12. इस्राएली लोगा मिस्र देशा का बाहरा लै जाणा (निर्गमन)

इस्राएली लोग मिस्र देशा का निकड़ेकेरे हैन खुश थियै। सिंयो ऐबै दास नी थी, होर सिंयो वादा कियैदै देशा लै चालैदै थियै! जुण किछ भी इस्राएली लोगै माँगा, मिस्री लोगै तिन्हा लै स सभ किछ दैया, इंदा तिक कि सोना होर चाँदे होर दूजी कई भांति मैंहगी चीजा भी दैइ। दूजै देशै किछ लोगै परमेश्वरा गैश विश्वास किया होर जिंया इस्राएली लोग मिस्र देशा का निकड़ै तिंया सिंयो भी तिन्हा सागे आए।

धैड़कै समै बादड़ा एक बड़ा खम्भा तिन्है आगो-आगो चाला। होर रैचकै समै ए आगा खम्भा बणे गोआ। परमेश्वर जुण कि तेस बादड़ै खम्भै दे होर आगै खम्भै दे थिया, स कबल्ला तिन्हा सागे थिया होर तिनी यात्रा करदै समै तिन्हा का पैंडा दसा। तिन्हा सिर्फ एत्रा करणा थिया कि तेस पिछो हाँडदै लागणा थिया।

तेखा थोड़ै जै समै का बाद, फिरौन होर तेसरै लोगै आपणा मन बदड़े हेरा। सिंयो इस्राएली लोगा भी का आपणा दास बणाणा चाहो थियै। एतिकठै तिन्है इस्राएली लोगा पिछा किया। ए परमेश्वर ही थिया जुणी तिन्है मन बदड़ै। तिनी एड़ा तै किया किलैकि स चाहो थिया कि सभ ए जैणे लओ कि फिरौना का होर मिस्रियै लोगै सभी देवतै का स, यहोवा, हैन शक्त्तिशाली आसी।

जिंया इस्राएली लोगै मिस्रै सैनै लोग आपु पिछो आछदै हेरै तिंया तिन्हा का पता लागा कि सिंयो फिरौनै सैना होर लाल समुंदरा मेंझ फसे गोऐदै। सिंयो हैन डरे गोए होर चिंगदै लागै, “हामै मिस्र देश किलै छाड़ा? एबै हामा मरणै का कोए नी बचाए सकदा!”

मूसै इस्राएली लोगा लै बोला, “डरी नी आथी! परमेश्वरा आज आपु ही थारी कठै खड़णा होर तुम्है बचाणै।” तिंया परमेश्वरै मूसा का बोला, “इना लोगा लै लाल समुंदरा बाखा लै आगो बढ़णै लै बोलो।”

तिंया परमेश्वरै स बादड़ा खम्भा इस्राएली लोगै होर मिस्रियै लोगै मेंझा दे डाए दैया होर रैचे स आगा खम्भा बणे गोआ, ताकि सारी रैचे मिस्री लोग इस्राएली लोगा हेरे नी सको।

तेखा परमेश्वरै मूसा लै समुंदरा गैश हाथ बढ़ाणै लै बोला। परमेश्वरै बागरी केरे समुंदरा पाणे खैंजी बाखा लै होर दैणी बाखा लै करे दैया, जेतकेरे समुंदरा का होयेकेरे एक पैंड़ा बणे गोआ।

तिंया इस्राएली लोग आपणै दूई बाख पांणी दवाला सागे शुकी जमीना गैश समुंदरा बाथी होयेकेरे आगो हाँडदै लागै।

तिंया परमेश्वरै तेस पैंड़ै का बादड़ा खम्भा चका ताकि मिस्री लोग इस्राएली लोगा बचेकैरै जांदै भाड़ौ। मिस्री लोगै तिन्हा पाकड़णै कठै तिन्हा पिछा करणैया बचार किया।

तै तिन्है समुंदरै पैंड़ै दे इस्राएली लोगा पिछा किया, पर परमेश्वरै मिस्रे लोग डरैयै होर तिन्है रथ रोके दैये सिंयो राड़ा पांदै लागै, “भागो! इस्राएली लोगा बाखा परमेश्वर लड़दा लागादा!”

जिंया सारै इस्राएली लोग समुंदरै दूजी बाख पुज्जे गोए। तिंया परमेश्वरै मूसा का बोला कि भी का पांणी गैश हाथ बढ़ा। जिंया मूसै एड़ा किया, तिंया पांणे आपणी पैहलकी स्थिति दे आए गोआ होर मिस्री सैणा गैश आ। होर सारे मिस्रे सैना ड़ूबे गोए।

जिंया इस्राएलिऐ भाड़ा कि मिस्रै लोग मरे गोए तिंया तिन्है परमेश्वरा गैश विश्वास किया। तिन्है विशवास किया कि मूसा परमेश्वरा बाखा भविष्यद्वक्त्ता आसी।

इस्राएली लोग तै बी हैन खुश थियै किलैकि परमेश्वरै सिंयो मरणै का होर दास होंणै का बचाए हेरै थियै। एबै सिंयो परमेश्वरै आराधना करणै कठै होर तेसरी आज्ञा पालन करणै कठै आजाद थिये। इस्राएली लोगै आपणी आजादीया त्यौहार मनाणै कठै होर परमेश्वरै तारीफ करणै कठै कई गांणै गाऐ किलैकि तिनी सिंयो मिस्री सैना का बचाए थियै।

परमरश्वरै इस्राएली लोगा लै हर साल त्यौहार मनाणै आज्ञा दैये एड़ा याद करणै कठै कि केड़केरे परमेश्वरै मिस्री लोग हराए होर सिंयो दास होणै का आजाद कियै। ए फसहा पर्व कहलाओ थिया। एस त्यौहारा मनाणै कठै तिन्हा एक निर्दोष छेलो बलि करणा थिया, स भूजणा थिया, होर स बिणी सजेड़ै रोटी सागे खाणा थिया।