8. परमेश्वर यूसुफा होर तेसरै परिवारा बचाओ

याकूबै कनान देशा दे रौहन्दी-रौहन्दी हैन साला होए गोइ थी। जिंया स ठगड़ा होए गोआ थिया, तिंया तिनी आपणा पैरा शोरो यूसुफ तेसरै भाईयै बारै दै पता करदा भेजा। तेसरै भाए डागै गवाड़ै डेयैदै थियै।

यूसुफै भाए तेस सागे जिद्द करो थिये किलैकि तिन्हा बाब तेस सागे हैन प्यार करो थिया होर तै भी कि यूसुफै सुपना भाड़ा थिया कि मूं आपणै भाई गैश राज करणा। जिंया यूसुफ आपणै भाईया गो लै आया तै तिन्है स बंधक बंणाया होर स दासा व्यापार करणै आड़ै लोगा लै बेचे दैया।

तेखा एड़ा हुआ कि घौरा लै वापस हटणै का पैहले ही यूसुफै भाइयै यूसुफै झिकड़ै छेकै होर बाकरियै खूनै केरे सिंनै किये। तेखा तिन्है सिंयो झिकड़ै आपणै बाबा का दसै ताकि स एड़ा सोचो कि कुणी जंगली जानवरै स मारे हेरादा। तेती वजहा केरे याकूब हैन दु:खी थिया।

दासा व्यापार करणै आड़ै यूसुफ मिस्र देशा लै निंया। नील नदियै कनारै बसादा मिस्त्र देश हैन बड़ा और शक्तिशाली देश थिया। तिन्है दासा व्यापार करणै आड़ै लोगै यूसुफ एकी अमीर शासकीय अधिकारी लै दासै रुपा दे बेचे दैया। यूसुफै आपणै मालकै बढ़िया तरीकै केरे सेवा किये, होर परमेश्वरै यूसुफा लै आशीष दैये।

तिंया तेसरै मालकै लाड़िए यूसुफा सागे नाजायज रिशता बणाणै कोशिश किये, पर यूसुफै एहड़ैकेरे परमेश्वरै खिलाफ पाप करणै लै ना किये। एती वजहा केरे तैसा लै हैन गुस्सा आ होर तैसै यूसुफा लै झूठा इलजाम ला, एतिकठै तैसै लाड़ै स गिरफ्तार करेकेरे जेला लै भेजे दैया। जेला दे भी, यूसुफ परमेश्वरै प्रति विश्वासयोग्य रौहा, होर परमेश्वरै तेसलै आशीष दैये।

भले ही यूसुफ निर्दोष थिया, पर दूई साला का बाद अझी भी स जेला दे ही थिया। एकी रैचे एड़ा हुआ कि, फिरौन, जेड़ा कि मिस्र देशै लोग आपणै राजै लै बोलो थियै, तिनी दुए सुपनै भाड़ै जेतकेरे स हैन परेशान हुआ। तेसरा कोए भी सलाहकार तेसलै तिना सुपनैआ मतलब नी दसे सका।

पर परमेश्वरै यूसुफा लै सुपनै मतलब दसणै समझ दैये थिये, एतिकठै फिरौनै यूसुफ जेला का आपु गोलै शादा। यूसुफै तेसलै तिना सुपनैआ मतलब दसा होर बोला, “पूरै मिस्र देशा दे परमेश्वरा साता साला तिक बढ़िया फसल दैणे पर तेताका बाद सात साला तिक नकाड़ पड़णा।”

इना गला बाद फिरौन यूसुफा का एत्रा खुश हुआ की तिनी स पूरै मिस्र देशा दूजा सभी का शक्त्तिशाली मंणछ यानी मिस्र देशा प्रधान मन्त्रे बणाया।

यूसुफै लोगा लै बढिया फसला आड़ै साता साला मेंझ हैन मात्रा दे नाज कठै करणै लै बोला। जिंया साता साला नकाड़ पड़ा तिंया यूसुफै लोगा लै स नाज बेचा ताकि तिन्हा का खाणैलै पूरा नाज हो।

स नकाड़ सिर्फ मिस्त्र देशा दे ही नी, पर कनान देशा दे भी भयंकर थिया जिंदे याकूब होर तेसरा परिवार रहो थिया।

एतिकठै याकूबै आपणै बड़ड़ै शोरो नाजा खरीदणै कठै मिस्र देशा लै भेजै। जिंया सिंयो नाजा खरीदणै कठै यूसुफै सामनै खड़ुए, तिंया तेसरै भाइयै यूसुफ नी फछैणी। पर यूसुफै सिंयो फछैणे हेरै।

तिन्है बारै दे एड़ा पता करणै कठै कि किजै सिंयो बदड़ुए गोए तिन्हा परखणै का बाद, यूसुफै तिन्हा का बोला, “हाँ थारा भाए यूसुफ आसी! डरी नी आथी। जिंया तुम्है हाँ दासै रुपा दे बेचा तिंया तुम्है बुरा करणैआ सोचा थिया, पर परमेश्वरै बुराए भलाइयै कठै इस्तेमाल किये! आछो होर मिस्र देशा दे रहो ताकि हाँ थारी कठै होर थारै परिवारै कठै खाणैआ प्रबंध करे सकु”

जिंया युसुफै भाए घौरा लै वापस हटै होर आपणै बाबा याकूबा का दसा कि यूसुफ अझी भी जिओंदा आसी तिंया स हैन खुश हुआ।

हांलाकि याकूब एक ठगड़ा मंणछ थिया तैबी स आपणै पूरै परिवारा समित मिस्र देशा लै डेया होर सिंयो तिंदे बसै। याकूबै आपणै मरणै का पैहलै आपणै सभी शोरु लै आशिर्वाद दैया।

वाचै स प्रतिज्ञा जुण परमेश्वरै अब्राहमा सागे किए थिये सिंयो इसहाका गैश होर इसहाका का बाद याकूब होर तेसरै बारहा शोरू होर तिन्है परिवारा गैश आई। तिन्हा बारहा शोरूऐ वंशज इस्राएलै बारहा गोत्र बणै।