11. फसहा त्यौहार

परमेश्वरै मूसा होर हारून फिरौना गोलै एड़ा बोलणै कठै भेजै कि इस्राएली लोगा जाणे दै। तिन्है तेसलै चेतावने दैये कि जै तिनी सिंयो जांणै नी दैये, तै परमेश्वरा मिस्रै लोगै होर जानवरै सभ बडड़ै-बडड़ै शोरो मारे दैणै। फिरौनै एड़ा शुणेकेरे भी परमेश्वरा गैश विश्वास करणै का होर तेसरी गला मनणै का ना करे दैये।

परमेश्वरै तेस गैश विश्वास करणै आड़ै सभीयै पैहलै शोरु बचाणै कठै एक तरकीबा इंतजाम किया। हर परिवारा (इसाएली) एकी निर्दोष छेलुए बलै दैणै थिये।

तेखा परमेश्वरै इस्राएली लोगा का तेस छेलुआ खून आपणै घौरै दवारा दे लाणै लै बोला। तिन्हा तेसरा मास भुजणा थिया होर तेखा तिन्हा बिणी सजेड़ै रोटी सागे झटपट खांणा थिया। तिनी तिन्हा लै खाणैलै खांणै का बाद तेस ही समै मिस्र देशा छाड़णै लै भी छेकै त्यार रौहणै कठै बोला।

जेड़ा करणै कठै परमेश्वरै इस्राएली लोगा लै आदेश दिया थिया तिन्है तेसरै अनुसार सभ किछ तेड़ा ही किया। आधी रैचे, परमेश्वर हर एकी बडड़ै शोरुआ प्राण नाश करदी मिस्र देशा मेंझा का होयेकेरे आगो बढा।

इस्राएली लोगै हर एकी घौरै दवारा दे खून लागादा थिया, एतिकठै परमेश्वरै सिंयो घौर छाड़े दैये। तेत भिथरै सभ लोग धोरै थियै। सिंयो छेलुए खूनै वजहै केरे बचे गोए थियै।

पर मिस्री लोगै परमेश्वरा गैश विश्वास नी की होर तेसरे आज्ञा नी मनी थिये। एतिकठै परमेश्वरै तिन्है घौरा सभिका बड़डा शोरो होर पैहलै-पैहलै पालतो पशो नी छाड़ी। परमेश्वरै मिस्री लोगै हरेक बडड़ै शोरो मारे दैये।

तिंया जेलै कैदियै सभिका बडड़ै शोरु का लौएकेरे, फिरौनै बडड़ै शोरु तिक, हर एक बड़ा नर शोरो मरे गोआ। आपणै कष्टै बजहा का जुण सैहणै जोगता नी थी, मिस्रियै लगभग सभ लोग चिंगदै लागैदै थियै होर शोक करदै लागेदै थिये।

तैसा ही रैचे, फिरौनै मूसा और हारून शादै होर बोला, “इस्राएली लोगा लोयैकेरे एबै ही मिस्र देशा का निकड़े जाओ!” मिस्रै देशै लोगै भी इस्राएली लोगा का तिंया ही तिंधा का निकड़े जांणै अर्ज किये।