9. परमेश्वर मूसा शादो

यूसुफा मरणै का बाद तेसरै सभ रिश्तेदार मिस्र देशा दे रौंहंदै लागै। सिंयो होर तिन्है वंशज कई साला तिक मिस्र देशा दे ही रौहै होर तिन्है हैन शोरो होऐ। सिंयो इस्राएली लोग कहलाऐ।

कई साला का बाद, इस्राएली लोगै अबादै हैन बढ़े। होर मिस्री लोग ऐबै ऐसा गलै कठै एहसानमंद नी थी कि तिन्है मदद करणै कठै यूसुफै हैन कुछ कियादा। सिंयो इस्राएली लोगा का डरे गोए किलैकि सिंयो संख्या दे तिन्हा का हैन ज्यादै थियै। तै तेस समै मिस्र देशा दे राज करणै आड़ै फिरौनै इस्राएली लोग मिस्री लोगै दास बणाए।

तेस समै मिस्री लोगै इस्राएले लोग हैन बड़ै-बड़ै भवना इंदा तिक कि कई कस्बे बणाणै कठै मजबूर कियै। तैसा मैहनता करेकेरे सिंयो हैन दुःखी होए, पर परमेश्वरै तिन्हा लै आशीष दैये होर तिन्है होर हैन ज्यादै शोरो हुए।

तिंया फिरौनै भाड़ा कि इस्राएलियै लोगै हैन शोरो होंदै लागेदै थिये, तै तिनी आपणै लोगा लै इस्राएलियै लोगै सभी नर शोरु लै नील नदी दे शोटेकेरे मारणैआ आदेश दैया।

तेखा एड़ा होआ कि एकी खास इस्राएली बेटड़ियै एकी शोरु लै जन्म दैया। तैसै होर तैसै लाड़ै जेत्रा तिन्हा का होए सको था स शोरो लकोए डा।

जिंया तेस शोरुए मां-बाब तेस होर ज्यादा नी लकोए सकै, तै तिन्है स तेस मारणै का बचाणै कठै एकी छाबड़ै दे नील नदीयै कनारै दे बैन्जे डंडै मेंझ डाए दैया। तेस शोरुए बैहण दूर खड़े होएकेरे चुफियै तेस हेरदे रौहे कि तेस सागे किजै होंणा।

राजा फिरौनै शोरे नदी लै नैहंदे आए होर तैसै तेस छाबड़ै हेरेकेरे तेत भिथरा लै नजर दैये। जिंया तैसै स शोरो भाड़ा तिंया तैसै स आपणै शोरुऐ रुपा दे अपनाया। तैसै एक इस्राएले बेटड़े तेसलै दूध पलाणै कठै कामा दे ड़ाए, बिणी एड़ा जैणे कि ए तेस शोरुए सक्के आम्मा थिये। जिंया स शोरो एत्रा बड़ा हुआ कि ऐबै तेसलै आपणी आम्मै दूधै जरुरत नी आथी, तै तैसै फिरौनै शोरी गोलै स वापस भेजा, तेसरा नांओ मूसा डा।

तेखा एकी धैड़ै, जिंया मूसा जवान होए गोआ थिया, तिंया तिनी भाड़ा कि एक मिस्रे आदमे एकी इस्राएली आदमी जिकदा लागादा थिया। तेस भाड़ेकेरे मूसै आपणै इस्राएली साथी बचाणै कोशिश किये।

जिंया मूसै सोचा कि स कसी नी भाड़णी तिंया तिनी स मिस्रे आदमे मारे डाआ होर तेसरे ल्हास दाबे दैये। पर मूसै जुण किया थिया स कुणी होरी आदमियै भाड़े हेरा थिया।

जिंया फिरौना का पता लागे गोआ कि मूसै किजै कियादा। तिनी तेस मारणै कोशिश किये, पर मूसा मिस्र देशा का बौणा लै भागा। पर फिरौनै सैनिक तेस तिंदे लोड़े नी सकै।

तेखा एड़ा होआ कि मूसा मिस्र देशा का दूर मिद्यान देशा दे रौंहदा लागा। तिनी तिंदे एकी बेटड़ी सागे बैह किया होर तेसरै दूए शोरो होए। होर स तिंदे एक फुआल बणे गोआ थिया।

तिंदे मूसा आपणै शौरै भेड़ा बाकरिये देख-रेख करो थिया। एकी धैड़ै एड़ा होआ कि, तिनी एक झाखड़ फुकदा भाड़ा जुण बगैर भस्म होए फुकदा लागादा थिया। तेस भाड़णै कठै स तेस झाखड़ै नेड़ा लै डेआ। जिंया स तेतै हैन नेड़ पुज्जे गोआ तिंया परमेश्वरै तेस सागे गल किए। परमेश्वरै बोला, “ओ मूसा, आपणै बूटा पोरै खोल। तू एकी पवित्र जगहा दे खड़ुआदा आसी।”

परमेश्वरै बोला, “मं आपणै लोगा दु:ख भाड़ादा। मूं तू फिरौना गोलै भेजणा ताकि तू इस्राएली लोगा मिस्रै लोगै गुलामी का आजाद करेकेरे आंणौ। मूं तिन्हा लै कनान देश दैणा, स देश जेता मं अब्राहम इसहाक होर याकूबा लै दैणैआ वादा कियादा थिया।”

मूसै पूछा, “जै लोग जैणणा चांहुंग कि हाँ कुणी भेजादा तै मूं किजै बोलणा?” परमेश्वरै बोला, “जुण हाँ आसी सौही हाँ आसी। तिन्हा का बोलैया, ‘हाँ आसी, तिनी हाँ तुम्हा गोलै भेजादा।’ तिन्हा का एड़ा भी बोलैया, ‘हाँ थारै पुरखै अब्राहम, इसहाक होर याकूबा परमेश्वर यहोवा आसी।’ मेरा नांओ सदा का आसी।”

पर मूसा डरो थिया होर फिरौना गोलै जाणा नी चाहंदी थिया किलैकि स सोचो थिया कि स धोरैकेरे बोले नी सकदा। तै परमेश्वरै मूसा भाए, हारून, तेसरी सहायता करणै कठै भेजा।