14. बौणा दे भटकणा

परमेश्वरै इस्राएली लोगा लै सिंयो बिधी दसणी खत्म की जैता तिन्हा तेसरे कियैदै वादै बजहा का पालन करणा थिया। तेखा तिनी सिनै धारा का आगो तिन्हा का पैंडा दसा। स तिना वादा कियैदै देशा लै निणा चाहो थिया। ए देश कनान भी कहलाओ थिया। परमेश्वर बादड़ै खम्भै रुपा दे तिन्हा आगो-आगो चला, होर सिंयो तेस पिछो-पिछो हांड़दै लागै।

परमेश्वरै अब्राहम, इसहाक होर याकूबा सागे प्रतिज्ञा किये थिये कि तेस स प्रतिज्ञा देश तिन्है वंशजा लै दैणा, पर एबै तिंधे हैन सारी जाति रौहो थी। सिंयो लोग कनाने कहलाओ थियै। सिंयो कनाने लोग परमेश्वरैए आराधना नी करदी थियै होर तेसरी आज्ञा नी मनदै थियै। सिंयो झूठै देवतै आराधना करो थियै होर हैन सारै बुरै काम करो थियै।

परमेश्वरै इस्राएली लोगा का बोला, “जिंया तुम्हा तेस प्रतिज्ञा कियैदै देशा लै जाणा तिंया तिंधै सभी कनानी लोगा का छुटकारा पाया। तिना सागे समझौता नी करी होर तिना सागे बैह भी नी करी। तुम्है तिन्ही सभी मूर्ति नष्ट करया। जै तुम्है मेरी आज्ञा नी मनुंग, तै तुम्हा मेरै बजाए तिन्है देवतै आराधना करदै लागणै।”

जिंया इस्राएली लोग कनान देशै सिंवा दी पुज्जै, मूसै इस्राएली लोगा हरेक गोत्रा का एक-एक करेकेरे बारहा मर्द छांटै। तिनी तिन्हालै जायेकेरे तेस देशा भेद लौणै आज्ञा दैये कि हेरो कि स केड़ा देश आसी। तिन्हा कनानी लोगा भेद भी लौणा थिया कि हैरिये कि सिंयो केत्रै बलशाली या कमजोर थियै।

तिन्है बारहा मर्दै पुरै कनान देशा बाथी जांदी बारी चाड़ी धैड़ै यात्रा किए होर तेखा सिंयो वापस हटै। तिन्है लोगा का दसा, “स देश उपजाऊ आसी होर तिंधे फसला भरपूर हो!” पर दस जासूसै बोला, “तिन्है कस्बे हैन मजबूत आसी होर सिंयो लोग राक्सा सैंइ लांबै-चौड़ै आसी! जै हामै तिना गैश हमला करुँग, तै जरुर ही तिन्हा हामै हराए दैणै होर हामै मारे दैणै।”

तिंया ही कालेबै होर यहोशूए होर दुई जासूसै बोला, “ए सच आसी कि कनानै लोग लांबै होर जोरा आड़ै आसी, पर पक्का हामै तिन्हा हराए सको! परमेश्वरा माहरी कठै लड़णा”

पर लोगै कालेब होर यहोशूइ गला नी शुणी। सिंयो मूसा होर हारूना गैश गुस्सा हुए होर बोला, “तुम्है हामै ऐसा डरावनी जगहा लै किलै आणै? हामा मिस्र देशा दे ही रौहणा चहिए थिया। जै हामै तेस देशा लै डेयै तै हामै युद्धा दे मारै जांणै, होर कनानै लोगा म्हारी लाड़ी होर शोरो दास बणाणै।” सिंयो लोग तिन्हा वापस मिस्र देशा लै निणै कठै एक होर अगुवा चुनणा चाहो थियै।

जिंया तिन्है लोगै एड़ा बोला तिंया परमेश्वर हैन रुष्ठ होए गोआ थिया। स मिलापा आड़ै तांबू दे आ होर बोला, “तुम्है मेरै खिलाफ बगावत कियेदे, एतिकठै तुम्हा सभी बौणा दे भटकणा पड़णा। हरेक आदमे जुण बिया वर्षा या तेताका ज्यादी उम्रा आसी तिंधे मरे जाणा होर कधी भी तेस देशा दे प्रवेश नी करे सकदा जुण मूं तुम्हा लै दैणा। सिर्फ कालेबा होर यहोशू तेत दे प्रवेश करणा।”

जिंया लोगै परमेश्वर एड़ा बोलदा शुणा, तै सिंयो दु:खी हुए किलैकि तिन्है पाप किया थिया। एतिकठै तिन्है कनानै लोगा गैश हमला करणैआ बचार किया। मूसै तिन्हा लै नहीं जाणै कठै चेतावने दैए किलैकि परमेश्वर तिन्हा सागे नी जाणी थिया, पर तिन्है तेसरे नी शुणी।

परमेश्वरै एस युद्धा दे तिन्हा सागे नी डेइ थिया, एतिकठै कनानी लोगै सिंयो हराए डाए होर तिन्हा मेंझा का हैन सारै मारै देयै। तिंया इस्राएली लोग कनान देशा का वापस मुड़ै। आगलै चाड़ीए साला तिक, सिंयो बौणा दे ओरै-पोरै भटकदै रौहै।

इस्राएली लोगै द्वारा बौणा दे भटकणै चाड़ीए साला तिक, परमेश्वरै तिन्ही जरुरता पूरी की। तिनी तिन्हा लै सर्गा का “मन्ना” कहलाणै आड़े रोटे दैये। तिनी बटेरे झुंड भी (जुण माठै रूपै पंछे हो) तिन्है तांबू लै भेजै ताकी तिन्हा गो खाणै लै मास हो। तेस पूरै समै दे, परमेश्वरै तिन्है झिकड़ै होर बुट धैड़णै का बचाए डाए।

इंदा तिक कि परमेश्वरै तिन्है पिणै कठै चमत्कारी तरीकै केरे जाना मेंझा का पाणे काढ़ा। पर एस सभी का बाद, इस्राएली लोगै परमेश्वरै खिलाफ होर मूसै खिलाफ शकैत किए होर बड़बड़ाए। तैभी परमेश्वर विश्वासा लायक थिया। तिनी जुण प्रतिज्ञा किए थिये तेस जुण अब्राहम, इसहाक, होर याकूबै वंशजा लै करणा थिया तिनी स किया।

एकी होरी समै जिंया तिन्हा गो पाणे नी थी, परमेश्वरै मूसा का बोला, “जाना सागे गला कर, होर तेताका पाणे निकड़णा।” पर मूसै जाना सागे गला नी की। बजाए एतै, तिनी शोठै केरे जानै दे दुई बारी बाए। एड़केरे तिनी परमेश्वरा अपमान किया। सभी लै पिणै कठै जाना का पांणे ता निकड़े गोआ, पर परमेश्वर मूसा का हैन रुष्ठ हुआ। तिनी बोला, “किलैकि तौं एड़ा किआदा, एतिकठै तू वादा कियैदै देशा दे प्रवेश नी करे सकदा।”

जिंया इस्राएली लोग चाड़ीए साला तिक बौणा दे भटके गोए थियै, तिंया जुणी परमेश्वरै खिलाफ बगावत किये थिये सिंयो सभ मरे गोऐ थियै। तिंया परमेश्वरै सिंयो लोग भी का तेस प्रतिज्ञा कियैदै देशै सिवां तिक निंयै। एबै मूसा हैन ठगड़ा होए गोआ थिया, एतिकठै परमेश्वरै लोगा का पैंडा दसणै कठै तिन्ही मदद करणै कठै यहोशो चुना। परमेश्वरै मूसा सागे ए वादा भी किया थिया कि एकी धैड़ै तेस तिना लोगा गोलै मूसा सैंइ एक भविष्यद्वक्त्ता भेजणा।

तिंया परमेश्वरै मूसा लै एकी धारै टिलै गैशा लै जाणै लै बोला ताकि स प्रतिज्ञा कियैदै देशा भाड़े सको। मूसै स प्रतिज्ञा कियादा देश भाड़ा पर परमेश्वरै तेसलै तेत दे प्रवेश करणै अनुमते नी दैई। तिंया मूसा मरे गोआ, होर इस्राएली लोगै तिया धैड़ै तिक दु:ख मना। यहोशो तिन्हा नौंआ अगुआ बणे गोआ। यहोशो एक बढ़िया अगुआ थिया किलैकि तिनी परमेश्वरा गैश भरोसा किया होर तेसरी गला मनी।