10. दस महामारी

“परमेश्वरै मूसा होर हारूना लै चेतावने दैए कि फिरौना मन हैन हठी होंणा। जिंया सिंयो फिरौना गोलै डेयै तै तिन्है बोला, “इस्राएला परमेश्वर एड़ा बोलो, ‘मेरै लोगा जाणे दैओ!’” पर फिरौनै नी तिन्है शुणी होर इस्राएली लोगा जांणै कठै आजाद करणै बजाए तिनी सिंयो होर कठण परिश्रम करणै कठै मजबूर कियै।

फिरौन तिन्हा लोगा लै जाणै कठै सदा ना ही करदा रौहा, एतिकठै परमेश्वरै मिस्र देशा दे दस घोर कष्ट भेजै। इन्हा कष्टै जरियै, परमेश्वरै फिरौना लै दसा कि परमेश्वर फिरौना होर मिस्रै देवतै का हैन शक्त्तिशाली आसी।

तिंया परमेश्वरै नील दरैओआ पांणै खूना दे बदड़ै दैया, पर फिरौनै अझी भी इस्राएले जाणे नी दैई।

परमेश्वरै सारै मिस्र देशा दे मिंड़कै भेजै। फिरौनै मिंड़कै दूर करणै कठै मूसा का अर्ज किये। पर सभी मिंड़कै मरे जाणै का बाद, फिरौना लै हठ आए होर तिनी इस्राएले लोग मिस्र देशा का बाहरा लै जाणे नी दैई।

तै परमेश्वरै माठै-माठै माखै विपत्ते भेजे। तेताका बाद तिनी ढ़ांगै विपत्ते भेजे। फिरौनै मूसा और हारून शादै होर तिन्हा का बोला कि जै सिंयो तेस कष्टा रोके दैयो तै इस्राएली लोग मिस्र देशा छाड़ेकेरे जाए सको। जिंया मूसै प्रार्थना किए तिंया परमेश्वरै मिस्रा का ढ़ांगै विपत्ते हटाए। पर फिरौना लै हठ आए होर सिंयो लोग आजाद होएकेरे जाणे नी दैई।

एताका बाद। परमेश्वरै मिस्रियै सभ पालतो जानवर बमार किए होर सिंयो तैसा बमारी केरे मरे गोए। पर फिरौना मन भी का हठी होआ होर तिनी इस्राएली लोग जाणे नी दैई।

तिंया परमेश्वरै मूसा का फिरौनै सामनै हावा दे भसमा शोटणै लै बोला। जिंया तिनी एड़ा किया तिंया मिस्र देशै लोगै शरीरा दे दाए आड़ै दु:खणै निकड़ै, पर इस्राएली लोगा लै किछ भी नी हुई। परमेश्वरै फिरौना मन होर हठी किया, होर तिनी इस्राएली लोग जाणे नी दैई।

एताका बाद, परमेश्वरै सर्गा का शरो बरशाया होर मिस्री लोगै सभी फसला नाश होआ होर जुण कोए भी बाहरा लै निकड़ा स मरे गोआ। फिरौनै मूसा और हारून शादै होर तिन्हा का बोला, “मं किया पाप। तुम्है सब लोग जाए सको।” तै मूसै प्रार्थना किए, होर सर्गा का शरो बरशंणा बंद होए गोआ।

पर फिरौनै भी का पाप किया होर आपणा मन होर हठी किया। तिनी इस्राएली लोग आजाद होएकेरे जाणे नी दैई।

तै परमेश्वरै मिस्र देशा दे रैटै झुण्ड आछणे दैये। इन्है रैटै सिंयो सारी फसला खाई जुण शरु केरे खत्म नहीं हुई थी।

तेखा परमेश्वरै न्हैरा करे दैया जुण चन धैड़ै तिक बंणा रौहा। ए एत्रा घोर थिया कि मिस्री लोगै निसा आपणै घौरा का बाहरा लै भी निखड़ुए। पर जिंधे इस्राएले लोग रौओ थियै तिंधे प्रैशा थिया।

इना नौ कष्टा का बाद भी, फिरौनै इस्राएली लोगा लै आजाद होएकेरे जांणै कठै नां करे दैये। किलैकि फिरौनै परमेश्वरै गला नी शुणी थी एतिकठै अंता दे एक होर कष्ट भेजणै तरकीब बणाए। एस कष्टा फिरौना मन बदलै दैणा।