13. इस्राएली लोगा सागे परमेश्वरै वाचा

जिंया इस्राएली लोगा लाल समुंदरा का पारा बाखा लै निणै का बाद, परमेश्वरै सिंयो बौणा मेंझा का होयेकेरे सीनै नांओए धारा बाखा लै निंयै। ए सौही धार थिए जिंधे मूसै फुकदा झाखड़ भाड़ा थिया। तिन्है लोगै तैसा धारा हेठ आपणा तांबो बंणाया।

तेखा परमेश्वरै मूसा होर इस्राएलै सभी लोगा का बोला, “जै तुम्है सच्ची लै ही मेरी आज्ञा मनूंग होर जुण वाचा पालन करुँग, तै सभी लोगा मेंझा का तुम्है ही मेरै खास लोग ठहरणै; होर तुम्है मेरी नजरा दे परोहता समाज होर एक पवित्र जाते ठहरणे।”

परमेश्वरै जरियै तिन्हा गोलै आछणै कठै लोगै चन धैड़ै तिक आपुणै त्यारे किये। तिंया परमेश्वर सिनै धारै टिलै गैश उतरा। जिंया स आया तिंया जाजरे हुए, बिजड़े चमके, काड़ै बादड़ घोरुऐ, होर करनाड़ै जोरै आवाज आए। तिंया मूसा आपु धारा गैशा लै चढ़े गोआ।

तिंया परमेश्वरै लोगा सागे एक वाचा बांधे। तिनी बोला, “हाँ थारा परमेश्वर, यहोवा आसी। हाँ ई आसी जुणी तुम्है मिस्र देशै गुलामी का आजाद किये। कसी होरी देवतै आराधना नी करी।”

“तुम्है मूर्ति नी बणाई होर तिन्है आराधना भी नी करी, किलैकि हाँ, यहोवा, थारा सिर्फ एक परमेश्वर आसी। गलत तरीकै केरे मेरै नांओआ इस्तेमाल नी करी। आरामा करणै धैड़ै पवित्र मनणै कठै याद डाया। दूजै शब्दा दे, छ: धैड़ै दे आपणै सभी कामा करया, सातवा धैड़ा थारै कठै आरामा करणै लै होर मेरी आराधना करणैया धैड़ा आसी।"

“तुम्है आपणै आम्मा होर बाबा आदर करया। हत्या नी करी। व्यभिचार नी करी। चोरे नी करी। झूठ नी बोली। आपणै पड़ोसीये लाड़े, तेसरै घौरा, या तेसरै कसी भी सामाना लौणैया लालच नी करी।”

परमेश्वरै तिन्हा लोगा लै जुण बिधी दैयी थी सिंयो तिन्हा मनणै कठै त्यार होयै। सिंयो सिर्फ परमेश्वरै लोग होणै कठै होर सिर्फ तेसरे ही आराधना करणै कठै त्‍यार थियै।

तेखा परमेश्वरै इस्राएली लोगा लै एक बड़ा तांबो बणाणै लै भी बोला-मिलापा आड़ा तांबो। तिनी तिन्हा लै ठीक-ठीक दसा कि ए तांबो केड़केरे बंणाणा, होर तेत भिथरे किजै चीजा ड़ाणी। तिनी तिन्हा लै तेस तांबु लै दुई कमरै दे बांड़णै कठै एकी बड़ै पर्दै बणाणै लै भी बोला। परमेश्वरा तेस पर्दै पिछलै कमरै दे आछणा होर तिंधे रौहणा थिया। जिंधे परमेश्वर थिया तेस कमरै लै जाणै जाजत सिर्फ महा परोहता लै थिये।

तिन्हा लोगा तेस मिलापा आड़ै तांबुयै समनै एक वेदे बणाणे पड़णै थिये। कोए भी जस परमेश्वरै व्यवस्था दे लिखिदी आज्ञा पालन नी करणी स तैसा वेदी गैशा लै एक छेलू लौयेकेरे आछो। तिंया परोहता तेस छेलुए बले चढ़ाणे होर वेदी गैश परमेश्वरै कठै बलिऐ रुपा दे स फुकणा। परमेश्वरै बोला कि तेस छेलूयै खूना तेस मंणछा पाप ढके दैणा। एड़केरे, ऐबै परमेश्वरा स पाप नी हेरणी। स मंणछ परमेश्वरै नजरा दे “चोखा” ठहरणा। परमेश्वरै मूसा भाए हारून होर तेसरै वंशज आपणै परोहत होंणै कठै चुनै।

तिंया परमेश्वरै इंयो दस आज्ञा पाथरै दूई पाटी दे लिखेकेरे मूसा का दैई। परमेश्वरै आज्ञा मनणै कठै लोगा लै होर कई हैन जी बिधी दसी। जै तिन्है इन्हा बिधिया पालन किया तै परमेश्वरै तिन्हा लोगा लै आशीष दैणैया होर तिन्है सुरक्षा करणैया वादा किया। पर तिनी बोला कि जै तिन्है इन्हा पालन नी किया तै तेस तिन्हा लै सजा दैणे।

तिंया हैना धैड़ै तिक, मूसा सीनै धारै टिलै गैश रौहा। स परमेश्वरा सागे गला करदा लागादा थिया। पर लोग तेस, तिन्हा गोलै वापस आछणै कठै न्हैड़दी-न्हैड़दी थके गोए थियै। एतिकठै तिन्है हारूना गोलै सूना आणा होर तेसलै एक मूर्ति बणाणै लै बोला ताकि सिंयो परमेश्वरै बजाए तैसा मूर्तिये आराधना करे सको। एड़केरे, तिन्है हैन बुरै तरीकै केरे परमेश्वरै खिलाफ पाप किया।

हारूनै बाछुऐ आकारा दे सूनै एक मूर्ते बणाए। तिन्है लोगै तैसा मूर्तिए पूजा करणे शुरु करै दैयै होर तैसा लै बले चढ़ाए! तिन्है पापै वजहा केरे परमेश्वर तिन्हाका हैन रुष्ट होआ। स तिन्हा नाश करे दैणा चाहो थिया। पर मूसै तिन्हा नहीं मारणै कठै परमेश्वरा का अर्ज किये। परमेश्वरै तेसरे अर्ज शुणे होर तिन्हा नाश नी की।

तेखा मूसा सीनै धारा गैशा का ऊँदै आ। तिनी सिंयो दुए पाथरै पाटी लोयिदी थी जेत दे परमेश्वरै दस आज्ञा लिखिदी थी। तेखा तिनी स मूर्ते भाड़े। तेसलै एत्रा गुस्सा आ कि तिनी सिंयो पाटड़ी छुनै केरे चूर-चूर करे दैई।

तेखा मूसै तैसा मूर्ति पिशेकेरे तेता बुर बणाया। होर स बुर पांणी दी मिलाएकेरे तिन्हा लोगा लै स पांणे पिणै लै दैया। तिन्है पापै बजहा का परमेश्वरै तिन्हा लोगा गैश एक मुसीबत भेजे होर तिन्हा मेंझा का हैन सारै लोग मरे गोए।

तेखा एड़ा होआ कि जुण पाटड़ी मूसै चोड़ी थी तिन्है जैगहा लौणै कठै मूसै तिना दस आज्ञै पाथरै नौंइ पाटड़ी बणाई। तिंया स भी का धारा गैशा लै डेआ होर प्रार्थना किए कि परमेश्वर तिन्हा लोगा माफ कर। परमेश्वरै मूसै प्रार्थना शुणे होर सिंयो लोग माफ कियै। तेखा नौंइ पाटड़ी दे दस आज्ञा लौएकेरे मूसा धारा गैशा का ऊँदै उतरा। तिंया परमेश्वरै सीनै धारा का लौएकेरे प्रतिज्ञै देशा तिक इस्राएली लोगै अगुवाए किये।