा किया। इसहाक ठगड़ा थिया होर स एबै हेरै नी सकदा थिया। तै याकूबै एसावै झिकड़ै पैहनै होर बाकरिए खालड़े आपणै गौड़ा दे होर हाथा दे पड़ेटे लौए।

तेखा याकूब इसहाका गोलै आ होर बोला, “हाँ आसी एसाव। हाँ एतिकठै आ कि तू मुलै आशीष दैयो।” जिंया इसहाकै बाकरिए शराड़ तोपै होर झिकड़ै शिंघै, तिंया तिनी सोचा कि स एसाव आसी होर तेसलै आशीष दैये।

एसावै याकूबा सागे नफरत्त किये किलैकि याकूबै तेसरै पैहलै शोरु होंणैआ हक होर सागे ही तेसरी आशीषा भी लौए हेरी थी। एताका बाद एसावै योजना बणाए कि जिंया म्हारा बाब मरे जाणा तिंया मूं याकूब खत्म करे दैणा।

पर रिबकै एसावै योजना बणाणै गला शुणे हेरी। तै तैसै होर इसहाकै याकूब तिन्है रिश्तेदारा सागे रौंहदा हैन दूरा लै भेजा।

तेखा याकूब कई वर्षा तिक रिबकै रिश्तेदारा सागे रौहा। तेस समै दौरान तिनी बैह किया होर तेसरै बारहा शोरो होर एक शोरे हुए। परमेश्वरै स हैन सेठ बणाया।

बिआ वर्षा तिक कनान देशा दे आपणै घौरा का दूर रौहणै का बाद, याकूब आपणै परिवारा, आपणै दासा, होर आपणै पालतू पशुऐ झुंडा समित आपणै घौरा लै वापस आ।

याकूब तै हैन डौरादा थिया किलैकि तिनी सोचा जै एसाव ऐभै भी मूं मारणा चाहा हुणा। एतिकठै तिनी तौहफै रुपा दे पालतो पशो जेड़ै कि भेड़ा-बाकरीयै, गावा-बल्दै, ऊंटै होर गाधै झुण्ड एसावा गोलै भेजै। जुण दास तिन्हा झुंडा लौएकेरे डेयै थियै तिन्है बोला, “तेरा दास याकूब, इन्हा पशु तालै दैणा चाहो। स छेकै ही हामा पिछो-पिछो आछदा लागादा।”

पर एसाव ऐबै याकूबा मारणा नी चांहदी थिया। एतै अलावा, स तेस एकी बारी भी का भाड़ेकेरे खुश थिया। तेताका बाद दुए भाए एसाव होर याकूब कनान देशा दे शान्ति केरे रौंहदै लागै। तेखा इसहाक मरे गोआ होर याकूबै होर एसावै स दाबा। वादै प्रतिज्ञा जुण परमेश्वरै अब्राहमा सागे की थी सिंयो एबै इसहाका का याकूबा गैश आए गोइ थी।